Sápmi |

Oanehaččat: Sámegielat sode-bálvalusaid ruhtadeapmi unnu, ovttaveardásašvuođaáittardeaddji galleda sámeguovllus, Navajo mielde USA presideantagilvvus

Dás leat duorastaga oanehis ođđasat.

Kirsi Pimiä
OVttaveardásašvuođaáittardeaddji Kirsi Pimiä galleda sámeguovllus. Govva: Yle

Sámegielat sode-bálvalusaid ruhtadeapmi unnu

Mearreruđat sámegielat sosiála- ja dearvvašvuođabálvalusaid dorvvasteapmái eai leat lassáneame jagis 2020, čielgá stáhta bušeahttaárvalusas.

Bušeahttaevttohusa mielde Davvi-Suoma sosiálasuorggi máhttinguovddáš Poske sámi ovttadaga ruhtadeapmi unnu mealgat. Sámedikki mielas dat áitá sámegielat ja -kultuvrralaš sode-bálvalusaid ovddideami.

Evttohusa mielde jagis 2020 stáhtadoarjja bissu 480 000 euros, váikko Sámediggi lea máŋgii evttohan doarjagii bajidemiid, vai nagodit dorvvastit sámegielat sode-bálvalusaid sámiid ruovttuguovllus.

Stáhtadoarjja ii leat bajiduvvon jagi 2004 rájes ja Sámedikki árvalusaid mielde duođalaš dárbu livččii 3 miljovnna euroi.

Sámedikki nubbi várreságadoalli Tuomas Aslak Juuso dadjá, ahte mearreruđaid čuohppan lea ruossalasvuođas ráđđehusprográmmain, mas leat čatnasan ovddidit sámegielat sosiála- ja dearvvašvuođabálvalusaid.

Ovttaveardásašvuođaáittardeaddji galleda sámeguovllus

Ovttaveardásašvuođaáittardeaddji Kirsi Pimiä galleda sámeguovllus 22.8.–26.8. Pimiä galleda sámeguovllus otnáža rájes gitta boahtte vahku mánnodahkii. Ovttaveardásašvuođaáittardeaddji oassálastá lávvardaga 24.8. Nuortalaččaid ásaiduhttima 70-jagi ávvudoaluide Čeavetjávrris, galleda Anáris 22.8. ja 26.8. ja Ohcejogas Pimiä galleda bearjadaga 23.8.

Ovttaveardásašvuođaáittardeaddji deaivvada galledeamis áigge Sámedikki ovddasteddjiid ja ságastallá áigeguovdilis áššiin iešguđet sápmelaš doibmiiguin. Dan lassin son deaivvada mátkkis áigge gielddaid virgeolbmuid.

Navajo mielde USA presideantagilvvus

Navajo-eamiálbmot ovddasteaddji Mark Charles lea mielde USA presideantagilvvus. Charles lea sorjjaskeahtes evttohas ja su váibmoáššit leat eamiálbmogiid vuoigatvuođat. Charles oaivvilda, ahte dálá USA:s eamiálbmogat ja eará vehádagat leat vajálduvvan ja sin jietna galgá fas gullot. USA presideantaválggat dollojuvvot jagis 2020.

Vuosttaš eamiálbmot ovddasteaddji, guhte lea searvan USA presideantagilvui, lea Oglala Lakota -álbmoga Russell Means. Means lei mielde presideantaválggas jagis 1987. Áššis muitala NRK Sápmi.

Varrasamosat: Sápmi

Váldoođđasat

Varrasamosat

Muualla Yle.fi:ssä