Sápmi |

Oarjjabeale bálgosiidda ordnejit virkkosmahttindeaivvademiid – nuorra boazobargi mielas suohtas go beassá humadit ja ovttastallat

Virkkosmahttinbeivviid ulbmilin lea, ahte nuorat besset oahpásmuvvat ja humadit gaskaneaset. Virkkosmahttinbeaivvi ordnejedje Muonás Harrinivas, gos boazobargit besse earet eará čierastit gummefatnasiiguin guoikka.

kuva nilla mahtte maggasta
Nilla-Máhtte Magga lei duhtavaš go beasai oaidnit oahpes olbmuid ja ovttastallat eará boazobargiiguin. Govva: Toni Heikkilä

Harriniva, Muoná Guoikka šávas eai leat turisttat luoitimin gummefatnasiiguin guoikka, muhto nuorra boazodoallit, geat leat čoahkkanan Muonái oktasaš virkkosmahttinbeaivái. Dál sis lea ulbmilin ovttas suohtastallat ja oahpásmuvvat nuppiidasaset.

Nilla-Máhtte Magga Neakkel bálgosis jurddaša, ahte dákkár deaivvadeamit leat buorit, go beassá oahpásmuvvat ođđa olbmuide ja deaivat maid oahppásiid.

Magga mielas ordnejuvvon dáhpáhusat ja aktiviteahtat leat leamaš suohttasat. Son lea oassálastán sávdnjeeahkedii ja dán guoikačierasteapmái.

– Dáhpáhusaide searvamis boahtá dakkár oktiigullevašvuohta, go lea juoga dahkámuš. Aktiviteahta bakte lea álki oahpásmuvvat olbmuide.

– Buorre dovdu bážii go serven dasa, Magga dadjá.

koskenlasku kuva
Nuorra boazoolbmot leat juste geargan čierastit guoika gummefatnasiiguin. Govva: Toni Heikkilä
Mánnan vahkuloahpas ordnejuvvon guoikačierasteapmái Harrinivas oassálaste 22 nuorra boazobargi. Čuovvovas háve nuoraide virkkosmahttinbeaivi lea dálvet. Dal čakčat boahtime deaivvadeapmi mánáide Levis.

Dán deaivvadeami ja earáge seammasullasaš doaimmaid ordne Duottar-Lappi bálgosat seamma gárddis -prošeakta.

Projeavtta jođiheaddji Emilia Yli-Suvanto muitala, ahte sii leat ordnen maid sávdnjeeahkediid boazoolbmuide. Doaimmaid bokte boazonuorat besset oahpásmuvvat gaskaneaset.

Yli-Suvanto lea ieš maid nuorra boazobargi ja vásiha, ahte lea dehálaš oažžut doarjaga ja muitalit iežas vásáhusaid birra. Das oažžu vuoimmi bargat bohccuiguin, go beassá hupmát ja muitalit somás ja váivves vásáhusain earáide.

– Dat lea dehálaš, ahte nuorra boazobargi dovdá eará nuoraid, geat barget bohccuiguin vai besset juohkit vásáhusaid ja ságastallat. Dat addá fámu.

kuva Emilia Yli-Suvanto
Prošeaktajođiheaddji Emilia Yli-Suvanto johtá maid gárddiin muitaleamen prošeavtta birra. Govva: Jaana Hangasvaara
Yli-Suvanto muitala, ahte čavčča bealde leat earáge deaivvadeamit boahtime boazoolbmuide. Dáhpáhusaid birra dieđihit prošeavtta iežas Facebook-siiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä