Sápmi |

Oanehaččat: Ulla Pirttijärvi-Länsmanii golmma jagi veahkkeruhta, Luossariemut lávvardaga, Ijahis Idja -festivála ovdabileahtaid vuovdin álgá, 100-jagi ávvudoalut Deanušalddis ja vel áigi ohcat sámi giellastrategiijabargin

Dás leat vahku maŋimuš oanehis ođđasat.

Ulla Pirttijärvi-Länsman
Ulla Pirttijärvi-Länsmanii juolluduvvui golmma jagi dáiddárveahkkeruhta. Govva: Privahtta

Ulla Pirttijärvii golmma jagi veahkkeruhta

Dáidaga ovddidanguovddáža dáiddadoaibmagottit leat juohkán jagi 2020 dáiddárveahkkeruđaid.

Dáidaga ovddidanguovddáža musihkkadoaibmagoddi juolludii ohcejohkalaš juoigi Ulla Pirttijärvi-Länsmanii golmma jagi veahkkeruđa.

Girjjálašvuođa doaibmagoddi juolludii ohcejohkalaš girječálli Niillas Holmbergii ovtta jagi girjjálašvuođa veahkkeruđa.

Mannan vahkus muitaleimmet, ahte Outi Pieskii lea juolluduvvon viđa jagi veahkkeruhta.

Buot veahkkeruđaid oažžuid gávnnat dáppe.

Luossariemut lávvardaga

Luossariemut-dáhpáhus ordnejuvvo ihttin lávvardaga 6.7. Busteldearpmis, Ohcejogas. Luossariemut ordnejuvvojit dál 38. geardde.

Luossagilvu álgá ihttin dii. 12.00 Suoma áiggis ja nohká dii. 18:00. Váldovuoitun luossagilvvus lea Deanu fanas. Dán jagi soaitá geavvat nu, ahte goddo luossariemuid viđátčuođát guolli. Buot dáid jagiid áigge luossariemuid áigge leat goddán 491 luosa.

Sámedikki Nuoraidráđđi ordne Luossariemuin nuoraid lávu, gos fállet nuoraide gáfe ja ságastallanvejolašvuođa.

Luossagilvvu lassin dáhpáhusbáikkis lea kantiidna ja gieddegilvvut mánáide.

Lassedieđuid Luossariemuid birra gávnnat Utsjoen Eränkävijät rs neahttasiidduin.

Ijahis Idja -festivála ovdabileahtaid vuovdin álgá

Ijahis idja -festivála ovdabileahtaid vuovdin álgá odne bearjadaga 5.7. Bileahtaid sáhttá oastit ovddalgihtii Sámekulturguovddáš Sajosa infos Anáris ja Ticketmaster neahttasiidduin ja doaibmasajiin sihke Sajosa infos.

Dáhpáhussii vuvdet sihke vahkkoloahpa festiválapássaid ja beaivebileahtaid sihke bearjadahkii ja lávvardahkii.

Vuollel 7-jahkásaš mánát besset nuvttá sisa.

Ijahis Idja ordnejuvvo Anáris 16.-17.8.2019.

100-jagi ávvudoalut Deanušalddis

Deanušalddis ja Buolbmága museas ordnejuvvo odne 5.7. 100-jagi ávvudoalut sámiid vuosttaš riikačoahkkima gudnin. Vuosttaš sámepolitihkalaš riikkačoahkkin ordnejuvvui Deanus jagis 1919. Dan lassin ávvudit álgoálbmotgiellajagi ja 2019 luossajagi.

Ávvudoaluid prográmmas leat earet eará Deanuinstituhta seminára, mánáid giellabeassi, ságastallan ja girjealmmuheapmi, ja eahkedis vel konsearta, mas loaiddasteamen leat earet eará Deatnogátte Nuorat.

Vel áigi ohcat sámi giellastrategiijabargin

Anára gielda ohcá sámi giellastrategiija hábmemii mearreáigásaš prošeaktabargi. Bargu bistá 12.8.-12.12.2019.

Strategiijas sáhttit váldit vuhtii maiddái eará gielaid.

Bargun lea oassálastit Eanodaga, Anára, Soađegili ja Ohcejoga gielddaid sihke Sámedikki ja Sámi oahpahusguovddáža oktasaš giellastrategiijabargui ja hábmet gieldaguovdasaš giellastrategiijaid ovttasbarggus gielddaiguin. Bargoaddin doaibmá Anára gielda. Barggu lea vejolaš bargat oassái gáiddusbargun nu, ahte oassálastá lagaščoahkkimiidda.

Gelbbolašvuođagáibádussan lea bargui heivvolaš allaskuvladutkkus dahje vástideaddji árat oahpahatdási dutkkus. Bargu gáibida dovdamuša sámegielas ja kultuvrras sihke prošeaktabarggus. B-luohká vuodjinkoarta lea barggu dikšumis vealtameahttun.

Ohcamušaid oahppo- ja bargoduođaštusaiguin sáhttá doaimmahit 8.7.2019 diibmu 15.00 rádjái dáppe.

Lasihuvvon 5.7.2019 14.23 Ođas veahkkeruđaid oažžuin ja ođđa váldogovva.

Varrasamosat: Sápmi

Váldoođđasat

Varrasamosat

Muualla Yle.fi:ssä