Sápmi |

Oanehaččat: Válggaid sirdinmearrádusas issoras hoahppu, boazoparlameanta álgá, Leivoi bálkkašupmi

Loga dás duorastatiđiđa ođđasiid oanehaččat.

Sámedikke áirrasat
Joatkašuvvágo sin bargu vel ovtta jagi? Govva: Vesa Toppari / Yle

Guldal dás radioođđasiid. Jietna: Yle Areena

Válggaid sirdimis issoras hoahppu

Juos sámediggeválggaid sirdin ovddusguvlui obalohkái lihkostuvvá, áššis juohke dáhpáhusas šaddá issoras hoahppu. Sámedikke ovddasteaddjit leat gaskavahku deaivvadan riekteministeriija virgeolbmuiguin ja ráđđádallan dán áššis. Otne duorastaga dat fas lágida gullandilálašvuođa, masa Sámediggi ja sámesearvvit leat bovdejuvvon.

Riikkabeaivvit galggašedje juo dán giđđabaji áigge dohkkehit sámediggeválggaid sirdima ja čoahkkinbadji bistá dušše luomuid rádjái. Čoahkkinbadji nohká dán mánu 28. beaivvi.

Jearaldagas lea láhkanuppástus, man mielde Suopma galggašii árvvoštallat ođđasit sámediggelága goalmmát paragráfa, mii sisttisdoallá earret eará sápmelašmeroštallama.

Boazoparlameanta álgá

Roavvenjárggas álgá otne duorastaga árbevirolaš boazoparlameanta. Doppe šaddá ollu sáhka earret eará guohtoneatnamiid dilis. Giđđat olggosaddojuvvon čielggademiid mielde ovdamearkan sámebálgosiin muhtin guovlluin guohtundilli lea fuotnánan, muhto muhtimiin fas buorránan.

Buoremus dilli lea dain, main leat sierra dálve- ja geasseguohtuneatnamat. Guohtundilis leat vuordimis máŋga áššedovdilogaldallama, ovdamearkan sierradutki Jouko Kumpula Luondduriggodagaid dutkanguovddážis Lukes ja Sanna Hast Lappi universiteahtas.

Maiddái boazologuid gieđahalli bargojoavkku ságajođiheaddji Tapani Sirviö eanan- ja vuovdedoalloministeriijas lea jienas nugo maid kansliijahoavda Jaana Husu-Kallio.

Eija Leivoi bálkkašupmi

Anára gieldda girjerádjodoaimmajođiheaddji Eija Leivo lea ožžon Suoma girjerádjosearvvi bálkkašumi. Suoma girjerádjosearvi lea juolludan Mikko Mäkelä -bálkkašumi Anára gieldda girjerádjodoaimmajođiheaddji Eija Leivoi. Leivo lea ovdánahttán girjerádjosa báikkálaččat, guovllu dásis ja riikkaviidosaččat njealji jahkelogi áigge.

Okta su barggu bohtosiin lea njálmmálaš jietnabáddearkiiva Tarinoiden Inari. Bálkkašupmi lea geigejuvvon riikkaviidosaš girjerádjobeivviin Helssega Kulturviesus ikte gaskavahku.

Mikko Mäkelä -bálkkašupmi juhkkojuvvo dovddastussan girjerádjosuorggis dahkkon guhkesáigásaš dahje muđui ánssolaš barggus, mii dávjá báhcá fuomáškeahttá.

Varrasamosat: Sápmi

Váldoođđasat

Varrasamosat

Muualla Yle.fi:ssä