Sápmi |

Oanehaččat: Ruoŧa Sámediggi bivdá ráđđehusa álggahit duohtavuođakommišuvnna, Scheinin álgoálbmotvuoigatvuođaid professoran Lappi universitehtii, Dihtosis-prošektii ohcet bargi

Dás leat vahku maŋimuš oanehis ođđasat.

Per Olof Nutti
Ruoŧa Sámedikki stivrra ságadoalli Per Olof Nutti. Govva: SVT

Guldal dás bearjadatiđida Yle Ođđasiid Sámis. Jietna: Yle Areena.

Ruoŧa Sámediggi bivdá ráđđehusa álggahit duohtavuođakommišuvnna

Ruoŧa Sámediggi lea bivdán Ruoŧa ráđđehusa álggahit sámi duohtavuođakommišuvnna barggu, muitala Ruoŧa Sameradio ja SVT Sápmi. Ruoŧa Sámedikki stivrra ságadoalli Per Olof Nutti guđii gaskavahku 12.6. áššis virggálaš bivdaga sámeministtar Amanda Lindii. Nutti dadjá, ahte ášši lea dehálaš Sámedikki stivrii ja vuordáge, ahte stáhta bargagoahtá ovttas Sámedikkiin duohtavuođakommišuvnnain.

Sámeministtar Lind jáhkká sámi duohtavuođakommišuvnna leat ávkin čalmmustahttimis historjjálaš vearrivuođaid. Seammás son sávvá, ahte kommišuvdnabargu addá maiddái nisttiid mannat ovddos guvlui.

Scheinin álgoálbmotvuoigatvuođaid professorin Lappi universitehtii

Álgoálbmotvuoigatvuođaid professor Martin Scheinin lea nammaduvvon Lappi universitehta riektediehtaga dieđagotti álgoálbmotrievtti oasse- ja mearreáigásaš professoran. Scheinin álggaha barggustis čakčamánu álggus.

Scheinin lea riikkaidgaskasaš rievtti ja olmmošvuoigatvuođaid professoran European University Instituhtas Firenzes, gos son álggahii jagis 2008. Ovdal dan Scheinin doaimmai Åbo Akademi stáhtarievtti ja riikkaidgaskasaš rievtti professoran ja Olmmošvuoigatvuođainstituhtta jođiheaddjin.

Dihtosis-prošektii ohcet bargi

Dihtosis-sámeskuvlagalledeamit joatkkaprošektii ohcet mearreáigásaš prošeaktabargi. Bargu álgá 5.8. ja bistá 15.3.2020 rádjái.

Prošeaktabargi bargun lea Dihtosis-sámeskuvlagalledeamit prošeavtta ollašuhttin ja hálddašeapmi prošeaktaplána mielde ovttasbarggus stivrenjoavkkuin, nuoraidčálliin ja Nuoraid Akademiijain.

Barggu ceavzilis dikšuma veahkehit heivvolaš skuvlejupmi, sámekultuvrra dovdan, hárjánupmi viiddes materiálaid hálddašeamis sihke máhttu bargat iehčanassii ja ovttas earáiguin. Prošeaktabargis gáibiduvvo sámegiela dáidu.

Ohcamušaid duođaštusaiguin galgá doaimmahit Sámedikki čállingoddái 1.7.2019 diibmu 16.00 rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä