Sápmi |

Oanehaččat: Sámediggi almmustahttán bustávvagovvatávvaliid, Ohcejogas čorgejit šiljuid ja njásket miestagiid, Leammi soahtehárjehusa dáhpáhusain lea addon duopmu ja Ohcejogas ordnejit nuoraide speallandáhpáhusa

Dá leat maŋŋebárgga oanehis ođđasat.

Bustávvatávvalat leat almmuhuvvon Sámedikki neahttasiidduin.
Govva: Sámediggi

Bustávvagovvatávvalat almmuhuvvon

Anáraš- ja davvisámegielaid bustávvagovvatávvalat leat almmuhuvvon, nappo távvalat main lea bustávva vaikko F ja govva fárpalis. Anárašgiela bustávvatávvalat leat almmuhuvvon neahtas, davvisámegiela bustávvatávvalat sihke neahtas ja printejuvvon hámis. Távvala sáhttá prentet sámedikki neahttasiiddus dahje diŋgot skuvlen- ja oahppamateriáladoaimmahagas printejuvvon hámis.

Anárašgiela bustávvagovaid lea ráhkadan oahpaheaddji-govvadáiddár Tania-Maria Moilanen. Davvisámegiela bustávvatávvaliid govaid lea ráhkadan Nora Bäck.

Ohcejogas čorgejit šiljuid ja njásket miestagiid vai Deatnu oidno buorebut

Ohcejoga girkosiiddas leat jođus oktasaš njáskanbarggut Gieddemiellis, dahjege suomagillii Onnelantörmäs. Eaktodáhtolaš bargit njásket ja čorgejit vel ihttin Gieddemiellis. Ulbmil lea oažžut Gieddemielli birrasa čorgadin ovdal luossariemuid, muitala Aini Lehtonen, guhte bargá Ohcejoga kulturduovdagat oidnosii -prošeavttas.

Kulturduovdagat oidnosii -prošeavtta olis leat dahkan oidnosadikšunplánaid Ohcejohkii ja Gáregasnjárgii. Oidnosa dikšun dáhpáhuvvá lagamusat eaktodáhtolaš bargiid fámuin. Njuorggáma oidnosadikšunplána dahket loahppageasis ja doppe njáskagohtet ja čorgegohtet duođas easkka boahtte jagi.

Leammi eaktodáhtolaš soahtehárjehusa dáhpáhusain lea addon duopmu

Leammi eaktodáhtolaš soahtehárjehusa dáhpáhusain lea otne addon duopmu Helssega hoavvarievttis. Karjala lennosto ovddeš njunuš Markus Päiviö dubmejuvvui virgesajádaga boastut geavaheamis, bálvalusrihkkosis ja gudni loavkašuhttimis, go lei Leammi eaktodáhtolaš soahtehárjehusas cielahan lennosto olbmuid čakčat 2017.

Päiviö gártá máksit sahku oktiibuot 3 000 euro. Dasa lassin son galgá máksit 1 200 euro buhtadusa Nurmes gávpotjođiheaddji Asko Saatsii gudni loavkašuhttimis.

Hoavvariekti dubmii maiddái áibmofámuid ovddeš hoavdda Sampo Eskelinen 1 770 euro sahkuide bálvalanrihkkosis, go ii álggahan ovdadutkama Leammi dáhpáhusain dalán go dasa livččii lean sivva.

Ohcejogas ordnejit nuoraide lávvardaga speallandáhpáhusa

Ohcejogas nuorat besset speallat Áilegas-dálus ovttas dihtorspealuid lávvardaga 29.6.2019 diibmu 15–24. Speallandáhpáhusas spellet Overwhatch ja Fortnite -spealuid. Dáhpáhusa ordnejit earret eará Ohcejoga gielda ja Sámedikki nuoraidráđđi.

Jus dárbbašat sáhtu, váldde oktavuođa Ohcejoga gieldda sámegielat nuoraidbargi Aleksi Ahlakorpii.

Varrasamosat: Sápmi

Váldoođđasat

Varrasamosat

Muualla Yle.fi:ssä