Sápmi |

Oanehaččat: Sámi musihkkaakademiijai 11 oahppi, Malla dikšun- ja geavahanplána dohkkehuvvon, Njávdámis luossagilvu lávvardaga, Oulu Sámit -searvvi giellakurssain ain sadji

Dás leat gaskavahku oanehis ođđasat.

Sámi musihkkaakademiija
Govas Sámi musihkkaakademiija jahkekurssa 2018-2019 studeanttat Pauli Saijets, Jouna Raudasoja, Heli Aikio, Mihkku Laiti ja Aimo Aikio. Govva: Sámi musihkkaakademiija

Sámi musihkkaakademiijai 11 oahppi

Sámi musihkkaakademiijai leat válljen 11 oahppi. Golmmas álggahit musihkkárlinjjá ja 8 solistalinnjá. Joatkkaoahpuin leat guokte linnjá, maid gaskkas galgá válljet, solistalinnjá ja musihkarlinnjá. Solistalinnjá lea plánejuvvon nu, ahte das leat lagašoahpahusperiodat sullii oktii mánus.

Oahppit bohtet juohke guovllus Sámis, nappo Anáris, Ohcejogas, Eanodagas muhto ii oktage Vuohču guovllus. Oahppit leat maiddái iešguđege giellajoavkkus.

Boahtte čavčča Sámi musihkkaakademiija ordne joatkkaoahpuid vuosttas háve. Dássážii musihkkaakademiija lea ordnen vuosttas jagi oahpuid golbmii ja dál lea ulbmil geahččalit nuppi jagi joatkkaoahpuid.

Sámi musihkkaakademiija ulbmilin lea ovdánahttit duppaldutkkusvejolašvuođa ovttas Ohcejoga sámelogahagain.

– Boahtte jagi sámelogahaga oahppit sáhttet válljet alcces válljenkurssaid, nu ahte das boahtá oahpahus okta eahketbeaivi juohke vahkus. Dat lea oalle ollu, muhto jáhkán dat šaddá maid oalle somá, illuda jođiheaddji oahpaheaddji Anna Näkkäläjärvi-Länsman ođđa fálaldagas.

Sámi musihkkaakademiija lea áidnalunddot skuvlejupmi ja doaibmá ain Ohcejoga gieldda ja Sámi oahpahusguovddáža prošeaktan gitta 30.9.2020 rádjai.

Malla dikšun- ja geavahanplána lea dohkkehuvvon

Gilbbesjávrri Malla luonddumeahci dikšun- ja geavahanplána lea dál dohkkehuvvon, dieđiha meahciráđđehus.

Dikšun- ja geavahanplána mielde geasseáigge lea ain lobálaš johtit luonddumeahci vánddardanmáđija mielde, mii manná golmma riikka rádjegeađggi lusa. Lohpi lea maid fitnat oalgemáđija mielde Šilismalla oainnusbáikkis ja idjadit Guohkkemašjávrri stobuin. Dálvit čuoigan lea lobálaš miehtá guovllu.

Luonddumeahci mearridan ásahusa mielde bohccuid guođoheapmi luonddumeahcis lea gildojuvvon luonddu suodjaleami dihtii. Diibmá álggahedje iskkadallama Giehtaruohttasa bálgosiin ja báikkálaš boazoeaiggádiiguin. Iskkadallamis bohccuide huksejuvvojedje bálgansuojit, maiguin vigget hohkahallat bohccuid geasseáigge eret Mallas. Lassin eanemus áittavuloš šaddošlájaid dihttonbáikkiid áido šattuid birra.

Doaimmaid eai navdde čoavdit loahpalaččat Malla luondduárvvuid ja bohccuid guođoheami ruossalasvuođa, muhto iskkadallamis sávvet vásáhusaid sierralágan čovdosiid doaibmamis.

Njávdámis luossagilvu lávvardaga

Lávvardaga ordnejit Norgga beale Njávdámis luossagilvvu. Gilvu lea Njávdama šalddis vulosguvlui.

Gilvu álgá lávvardaga 6.7.2019 Norgga áiggis diibmu 11 ja bistá gitta eahkedii. Gilvvu lassin ordnejuvvojit márkanat. Lassidieđuid gávnnat dáppe.

Njávdámis goddon luosaid meari beasat guovlat dán liŋkkas.

Oulu Sámit -searvvi giellakurssaide čáhká ain

Oulu Sámit -searvvi giellakurssat divvet jođánit, muhto vel kurssain lea sadji. Čakčat 2019 ordnejuvvojit anárašgiela ja nuortalašgiela kurssat, ja davvisámegiela kursa ordnejuvvo giđđat 2020.

Čavčča kurssat álget čakčamánu álggus ja bistet skábmamánu beallemuddui. Oahpahus ollašuhtto lagašoahpahussan. Almmuhanáigi čavčča kurssaide nohká 31.7.

Lassedieđuid gávnnat Oulu Sámit -searvvi Facebook-siidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä