Sápmi |

Oanehaččat: Sámis gullandilálašvuođat suodjalanguovlluin, Barents Rescue 2019 álgá, golmmas čállet sámegiela ja vuossárgga lea čakčajorggáldat

Dá leat vuossárgga oanehis ođđasat.

Hannukainen ruvkke
Ruvkkebiras Hannukainen gilis Kolari gielddas. Govva: Jarmo Honkanen / Yle

Guldal dás Yle Ođđasiid Sámis diibmu 7.30. Jietna: Yle Areena

Gullandilálašvuođat suodjalanguovlluin

Dán vahkus ordnejit sámeguovllus dieđihandilálašvuođaid ođđa suodjalanguovlluid birra, maid áiggošedje vuođđudit Sápmái.

Guovlluid ráját ja duogášdieđut leat čielggaduvvon ovttas birasministeriijain ja Lappi ealáhus-, johtolat- ja birasguovddážin. Dál sii dieđihišgohtet vejolaš, ođđa luonddusuodjalanguovlluid birra. Sii maiddái bohtet bivdit vel cealkámušaid luonddusuodjalanguovlluid vuođđudeami birra. Cealkámušaid maŋŋá válmmaštallagohtet mearrádusevttohusa.

Vuosttas gullandilálašvuohta lea vuossárgga 23.9. Heahtás, Duottar-Lappi luondduguovddážis diibmu 17. Maŋŋebárgga 24.9. gullandilálašvuohta ordnejuvvo Gilbbesjávrris restoráŋŋa Kilpisis diibmu 17.

Ohcejogas gullan- ja dieđihandilálašvuohta lea duorastaga 26.9 diibmu 17 gielddadálus ja Anáris fas vuossárgga 30.9 diibmu 17 gielddadálus.

Vuossárgga álgá Barents Rescue 2019

Otne vuossárgga álgá Suoma, Ruoŧa, Ruošša ja Norgga oktasaš gádjunhárjehus Barents Rescue 2019. Gádjunhárjehus ordnejuvvo Gironis. Hárjehusa ulbmilin lea buoridit riikkaidgaskasaš ovttasbarggu ja lasihit gearggusvuođa. Hárjehussii oasálastet nu dearvvasvuođasuorggi bargit, bolesat go eaktodáhtolaččat.

Golmmas čállet sámegiela

Otne vuossárgga čállet Suomas sámegiela eatnigiela iskosa studeantačállosiin. Dán čavčča sámegiela čállet eatnigiellan golmmas. Buohkat sis čállet iskosa davvisámegillii.

Vuossárgga lea čakčajorggáldat

Otne vuossárgga lea čakčajorggáldat diibmu 10.50 Suoma áiggis. Dát oaivvilda, ahte otne beaivi lea sullii seamma guhki birra eatnanspábba, ja beaivváš báitá zenihtas dahje njuolga oaivvi bajábealde eatnanspáppa dihtolágan guovdasárgá, ekváhtor alde. Maŋŋebárgga rájis davvin idja lea juo guhkit go beaivi ja beaivi oatnána gitta juovllaid vuollai, dálvejorggáldaga rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä