Sápmi |

Oanehaččat: Sami Music Awards -bálkkášumit joavkkuide ja servviide, álbmotdilálašvuođat eanagoddelávvahápmosis, nuortalaččaid giličoahkkin vahkkoloahpas, rávvagat dorvvolaš vuojašeapmái mohtorgielkkáin ja sámenuoraid dáiddadáhpáhussii ohcet prošeaktabargi

Loga dás vahku vuosttas oanehis ođđasiid.

Mihá-konsearta
Mihá-konsearta ordnejuvvui Hápmiris 3.3.2018. Govva: Sander Andersen / NRK Sápmi

Dá gulat mánnodaga Yle Ođđasiid Sámis. Jietna: Yle Areena

Sami Music Awards -bálkkašumit manne joavkkuide ja servviide

Sami Music Awards -bálkkašumit juhkkojuvvojedje mannan vahkkoloahpa Álttás, Norggas. Rabas luohkká vuittii Mihá-konsearta, mii lágiduvvui diibmá njukčamánus Hápmiris dan gudnin go divttasvuotnalaččat leat duostagoahtán hállat unohis áššiin, čállá Ávvir. Mihá-konsearttas guoimmuhedje nuvttá earret eará Mari Boine, Frode Fjellheim, Katarina Barruk ja Ágy nuvttá.

Jagi 2018 nuorra artista -bálkkašupmi geigejuvvui Resirkulert-joavkui. Juoigiid searvi vuittiiges árbevirolaš seailluheaddji -bálkkašumi, Roger Ludvigsen bálkkašuvvui jagi buvttadeaddjin ja Jan Kåre Hansen fas válljejuvvui jagi musihkkačállin.

Sami Music Awards -bálkkašumit leat juhkkojuvvon jagi 2016 rájes ja dáhpáhus lea okta oassi Sámi musihkka vahkkus.

Álbmotdilálašvuođat Davvi-Lappi eanagoddelávvahápmosa olis

Davvi-Lappi eanagoddelávvahápmosa (su. Pohjois-Lapin maakuntakaava 2040) olis lágiduvvojit dán vahkus álbmotdilálašvuođat Ohcejogas, Soađegilis ja Anáris. Doppe sáhttá oahpásmuvvat lávvahápmosii ovttas láva ráhkadeaddjiiguin ja muitalit iežas oaivila Ohcejoga, Anára ja Soađegili guovlluide váikkuheaddji, ođđa eanagoddelávvahápmosis.

Vuosttas álbmotdilálašvuohta lea 12.2. Ohcejoga gielddadálus diibmu 18.00. Soađegili gielddadálus álbmotdilálašvuohta lágiduvvo 13.2. diibmu 18.00 ja Anáris Sámekulturguovddáš Sajosis 14.2. diibmu 18.00.

Eanagoddelávvahámus doallá sisttis earret eará ruvtta Jiekŋameara ruovdegeidnui ja šleađgalinjá Roavvenjárggas Ohcejohkii.

Nuortalaččaid giličoahkkimis gieđahallet eanagoddeláva ja duohtavuohta- ja soabadallanproseassa

Nuortalaččaid giličoahkkin, Siidsååbbar, čoahkkana guovvamánus gieđahallat earret eará Davvi-Lappi eanagoddeláva 2040 ja duohtavuohta- ja soabadallanproseassa. Dasa lassin Njellim-Keväjávrri guovllus válljejit nuortalašráđđái ovtta ođđa lahtu.

Nuortalaččaid Siidsååbbar lágiduvvo Njellimis lávvardaga 16.2. ja Čeavetjávrris 17.2.

Rávvagat dorvvolaš vuojašeapmái mohtorgielkkáin

Dál leat almmustuvvan rávvagat dorvvolaš vuojašeapmái mohtorgielkkáin. Rávvagat leat oaivvilduvvon eandalii turismadoibmii, gos ollu easkkaálgit vudjet mohtorgielkkáiguin.

Johtalusdorvvolašvuođa eiseváldit leat čohkken rávagihppaga, mii lea fidnemis sihke eaŋgals- ja suomagillii. Rávvagat leat veahkkin turismafitnodagaide, mat ordnejit mohtorgielká- dahje skohtersafariid. Gihpagis leat rávvagat dasa, mo ráhkkanahttit hárjánkeahtes vuoddji ja mo buoridit dorvvolašvuođa gielkásafáriin.

Mohtorgielkkáiguin davimus Suomas bártidit eanet olbmot go biilajohtalusas. Guovddášbuohcceviesus Roavvenjárggas dikšo mannan dálvvi mealgat badjel 300 dakkár olbmo, geat ledje bártidan mohtorgielkkáin.

Sámenuoraid dáiddadáhpáhussii ohcet mearreáigásaš prošeaktabargi

Sámediggi ohcá sámenuoraid dáiddadáhpáhussii mearreáigásaš prošeaktabargi. Bargu álgá soahpamuša mielde ja joatkašuvvá 30.4.2019 rádjái. Prošeaktabargi bargun lea vástidit Sámenuoraid dáiddadáhpáhusa plánemis, lágideamis, oktavuođa doallamis dáhpáhusa oassálastiiguin ja lágideddjiiguin, dieđiheamis, eará ovdaválmmaštallamis ja dáhpáhusa loahppabargguin. Dáiddadáhpáhus lágiduvvo 10.–11.4. Anáris Sajosis.

Ohcamušaid ovttas oahppo- ja bargoduođaštusaiguin galgá doaimmahit Sámedikki čállingoddái gaskavahku 13.2. diibmu 16.00 rádjai čujuhusain info(at)samediggi.fi. Eanet dieđuid gávdná Sámedikki neahttasiidduin.

Beaividuvvon 11.2.2019 diibmu 13.00. Lasihuvvon ođas Sami Music Awards -bálkkašumiin.

Varrasamosat: Sápmi

Váldoođđasat

Varrasamosat

Muualla Yle.fi:ssä