Sápmi |

Oanehaččat: Soljui bálkkašupmi Kanádas, KEiiNO viđadin, Ohcejohkii válljejit ođđa njunnošiid, Ohcejohkalaččat viššalis jienasteaddjit

Dá leat mánnodaga oanehis ođđasat.

Ulla Pirttijärvi ja Hildá Länsman
Solju skearru Ođđa Áigodat vuittii Best International Indigenious Release -bálkkašumi. Govva: Marja Helander

Guldal dás mánnodatiđida Yle Ođđasiid Sámis Jietna: Yle Areena

Solju-joavkui bálkkašupmi Kanádas

Solju-joavku lea vuoitán eamiálbmogiid musihkkabálkkašumi Kanádas. Solju skearru Ođđa Áigodat vuittii Best International Indigenous Release -bálkkašumi, nappo buoremus riikkaidgaskasaš eamiálbmot almmustahttin bálkkašumi Indigenious Music Awards -gálas mii lei bearjadaga Winnipegis Kanádas.

Solju-joavkkus leat Ulla Pirttijärvi ja Hildá Länsman.

KEiiNO viđadin Eurovision lávlungilvvus

Eurovision lávlungilvvu finála lei lávvordaga Tel Avivis, Israelis. Finálas ledje mielde 26 riikka. Finála gilvvohalliin Norgga ovddasteaddji KEiiNO-joavku oaččui buot eanemus jienaid álbmogis, muhto duopmáriid ja álbmoga oktii rehkenaston jienat bukte KEiiNOi viđat saji.

Norgga sádden KEiiNO-joavkkus juoigá guovdageaidnulaš Fred Rene Buljo ja su lassin joavkkus lávluba Tom Hugo Hermansen ja Alexandra Rotan. Sin lávlaga namma lea Spirit in the Sky.

Eurovision lávlungilvvu vuittii Hollándda ovddasteaddji Duncan Laurence bihtáin Arcade. Suoma ovddasdeaddi Darude feat. Sebastian Rejman ii lean mielde lávlungilvvu finálas.

Eurovision lávlungilvvu buot bohtosiid oainnat dáppe.

Ohcejogas válljejit gielddanjunnošiid

Ohcejoga gielddastivra galgá čađahit gielddaráđđehusa lahtuid ja persovnnalaš várrelahtuid válgga doaibmabadjái 2019-2021. Seammás nammadit ságadoalli ja várreságadoalli sihke gielddaráđđehussii ja gielddastivrii.

Ohcejoga gielddastivra čoahkkana odne mánnodaga diibmu 13.00. Čoahkkimis gieđahallet maiddái earret eará Gáregasnjárgga máŋggadoaimmadálu huksema áradeami.

Ohcejoga gielddastivrra čoahkkima áššelisttu gávnnat dáppe.

Ohcejogas Lappi viššaleamos jienasteaddjit

Sámi guovllu gieldda ássiin badjel 2 200 jietnavuoiggalačča leat fitnan jienasteame euroválggain. Olles Lappis jienastanproseantta lea 13,6. Lappi gielddain viššaleamos jienasteaddjit leat Ohcejogas, gos gieldda jienastanproseantta lea 18,8.

Euroválggain sáhttá jienastit ovddalgihtii vel ihtin disdaga. Virggálaš válgabeaivi lea sotnabeaivve miessemánu 26. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä