Sápmi |

Oanehaččat: Vars álggahan Sámi allaskuvlla rektorin, kursa sámegiela lohkama ja čállima oahppamis, árabajásgessiid skuvlejit Anáris ja bargguhisvuohta geahppánan diimmáža ektui

Dás leat disdaga oanehis ođđasat.

Laila Susanne Vars 10.12.2018
Laila Susanne Vars lea álggahan Sámi allaskuvlla ođđa rektorin. Govva: Yle / Ville-Riiko Fofonoff

Vars álggahan Sámi allaskuvlla rektorin

Laila Susanne Vars lea álggahan mánnodaga 19.8. virggálaččat Sámi Allaskuvlla ođđa rektorin. Rektoráigodat bistá njeallje jagi.

Mánnodaga lei rektormolsašupmi-seremoniija, mas Gunvor Guttorm guđii barggus skuvlla rektorin ja Vars válddii ođđa rektora bargguid vuostá. Guttorm barggai Sámi allaskuvlla rektorin jagi 2015 rájes.

Kursa sámegiela lohkama ja čállima oahppamis

Jyväskylä universitehta Lukiloki-fidnu ordne guovtti oahppočuoggá skuvlejumi sámegiela lohkama ja čállima oahpaheamis ja oahppamis. Skuvlen dáhpáhuvvá juogo neahttakursan dahje máŋggahápmásaš skuvlejupmin. Máŋggahápmásaš oahpuid lagašoahpahusbeaivi lea 12.10. Roavvenjárggas, muhto dasa sáhttá oassálastit maiddái gáiddusin.

Skuvlejumi skuvlejeaddjin leat doseanta Pigga Keskitalo Lappi universitehtas, professor Nils Øivind Helander Sámi allaskuvllas, lektor Ánte Mihkkal Gaup Sámi allaskuvllas, doavttir Rauni Äärelä-Vihriälä, doavttir Hanna Outakoski Upmi universitehtas ja lektor Ellen Pautamo Sámi oahpahusguovddážis.

Skuvlen lea oahpahusráđđehusa doarjagiin ordnejuvvon dievasmahttinskuvlejupmi.

Kursii sáhttá almmuhit iežas dáppe.

Árabajásgessiid skuvlejit Anáris

Árabajásgessiide, ovda- ja álgooahpahusa bargiide ordnejuvvo skuvlejupmi, man ulbmilin lea nannet mánáid dorvodáidduid ámmátolbmuid suvlejumi vehkiin. Seammás doarjut heađušteami, veahkaválddi ja givssideami vuostásaš barggu. Skuvlen ordnejuvvo Anáris ja Gihttelis.

Skuvlen lea 10 oahppočuoggá ja dat bistá čakčamánus 2019 gitta cuoŋománnui 2020. Skuvlejupmi sisttisdoallá vihtta lagašoahpahusgearddi, vánhemiideahkeda sihke iehčanas hárjehusaid.

Skuvlejupmái čáhket 50 vuosttažettiin iežas almmuhan ámmátolbmo. Almmuhit sáhttá 20.8. rádjái dáppe. Skuvlen lea oassálastiide nuvttá.

Skuvlejumi ollašuhttá Väestöliitto ja Oahpahusráđđehus.

Eanet dieđuid skuvlejumi birra gávnnat dáppe.

Bargguhisvuohta geahppánan diimmáža ektui

Lappis ledje suoidnemánu loahpas 9 965 bargguhis bargoohcci, mii lea 690 uhcit go diibmá seamma áigge. Lappi bargofámus 12,2 proseantta ledje bargguheapmin, muitala Lappi EBI-guovddáš. Buoremus bargodilli Lappi guovllus lea Ohcejogas ja heajumus Savukoskis.

Bargguhisvuohta geahppánii Lappi buot guovlogottiin. Bargguhisvuođa gaskamearalaš guhkkodat lea otnon ja guhkesáiggi bargguhis olbmuid mearri geahppánii meastta viđádasain.

Lappis ledje mannan mánu loahpas lagabui 4 330 rabas bargobáikki, dat lea viđádas eanet go diibmá.

Varrasamosat: Sápmi

Váldoođđasat

Varrasamosat

Muualla Yle.fi:ssä