Sápmi |

Oanehaččat: Solju gilvala duorastaga Etnogaalas, Anárii oahpaheaddjiskuvlen, Jiekŋameara ruovdemáđija plánemis eai muital ja Yle Ođđasat tv:s árabut duorastagaid

Loga dás duorasdaga oanehis ođđasiid.

Solju oassálastá otne Etnogaalai Helssegis. Jietna: Yle Areena

Etnogaala dál nuppe geardde

Suoma nubbi Etnogaala ordnejuvvo duorastaga eahkedis Helssegis. Gaalas bálkkašuvvojit álbmotmusihka, máilmmimusihka ja álbmotdánssa buoremusat. Bálkkašumiin leat čieža kategoriija, main juohkehaččas leat golbma evttohasa. Evttohasaid leat válljen olbmuid evttohusaid vuođul.

Ulla Pirttijärvi-Länsman ja Hildá Länsman Solju-musihkkajoavkkus leaba evttohassan Etnogaala guovtti bálkkašupmái.

Solju lea evttohassan sihke "Jagi álbmotmusihkkadahkki" (su. "Vuoden kansanmusiikkitekijä") ja Jagi ođđa artista" (su. "Vuoden tulokas") -kategoriijain.

Anárii davvisámegielat oahpaheaddjiskuvlejupmi

Oulu ámmátallaskuvlla Ámmátlaš oahpaheaddjeallaskuvllas álgá boahtte čavčča earenoamáš davvisámegielat oahpaheaddjiid skuvlejupmi. Skuvlejupmi ordnejuvvo ovttasbarggus Sámi oahpahusguovddážiin. Sámegielat oahpaheddjiin lea stuorra váilevašvuohta oppa riikkas ja sámeguovllus.

– Oahpaheaddjiskuvlejupmi ordnejuvvo vuosttaš gearddi davvisámegillii. Sisdoalut eai leat dušše jorgalusat suomagielat oahppoplánas, muhto skuvlejumi vuođđun lea sámepedagogihkka ja báikkálaš sámekultuvra. Erenoamáš beroštupmi lea árbevirolaš oahppama ja máhtu birra sámekultuvrras, muitala Tomi Guttorm.

Oahpaheaddji pedagogalaš oahpuid bokte oažžu viiddes pedagogalaš gelbbolašvuođa oahpaheaddji bargui. Ohccis galgá leat heivvolaš allaskuvladutkkus ja unnimusat golmma jagi bargovásáhus. Oahpahus lea davvisámegillii ja gáibádussan lea buorre davvisámegiela njálmmálaš ja čálalaš giellamáhttu.

Oahput álget lagasoahpahussan Anáris boahtte čavčča. Skuvlejumis leat 10 álggahanbáikki.

Jiekŋameara ruovdemáđija plánemis eai vel muital

Johtolat- ja diehtojuohkinministeriijas eai muital, mo Jiekŋameara ruovdegeainnu plánen ovdána dan maŋŋá, go ášši čielggadan bargojoavkku loahpparaporta almmustahttojuvvo.

Bargojoavku lea dahkan nu gohčoduvvon ovdačielggadeami Jiekŋameara ruovdegeainnu váikkuhusain. Sámediggi ii lean duđavaš dasa, go sápmelaš ovddasteddjiid oaivilat eai leat čállojuvvon raportii sin miela mielde.

Danin Sámediggi bivddii ovccát paragráfa miel ráđđádallamiid. Ráđđádallamiid jotket ođđajagimánu 25. beaivve. Ministeriijas árvalit, ahte raporta boahtá almmolažžan ođđajagimánu maŋimuš vahkus.

Loahpparaporta almmustahttima maŋŋá easkka muitalit, mo áššiin ovdánit, dadjá johtolat- ja diehtojuohkinministeriija bajithoavda Sabina Lindström.

Yle Ođđasat sáddenáigi árabut duorasdagaid

Yle sámegielat tv-ođđasat, Yle Ođđasat, oidnojit otnáža rájes juohke duorastaga árat go dábálaččat.

Yle Ođđasat oidnojit juohke árgabeaivve Yle TV1 -kanálas diibmu 16.45. Duorastaga ođđajagimánu 10. beaivvi rájes Yle Ođđasat oidnojit goittotge juohke duorastaga diimmu árat, jo diibmu 15.45.

Árat sáddenáigi guoská dušše duorastagaid. Sivvan lea dat, go TV1-kanála čájeha duorastaga eahketbeivviin Suoma riikkabeivviid gažadanbottu.

Varrasamosat: Sápmi

Váldoođđasat

Varrasamosat

Muualla Yle.fi:ssä