Sápmi |

Oanehaččat: Sámegielat vuođđooahpahus lassánan, Anára gielddaráđđehus jienastii Jiekŋameara ruovdegeainnu beales, johtolatbárti Vuohčus, Näkkäläjärvi girječálliid sátnefriijavuođaorganisašuvnna stivrii ja golbma geatkki goddon

Loga dás gaskavahku oanehis ođđasiid.

Oahppi bargamin diftoŋŋa njuolganhárjehusa.
Govva: Vesa Toppari / Yle

Dá gulat gaskavahku Yle Ođđasiid Sámis. Jietna: Yle Areena

Sámegielat vuođđooahpahusa dilli lea buorránan

Sámegielat vuođđooahpahus lea lassánan maŋimuš logi jagis Suomas. Oahppiid mearri lea vehá sturron ja sámegielat oahpahussii geavahuvvon diibmomearri lea lassánan sámeguovllus 10 000 diimmuin. Sámegielat oahpahusa várás leat maiddái ovddidan ođđa vugiid, dego gáiddusoahpahusa ja guovttegielat giellalávgunoahpahusa. Ášši boahtá ovdan Sámedikki muitalusas stáhtaráđđái jagis 2018.

LK: Anára gielddaráđđehus jienastii Jiekŋameara ruovdegeainnu beales

Anára gielda dohkkeha Jiekŋameara ruovdegeainnu merkema eanagoddelávvii, muitala Lapin Kansa -aviisa. Anára gielddaráđđehusa cealkámuš Davvi-Lappi eanagoddelávas dohkkehuvvui jienasteami maŋŋá. Čoahkkimis evttohedje cealkit, ahte Jiekŋameara ruovdegeaidnu sihkkojuvvošii lávas eret, muhto evttohus gopmánii jienaiguin 6-2. Gieldda cealkámušas daddjo, ahte ruovdegeainnu ii galgga merket lávvii dárkilit baicce dušše johtalusoktavuođa dárbun.

LK: Ambulánsa ja biila vudje trailera njeaiga Vuohčus

Vuohčus dáhpáhuvai maŋŋebárgga eahkes johtolatbárti. Davás vuodján trailer bisánii fáhkka, ja dan maŋis vuodján ambulánsa deaivvai trailerii. Maiddái ambulánssa maŋis boahtán biila vujii trailera njeaiga. Oktage ii lápmašuvvan, muhto ambulánsa ja biila gal rekčojedje. Bártti áigge lei heajos oainnus ja vuodjinsiivu. Áššis muitala Lapin Kansa.

Pirita Näkkäläjärvi girječálliid sátnefriijavuođaorganisašuvnna stivrii

Pirita Näkkäläjärvi lea válljejuvvon Suoma PEN:a ođđa stivrii. Suoma PEN lea jagis 1928 vuođđuduvvon girječálliid álbmogiidgaskasaš sátnefriijavuođaorganisašuvdna. Suoma PEN:a ođđa stivra válljejuvvui 13.2.2019 organisašuvnna jahkečoahkkimis.

Gávpediehtagiid sihke media ja gulahallama magisttar Pirita Näkkäläjärvi lea Yle Sámi ovddeš hoavda ja son lea magisttarbarggustis čalmmustahttán sápmelaččaid sátnefriijavuođa Suomas.

LK: Golbma geatkki goddon spiehkastatlobiin

Dán rádjai leat fuođđoguovddáža spiehkastatlobiiguin goddán golbma geatkki, muitala Lapin Kansa. Soađegili Lappi bálgosis godde ođđajagimánu loahpas njiŋŋálasa, Giema-Soabbada bálgosis báhče guovvamánu álggus varrása ja Suomussalmi Halla bálgosis gođđe guovvamánu 9. beaivve njiŋŋálasa.

Giehtaruohttasa bálgosis leat fámus guokte spiehkastatlobi ja Hossa-Irni bálgosis okta. Dasa lassin Suoma fuođđoguovddáš lea gieđahallamin guokte lohpeohcamuša, nuppi Giehtaruohttasa bálgosa Bálojávri-Gulddáma guvlui ja nuppi Taivalkoski bálgosii.

Eana- ja meahccedoalloministeriija mearridii ođđajagimánus mieđihit oktiibuot gávcci spiehkastatlobi geatkebivdui. Mearri lea seamma go diibmá ja ovddit jagi.

Suoma fuođđoguovddáža siidduin sáhttá oaidnit buot fuođđoguovddážiid mieđihan spiehkastatlobiid spiriid goddimii.

Varrasamosat: Sápmi

Váldoođđasat

Varrasamosat

Muualla Yle.fi:ssä