Sápmi |

Oanehaččat: Sápmi Pride -Ohcejogas boahtte jagi, ii šatta bággonjuovvan, poastajienasteamis váttisvuođat ja maŋŋebárgga huksenárbevierrobeaivi Čeavetjávrris

Dá leat vuossárgga oanehis ođđasat.

Sápmi Pride 2019.
Sápmi Pride ordnejuvvui dán jag Troanddimis Norggas. Govva: Håkon Sandmo Karlsen

Video: median oletuskuva, musta laatikko

Boahtte jagi borgemánus Ohcejohka dievvá arvedávggi ivnniin, go Sápmi Pride ordnejuvvo Ohcejogas, Roavvegiettis. Dán jagaš Sápmi Pride ordnejuvvui vahkuloahpas Troandimis. Boahtte jagi Sápmi Pride dollojuvvo Ohcejogas 6.-9.8.2020.

– Sápmi Pride lea dál ordnejuvvon guktii stuorra báikegottiin, dál lea áigi máhccat smávva gilážii, muitalit ordnejeaddjit.

Vahkuloahpa dáhpáhusa oktavuođas vuođđuduvvui ođđa organisašuvdna, mii doaibmá badjel riika rájáid. Garmeres - Queer Sámi organisašuvnna bargun lea nannet sámiid rivttiid, vejolašvuođaid olles Sámis, muitala Dávvet Bruun-Solbakk, guhte doaibmá organisašuvnna ságadoallin.

Pride dáhpáhusaid dárkkuhus lea čalmmustahttit seksuálaveahádagaid rivttiid, kultuvrra ja ovttaveardásašvuođa.

Sápmi Pride lea ordnejuvvon Suoma Sámis ovdalge, namalassii jagis 2017 Anáris.

Ii šatta bággonjuovvan

Jovsset Ánte Sara ii šattage baggonjuovvat iežas bohccuid, muitala NRK Sápmi. Sara lea soabadallan iežas orohaga eará boazodolliiguin boazologu juogadeamis. Norgga stáhta lea gáibidan Sara geahpedit boazologu 75 heggii ja áššis leat gearreguššan gitta Norgga alimus rievttis. Vuolit dikkiin Sara vuittii stáhta vuostá, muhto dáhpii alimus dásis. Sara lea váidán áššis ON olmmošvuoigatvuođakomiteai ja ášši gieđahallan doppe lea ain gaskan.

Fálá orohagas leamaš gárddástallamat vahkuloahpas ja dohko ledje maid čoahkkanan olu olbmot doarjut Sara ja eastit eiseválddiid bággonjuovvamis Sara bohccuid.

Poastajienasteapmi dagaha váttisvuođaid doppe gos ii leat poastadoaimmahat

Suoma sámediggeválggaid jienasteapmi lea dál jođus, muhto poasttajienasteapmi lea dagahan váttisvuođaid earenomážit boaittobealguovlluid jienasteaddjiide. Juohke jienasteaddji galgá viežžat ieš válgaáššebáhpáriid ja fuolahit daid áiggil válgalávdegoddái.

Ovdamearkka dihte čeavetjávrilaččat gártet viežžat válgabáhpáriiddis Anáris, gosa lea mátki ovttaguvlui badjel 100 kilomehtera.

Válgalávdegotti ságajođiheaddji Janne Näkkäläjärvi šálloša poastta dagahan váttisvuođaid. Näkkäläjärvi ávžžuha jienasteaddjiid dál bargat ovttasbarggu ja geavahit váldegirjjiid jus leat hástalusat oažžot dahje doaimmahit válgaáššegirjjiid ieš.

Nuortalaččaid árbevierrodálus huksenárbevierrobeaivi

Nuortalaččaid árbevierrodálus Čeavetjávrris ordnejit maŋŋebárgga 17.9.2019 čakčabeivviid, maid temán lea huksenárbevierru.

Beaivvi áigge lea vejolašvuohta oahpásmuvvat árbevierrodálu olgoviesuide, maid leat áiddo dál divodeamen.

Olgoviesut leat huksejuvvon dakkárin, go dat ledje Suonjel-siidda geassebáikkis. Čavčča áigge divodit earret eará sávzabuvrri ja geallára.

Sámemusea Siida lea ožžon ruhtadeami Põrtt, äiʹtt da pu´vrr -prošektii. Dán prošeavtta bokte Sámemusea Siida oasálastá nuortalaččaid ásaiduvvama 70-jagi doaluide.

Nuortalaččaid árbevierrodálu čakčabeaivái lea nuvttá sisabeassan.

Varrasamosat: Sápmi

Váldoođđasat

Varrasamosat

Muualla Yle.fi:ssä