Sápmi |

Oanehaččat: Soalddátálggut álggahit odne soahteveagain, máŋgasat sáhkohalle Giehtaruohttasis, biilalihkohisvuohta Soađegilis, sámegielddaid gielddadálut gitta suoidnemánus ja 19 evttohusa, gosa Anára gielda geavaha 10 000 euro

Dás leat vahku vuosttaš oanehis ođđasat.

Utsjoen kunnanvirasto
Sámegielddat dieđihit, ahte gielddadálut leat gitta suoidnemánus. Govva: Vesa Toppari / Yle

Lappi soahteveagain álggahit odne badjel duhát soalddátálggu

Lappi soahteveagain álggahit odne sulaid 1 100 soalddátálggu. Eanáš sis, 650 soalddátálggu mannet Soađegili jeagárprikáhtii. Roavvenjárgga jeagárprikáhtas álggahit sulaid 350 soalddátálggu ja rádjejeagárkompaniijai Avvilii vurdet sulaid 130 soalddátálggu.

Dárkilis mearit sihkkarastojuvvojit, go bálvalussii álgináigi nohká eahkedis guđa áigge. Olles riikkas ođđa soalddátálggut leat badjelaš 12 000.

Bealuštanfámuin muitalit, ahte soalddátálgguid mearrái váikkuha eandalii dat, mo nuorat váldet vuostá studerenbáikkiid.

Lappi bolesat čállán olu sáhkuid vahkkoloahpa áigge

Lappi bolesat čálle badjel čuođi sáhku dahje meaddinsáhku biilavuddjiide Oarje-Lappis ja Giehtaruohttasis vahkkoloahpas. Sáhkuid adde stuorámus osiin menddo garra leavttuin vuodjimis. Daid lassin guovttis vudje vuodjinlobi haga, ii-dohkkehuvvon biillat bissehuvvojedje ja boastut lástejuvvon dávvirguorpmit dárkkistuvvojedje.

Boles mearridii guhtta vuoddji vuodjingildosii alla leavttu dihte. Eanodagas njealjejuvllatvuoddji eahpiduvvo gárrenoaivvis vuodjimis, go son bosui alkomehterii ovtta promilla logu.

Stuorámus oassi sáhkkohuvvon vuddjiin ledje olgoriikkalaš vuoddjit, muitala boles.

Biilalihkohisvuohta Soađegilis

Smávvabiila vujii ealgga njeaiga Soađegili Vaalajärvis vuossárgga 8.7. árraiđida. Gádjunlágádusa mielde biilavuoddjis lei lihkku, go son ii lápmašuvvan lihkuhisvuođas. Ealga jámii, ja biilla ovdalássa ja gáhttu roakčanedje lihkohisvuođas.

Lihkohisvuohta dáhpáhuvai logenar kilomehtera duohken Soađegili guovddážis Meltausageainnus. Gádjunlágádus oaččui dieđu lihkohisvuođas iđđes ovdal beal viđa.

Sámegielddaid gielddadálut gitta suoidnemánus

Sámegielddat dieđihit gielddadáluid leat gitta suoidnemánus.

Eanodaga gielddadállu lea giddejuvvon áigodagas 8.7.–2.8.2019. Sosiáladoaimmahat lea goittotge rabas suoidnemánus.

Ohcejoga gieldadállu lea gitta 8.7.–28.7.2019. Sosiáladoaimmahagas lea bargi.

Anára gielddadállu lea gitta 15.7.–4.8.2019. Sosiáladoaimmahat doaibmá áigodagas hohpolaš áššiiguin.

19 evttohusa, mo Anára gielda galggašii geavahit 10 000 euro

Anára gielda oaččui 19 evttohusa das, mo gielda galggašii geavahit 10 000 euro. Anára gielda lei bivdán evttohusaid ruđa geavaheamis dábálaš olbmuid lassin ovdamearkka dihte nuoraidstivrras ja boarrásiidráđis. Olbmot evttohedje earret eará, ahte gielda sáhtášii 10 000 euroin hukset Avvilii olggos lášmmohallanbáikki, juohkit gieldda dieđáhusaid oktii mánus gieldalaččaid poastagássii, hukset dálvevuojadanbáikki Anárii dahje hukset juovlapárkka Avvilii ovddeš duollu dálu báldii.

Jáhkkimis gielddaráđđehus gieđahallá evttohusaid jo 5.8.2019 čoahkkimis. Ulbmil lea jo dán jagi geavahit 10 000 euro namalassii olbmuid evttohusaid vuođul.

Varrasamosat: Sápmi

Váldoođđasat

Varrasamosat

Muualla Yle.fi:ssä