Sápmi |

Oanehaččat: Sámediggi bivdá ohpit ráđđádallama stáhtaráđiin, ministeriija addán sierralobi riegádahttimiidda Roavvenjárggas, ráđđehusbellodagaid guottáhus stáđásmuvvan ja Vuohču márkanat lávvardaga

Dás leat duorastaga oanehis ođđasat.

Jienaidlohkan
Sámedikki válggas beassá jienastit poastta bokte dahje go máhcaha válgaáššebáhpáriid válgalávdegotti doaimmahahkii. Govva: Pirita Näkkäläjärvi / Yle

Sámediggi bivdá ohpit ráđđádallama stáhtaráđiin válggaid sirdimis

Sámediggi lea sádden stáhtaráđđái hohpolaš ráđđádallanbivdaga dán vahku gaskavahku. Ráđđádallan guoskkašii sámediggeválgga maŋideami. Sámediggi ákkastallá válgga maŋideami vealtameahttunvuođa dainna ahte sámediggelága gearggašii ođasmahttit ovdal čuovvovaš válgga.

Sámedikki oainnu mielde sámediggelága ferte rievdadit amaset siviila- ja politihkalaš vuoigatvuođaid riikkaidgaskasaš oktasašsoahpamuša rihkkumat joatkašuvvat Suomas. Sámediggi čujuha ráđđádallanbivdagis Ovttastuvvan Našuvnnaid olmmošriektekomitea guovvamánu čovdosii.

Jođánis ráđđádallanoktavuohta stáhtaráđiin, goittot oaiveministeriin ja riekteministeriin, dagašii láhkarievdadeami ja válgga maŋideami vejolažžan. Ráđđádallanbivdaga lea vuolláičállán ságajođiheaddji ovttas sadjásaš láhkačálliin dan maŋŋá go lea gulahallan Sámedikki stivrrain.

Ministeriija addán sierralobi riegádahttimiidda Roavvenjárggas

Mánáid riegádahttin guovddášbuohcceviesus Roavvenjárggas lea ožžon joatkkalobi. Sosiála- ja dearvvasvuođaministeriija attii suoidnemánus sierralobi riegádahttindoaimma joatkimii Roavvenjárggas, Kajaanis ja Mikkelis. Sierralohpi dárbbašuvvui danin go mánáid riegádahttimiid mearri Roavvenjárggas lea njiedjan vuollái duháhii jagis.

Davimuš buohccedikšunbire gárttai ohcat sierralobi riegádahttindoaimma joatkimii dál vuosttas geardde. Sierralohpi bistá golbma jagi, jagi 2022 lohppii. Ministeriija árvvoštallama mielde guovddášbuohcceviesus Roavvenjárggas leat doarvái bargit, sajit ja veahkkeneavvut dorvvolaš riegádahttimiid várás

Ráđđehusbellodagaid guottáhus stáđásmuvvan

Varrasamos oaiviliskkadeami mielde opposišuvdnabellodagat Vuođđosuopmelaččat (19,6 %) ja Olgešbellodat Kokoomus (16,8 %) leat ain guokte stuorámus bellodaga Suomas. Daid guottáhus ii leat šat lassánan Yle diŋgon ovddit vástideaddji dutkamuša ektui.

Ráđđehusbellodagain stuorámusat leat sosiálademokráhtat (16,3 %) ja Ruonát (15,1 %), daid guottáhus lea lassánan álgogeasi ektui. Maiddái guovddášbellodat lea fidnen maŋimuš mánotbajis lasi guottiheddjiid (dál 12,6 %).

Ráđđehusbellodagaid oktiirehkenastojuvvon guottáhus lea dál 57 proseantta ja opposišuvdnabellodagaid guottihedje 43 proseantta gažaduvvon olbmuin, dat čielga Yle ođđasis.

Gurutlihtu, Ruoŧŧelaš álbmotbellodaga, Kristtalašdemokráhtaid ja Liike Nyt guottáhus lea binná geahppánan. Taloustutkimus oaiviliskkadeamis ledje mielde lagabui 2500 olbmo.

Vuohču márkanat lávvardaga

Vuohču Sámi márkanat ordnejuvvojit dán vahku lávvardaga ja sotnabeaivve. Márkanbáikki lahkosiin čájehuvvo báikkálaš kultuvra, boazodoallu, sápmelašvuohta ja árbediehtu. Lávvardaga Vuohčus beassá oaidnit bargočájálmasaid, duodječájáhusaid ja konsearttaid sihke gávppašit.

Sámi márkaniid Vuohčus Soađegili suohkanis ordnejit Vuohču gilisearvi, Vuohču Sámiidsearvi, Vuotson Hurjat ja báikkálaš kafea. Dálá hámis márkanat leat ordnejuvvon jagi 2006 rájes.

Dan ovdal kulturbargi Tuula-Maija Magga-Hetta ja su bargojoavku ordnejedje logi geardde Álbmogat ellet -geassedáhpáhusaid Vuohčus.

Lasihuvvon ja divvojuvvon 8.8.2019 diibmu 15.35: Vuohču márkanat leat lávvardaga ja sotnabeaivve. Máinnašupmi Álbmogat ellet -dáhpáhusa ordnejeaddjiin.

Varrasamosat: Sápmi

Váldoođđasat

Varrasamosat

Muualla Yle.fi:ssä