Sápmi |

Oanehaččat: Sámediggeválga álgá, guđas jápme helikopterlihkuhisvuođas Álttás, ealgabivdu álggii sotnabeaivve ja poasta sáhttá dál ádjánit

Dá leat vahku vuosttas oanehis ođđasat.

válgalihppo ja giehta
Govva: Sámediggi

Sámediggeválga lea dál virggálaččat álgán

Sámediggeválggat álge virggálaččat vuossárgga čakčamánu 2. beaivve. Sámediggi sáddegoahtá válgaáššebáhpáriid jienasteddjiide. Áššebáhpárat galggašedje joavdagoahtit jienasteddjiide loahppavahkus. Áššebáhpárat sisttisdollet earret eará rávvagiid njealje gillii, mielddusreivve ja ieš jienastanlihpo, man varas lea vel iežas konfaluhtta.

Jienastanriekti lea vádjit 6000 olbmos. Jienastanáigi lea dán čakčamánu loahpa rádjai. Válgareivve sáhttá máhcahit boastta bokte nu ahte dat joavdá válgalávdegoddái maŋimuštá vuossárgga čakčamánu 30. beaivve, ovdal go jienaid lohkan álgá.

Jietnavuoigadahtton sáhttá máhcahit iežas válgaáššebáhpáriid maiddái persovnnalaččat 16.9. -27.9.2019 gaskasaš áigge válgalávdegotti doaimmahahkii Anáris.

Lasi dieđuid jienasteami birra gávnnat Sámedikki válggat-siidduin.

Poasta sáhttá dál ádjánit

Poastabargiid streaika lea viidon sotnabeaivve. Eahkedis bargobisseheapmái ledje searvan juo badjel 700 poastabargi, geat gullet bargiiduniovdnii PAU.

Streaika lea bissehan poastta gieđahallama ja sirrema máŋgga doaibmabáikkis, nu maiddái Oulu poastaguovddážis vuossárggas gaskavahkkui.

Poastta almmuhusa mielde streaika hihtuda eandalii breavapoastta johtima. Duorastaga 5.9. barggut galggašedje joatkašuvvat nu mo dábálaččat.

Guđas jápme helikopterlihkuhisvuođas Álttás lávvardaga

Álttás dáhpáhuvai vearrás helikopterlihkuhisvuohta lávvardaga eahketbeaivve. Guhtta olbmo jápme go helikopter girddii bávtti njeaiga. Helikopteris ledje fárus vihtta áltálaš nuora ja pilohtta guhte lei Ruoŧa álbmotlahttu.

Lihkuhisvuođa áigge Álttás lei Høstsprell -festivála ja dan oktavuođas ordnejuvvojedje báikkálaš helikopterfitnodaga girdintuvrrat, čállá NRK. Fitnodat lea bissehan buot helikopteriiddis girdima dassážii go gávnnahit siva lávvardaga lihkuhisvuhtii.

Ealggat leat dál ráfeheamit

Ealgabivdu beasai johtui sotnabeaivve čakčamánu 1. beaivve čuovganeapmái. Bivddu álgin lasiha maid ealgabárttiid vára geainnuid alde eandalii dál čakčamánu álggus, go muorain lea ain lasta.

Diibmá Sámi eanangottis dáhpáhuvve 114 ealgabártti biilageainnuid alde. Dán jagi álgobealis leat dáhpáhuvvan juo 57 ealgabártti geainnuid alde. Davvin ealggaid gánneha fáruhit erenomážit johkalegiin.

Varrasamosat: Sápmi

Váldoođđasat

Varrasamosat

Muualla Yle.fi:ssä