Sápmi |

Oanehaččat: Vuosttas minuhtas vuvde 2 500 lobi Detnui, Duohta ivnnit -radioprográmmii journalismabálkkašupmi, Wimme beassá dattetge loaiddastit Sippola girkus ja Sámediggi ohcá giellabeassejođiheaddji

Loga dás duorastaga oanehis ođđasiid.

Ruotsin saamenradion ohjelma Duohta ivnnit palkittiin Silversleven 2018 -palkinnolla.
Ruoŧa sámeradio Duohta ivnnit -prográmma fidnii Silversleven 2018 -bálkkašumi. Govva: Mattias Ahlm / Sveriges Radio

Dá gulat duorastaga Yle Ođđasiid Sámis. Jietna: Yle Areena

Vuosttas minuhta áigge vuvde 2 500 lobi Detnui

Stuorámus oassi Deanu turisttaide oaivvilduvvon stággobivdolobiin vuvdojuvvui moadde diimmus. Deanu bivdolohpegávpi rahpasii ikte gaskavahku logi áigge, ja vuosttas minuhta áigge vuvde 2 500 stággobivdolobi. Stuorámus oassi olgobáikegottálaččaide várrejuvvon dihtoearis lei vuvdon gaskabeaivvi rádjai. Dušše Vuovdeguoikka lohpeguvlui lobit leat ain valjit.

Turisttaid fanasbivdolobiid vuovdigohtet bearjadaga. Maiddái Norgga bivdolohpegávppis sáhttá oastit lobiid Detnui.

Duohta ivnnit -radioprográmmii journalismabálkkašupmi

Ruoŧa Sameradion & STV Sámi radioprográmma Duohta ivnnit oažžu Silversleven 2018 -journalismabálkkašumi. Almmustahttiid searvi (ruoŧagillii publicistklubben) Norra Norrland ákkastallá bálkkašumi juolludeami dainna, ahte lágideaddjiguoktá Merethe Kuhmunen ja Monica Andersson leaba dahkan dehálaš journalismma, mii váikkuha viidásutge go Sápmái.

Duohta ivnnit -radioprográmmas doaimmaheaddjiguoktá ságastallaba gussiineaskka Sámi tabu-fáttáid birra. Ruoŧagielat prográmmas leat gieđahallan earret eará seksuála- ja sohkabeallevehádagaid, seksa ja iešsoardinváttisvuođat Sámis.

Silversleven-bálkkašupmi lea juhkkojuvvon jagi 2015 rájes.

HS: Wimme beassá dattetge loaiddastit Sippola girkus

Sámemusihkar Wimme Saari verddiinis Tapani Rinnein beassaba dattetge loaiddastit Sippola girkus Kouvolas Mátta-Suomas. Helsingin Sanomat -aviisa muitala, ahte Anjalankoski girkohearrá Eija Murto mearridii áššis ođđasit maŋŋebárgga.

Mannan vahkuloahpas Kouvolan Sanomat -aviisa muitalii, ahte girkohearrá ii suova Wimme ja Rinne doallat konseartta Sippola girkus, danin go sudno musihkka ii heive oktii Ipmila sániin. Girkohearrá muitala dál, ahte searvegoddi lea ožžon lassidieđuid konseartta luđiid sisdoalus ja dál sii jáhkket, ahte luođit eai leat ruossalasvuođas Ipmila sániin. Girkohearrá Eija Murto čilge, ahte dán ášši galget vihkkehallat juohke girkokonseartta oasil sierra.

Wimme ja Rinne konsearta galgá leat oassi etnofuturisttalaš dáiddadáhpáhusas, mii lágiduvvo Kouvolas geassemánus.

Sámediggi ohcá mearreáigásaš giellabeassejođiheaddji

Sámediggi almmuha ohcanláhkai mearreáigásaš giellabeassejođiheaddji doaimma. Bargui gullet earret eará sámiid giellabeassedoaimma jođiheapmi, koordineren ja ovddideapmi, ja giellabesiid stáhtadoarjaga hálddašeapmái gullevaš barggut.

Bargu álgá geassemánu 3. beaivve dahje soahpamuša mielde ja bistá unnimustá dán jagi lohppii. Ohcanáigi nohká cuoŋománu 30. beaivve. Lassidieđuid gávdná Sámedikki neahttasiiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä