Sápmi |

Oanehaččat: Viiddes lavdnjejeakki buollin čáskaduvvon Soađegilis, Kela čohkken dieđuid iešguđege sámegillii Kela ovdduid birra, Eanodagas gažadeapmi vistedilis ja Golledoidima SM-gilvvut Tankavaaras

Dás leat gaskavahku oanehis ođđasat.

Turvesuo palaa Sodankylässä.
Lavdnjejeakki buollima dagahan suova áice Roavvenjárgga rájes. Govva: Jarno Sukuvaara / Reitti24 -valvontakone

Viiddes lavdnjejeakki buollin čáskaduvvon Soađegilis

Viiddis lavdnjejeakki buollin Soađegilis lea čáskaduvvon odne 31.7. áraiđida. Almmuhus buollimis bođii ikte 16.30 sulaid ja báikái sáddejedje máŋga gádjunlágádusa ovttadaga. Buollin leavai árvalusa mielde badjel logi hektára garra biekkaid dihte. Biegga maiddái váttásmahtii čáskadanbargguid. Gádjunlágádusa veahka vulggii báikki alde iđđes sulaid 3.30 áigge.

Soađegili buollin dagahii olu suova, mas dahke áiccuid Roavvenjárgga rájes.

Kela čohkken dieđuid iešguđege sámegillii Kela ovdduid birra

Álbmotealáhatlágádus Kela lea buoridišgoahtán sámegielat diehtojuohkima ja lea dál čohkken anáraš-, davvisáme- ja nuortalašgillii dieđuid fállojuvvon oahppodoarjagiid birra.

Sámegillii dieđuid gávdná earret eará das, mo vánhemiid dienas váikkuha iešguđege agis oahppi doarjagiidda, goas sáhttá ohcat ássandoarjaga ja goas oahppis dahje stuđeanttas lea riekti ohcat doarjaga skuvlamátkái. Siiddus leat maid čilgejuvvon rávesolbmuid skuvlendoarjaga birra.

Olles teavstta gávnnat davvisámegillii dáppe, anárašgillii dáppe ja nuortalašgillii dáppe.

Eanodaga gielddas vistegažadeapmi

Eanodaga gielda kárte Eanodaga gieldda guovllus doaibmi fitnodatdolliid, ássiid ja giddodagaid oamasteddjiid vistedili. Eanodaga gielddas lea jođus gažadeapmi, mainna čielggadit visttiid dárbbu ja dan, mo olbmot háliidit oassálastit vistefidnuide Eanodagas.

Ožžojuvvon diehtu juhkkojuvvo hukseheddjiide ja visteinvestoriidda jagis 2019 ovddos guvlui. Dieđuid vuođul sáhttet váldit oktavuođa vástideddjiide ja evttohit ovttasbarggu.

Gažadeapmái sáhttá vástidit 31.8. rádjái dáppe.

Golledoidima SM-gilvvut Tankavaaras

Golledoidima suomameašttirgilvvut ordnejuvvojit Tankavaaras dán vahkkoloahpas, 2.-3.8.

Dáhpáhusbáikái lea nuvttá sisabeassan. Gilvoluohkáin leat oassálastinmávssut ja daidda sáhttá almmuhit ovddal gihtii dáhpáhusa neahttasiidduin dahje gilvobáikkis.

Maiddái golledoidima máilmmimeašttirgilvvut ordnejuvvojit dán jagi Tankavaaras. Golledoidima MM-gilvvut ordnejuvvojit dán jagi 5.-10.8.

Varrasamosat: Sápmi

Váldoođđasat

Varrasamosat

Muualla Yle.fi:ssä