Sápmi |

Oanehaččat: Vuoigatvuođaministtar deaivvadii Sámedikkiin, Verddebeaivvit álget, Poasttas streaika boahtte vahkus ja suopmelaš turisttaid mearri lassánan Lappis geassit

Dás leat vahku maŋimus oanehis ođđasat.

Anna-Maja Henriksson
Vuoigatvuođaministtar Anna-Maja Henriksson deaivvadii 29.8. Sámedikki ovddasteddjiiguin. Govva: Jouni Immonen / Yle

Vuoigatvuođaministtar deaivvadii Sámedikkiin

Vuoigatvuođaministtar Anna-Maja Henriksson deaivvadii duorastaga 29.8. Sámedikki ságadoalliiguin ja eará ovddasteaddjiiguin Helssegis. Stáhta bealis deaivvadeamis lei fárus maiddái stáhtačálli Raimo Luoma stáhtaráđi kansliijas. Deaivvadeami lei bivdán Sámediggi.

Deaivvadeamis ledje ovdan sámiid rivttiide gullevaš doaimmat ja ministtar gulai Sámedikki oainnuid dain. Deaivvadeamis lei sáhka maiddái sámediggelága ođasmahttima joatkimis dan vuođul maid virgeolbmot dássážii leat válmmaštallan.

Stáhtaráđi ja Sámedikki ovddasteaddjit ságastalle maiddái sámegielaid, kultuvrra ja árbevirolaš ealáhusaid ovddideamis, čállá riekteministeriija dieđáhusastis.

Verddebeaivvit álget

Eanodagas álget bearjadaga 30.8. Verddebeaivvit. Dán jagi prográmmas leat earret eará rabasuvssat gielddadálus, márkanat ja sirkusbargobájit. Verddebeaivvit bistet sotnabeaivvi 1.9. rádjái.

Verddebeivviid olles prográmma gávnnat dáppe.

Poasttas streaika boahtte vahkus

Poasttas lea streaika boahtte vahkus. Poasta- ja logistihkkasuorggi uniovdna PAU álggaha streaikka Poastta gieđahallan- ja sorterendoaimmain 2.9-4.9. Sivvan leat bálká vuolideamit ja bargoeavttuid nuppástuhttin.

PAU muitala dieđáhusastis, ahte bargit eai boađe bargovuoruide, mat álget sotnabeaivve 1. čakčamánu diibmu 22.00 maŋŋá. Bargui máhccat čakčamánu 5. beaivve diibmu 00:00 rájes.

Suopmelaš turisttaid mearri lassánan Lappis geassit

Lappis leat dán gease áigge johtán eambbo suopmelaš turisttat go ovdal, muitalit Statistihkkaguovddáža dieđut.

Lappi hoteallain ja eará idjadanbáikkiin idjadedje suoidnemánus measta vihtta proseantta eanet suopmelaččat go diibmá. Eanemus suopmelaš turisttat leat idjadan mannan mánus Roavenjárggas, Anáris ja Gihttelis.

Olgoriikalaš turisttaid mearri fas geahppánii suoidnemánus, idjadeamit ledje 10 proseantta unnit go ovddit jagi.

Varrasamosat: Sápmi

Váldoođđasat

Varrasamosat

Muualla Yle.fi:ssä