Sápmi |

Oanehaččat: Suoma davimus čáhcefápmorusttega heaittiheami čielggadit Anáris, hirsabarta bulii Njellimis, Näkkäläjärvi euroválgakampánja badjel 60 000 euro ja sáhttet gieldit turisttaid doalvumis guoli eret Norggas

Dás leat duorastaga oanehis ođđasat.

Kirakkakönkään vesivoimala Inarissa. Vesi johdetaan putkia pitkin kahteen turbiiniin ja taustalla näkyvään Ukonjärveen, joka on osa Inarinjärveä.
Kievŋiskuoškâ čáhcefápmorusttet Anáris. Govva: Uula Kuvaja / Yle

Suoma davimus čáhcefápmorusttega heaittiheami čielggadit Anáris

Suoma davimus čáhcefápmorusttega heaittiheami čielggadit Anáris. Gielddahoavdda mielde Kievŋiskuoškâ (su. Kirakkaköngäs) boares fápmorusttega heaittiheami guottihit ekonomalaš sivat ja Anárjávrri johtti guliid eallindili buorideapmi.

– Dál duođalaččat guorahallat, jos čáhcefápmorusttegis sáhtašii luohpat ja máhcahit guliid lunddolaš oktavuođa Äijihjävri bealde duohko Rahajávrri beallái, dadjá Anára gielddahoavda Toni K. Laine.

Maiddái energiijafitnodaga Inergia Oy hoavda Timo Jokinen mielde čáhcefápmorusttega heaittiheapmi sáhtašii leat dál ruđalaččat ja birrasa ektui buot jierpmáleamos. Son ii oainne áššis negatiiva beliid ja atná buorrin ságastallat ja čielggadit ášši.

Hirsabarta bulii Njellimis

Hirsabarta bulii Anára Njellimis ikte gaskavahkkoeahkeda.

Olbmot eai vaháguvvan buollimis, muhto barta bulii ollásit. Gádjunlágádusa mielde buollin álggii dollasajis ja olii gitta gáhttui.

Bartta ássit ledje geahččalan čáskadit buollima, muhto eai nákcen dan dahkat. Gádjunveahka šattai gaikut gáhtu, vai sáhtii čáskadit buollima.

Diehtu buollimis bođii eahkedis logi áigge.

Näkkäläjärvi euroválgakampánja badjel 60 000 euro

Suoma sosiálademokráhtalaš bellodaga lappilaš euroválgaevttohas Mikkel Näkkäläjärvi ii geavahan euroválggaide ollenge iežas ruđaid. Näkkäläjärvi almmuha iežas válgakampánja leamaš badjelaš 66 000 euro. Stuorámus oassi evttohasa válgaruđain bođii ámmátovddastusain dahje daid lahka leahkki oassebeliin.

Dat boahtá ovdan evttohasa válgaruhtadanalmmuhusas, mii lea guđđojuvvon mannan sotnabeaivve Stáhtaekonomiija dárkkistandoaimmahahkii.

Näkkäläjärvi lea áidna lappilaš euroválgaevttohas, guhte dagai válgaruhtadanalmmuhusa. Son ii válljejuvvon Eurohpa parlamentii, muhto beasai nubbin várreovddasteaddjin. Näkkäläjärvi oaččui euroválggain 10 761 jiena. Son čokkii eanemus jienaid lappilaš evttohasain.

Sáhttet gieldit turisttaid doalvumis guoli eret Norggas

Norgga ráđđehus sáhttá dohkkehit turistaguolástangildosa, muitala NRK Sápmi.

– Dál soaitá leat áigi digaštallat dan, dadjá stáhtačálli Roy Angelvik.

Guolástusdirektoráhtta dadjá, ahte soaitá šaddat vejolaš, ahte turisttaid gieldit váldimis mielde guoli eret Norggas.

Oalle aiddo divrrui sáhkku das, jos váldá beare olu guoli mielde Norggas. Goittotge bissehit ain eanet turisttaid, geat váldet badjelmeare guoli mielde olggos Norggas.

Varrasamosat: Sápmi

Váldoođđasat

Varrasamosat

Muualla Yle.fi:ssä