Sápmi

Ođđasamos dieđut koronavirusis: Norga čavge rádjegohcima – Ohcejoga rasttildanbáiki oalát giddejuvvon

Norja poistaa maanantaista lähtien matkustusrajoitukset Suomesta Norjaan.
Gilbbesjávrri rádjerasttildanbáiki lea áidna, mii lea birra jándora rabas. Govva: Timo Metsäjoki / Yle

Yle Sápmi beaiváda dán artihkkalii ođđasamos dieđuid koronavirusa dagahan dilis eandalit davvin.

  • Riskariikkain Supmii boahtti mátkkošteaddjiide ávžžuhit logi beaivvi karantena.
  • THL ávžžuha geavahit máskka olles riikkas. Máskkaid ávžžuhit geavahit joavkojohtolagas, logahagain ja eará nuppi dási oahppolágádusain. Dasa lassin máskkaid galggašii geavahit almmolaš sissajiin ja álbmotdilálašvuođain, gos lagaškontávttaid ii sáhte vealtit.
  • Lappi eanangottis 12.12. rájes restoráŋŋat galget heaitit alkohola vuovdima diibmu 22.00. Restoráŋŋa, gos alkohola vuovdin lea váldodoaibma, oažžu leat rabas gitta diibmu 23.00 rádjai ja geavahusas oažžu leat bealli áššehasbáikkiin. Eará restoráŋŋat ožžot leat rabas diibmu 01.00–24.00 ja geavahusas ožžot leat 75 proseantta áššehasbáikkiin.
  • Ávžžuhus gáiddusbargui joatkašuvvá doaisttážii.

Ođđasamos dieđut davviguovllu koronavirusdilis 5.1.2021 rájes

5.1. dii. 7.52 Norga čavge rádjegohcima

Norga lea čavgen Suoma rájá gohcima koronapandemiija dihte. Maŋŋebárgga rájes rádjárasttildanbáikkiid gohcet bolesiid lassin maiddái Finnmárkku siviilasuodjalusa soalddáhat.

Norgii manni olbmuin gáibidit koronatestii ohcaleame jándor siste go ollejit riikii.

Guđa Suoma ja Norgga rádjárasttildanbáikkis okta nappo Ohcejoga rasttildanbáiki lea oalát giddejuvvon. Áidna rávjárasttildanbáiki, mii lea birra jándora rabas lea Gilbbesjávrris, go doppe lea koronatestenbáiki.

Dát ráddjehus bistá guovvamánu álgui.

4.1. dii. 16.09 Lapin Kansa: Levis ja Roavvenjárggas leat soaitán gártat njoammunáitaga vuollái

Gihttela Levis fitne mannan vahkus olbmot, geain leat gávnnahan koronavirusnjoammuma. Lappi buohccedikšunbire bajit infekšuvdnadoavttir Markku Broas muitala Lapin Kansa -áviisii, ahte njoammunáitaga vuollái leat sáhttán gártat guovtti báikkis Levi guovllus.

– Juovlamánu 30. beaivve lea soaitán gártat njoammunáitaga vuollái Levi gondolarestoráŋŋas diibmu 13.30–14.30 gaskkas. Juovlamánu 31. beaivve lea soaitán gártat njoammunáitaga vuollái Hook-restroráŋŋas diibmu 17–19 gaskkas ja Bar Ihkus diibmu 19–22 gaskkas.

Maid Roavvenjárggas lea soaitán gártat njoammunáitaga vuollái juovlamánu 30. beaivve diibmu 13–15 gaskkas Ounasvaara čierastallanguovddáža restoráŋŋa Alpenjägeris.

Broas ávžžuha dáid báikkiin fitnan olbmuid čuovvut iežaset dili ja ohcalit koronatestemii, jus dávdamearkkat ilbmet.

Áššis muitala Lapin Kansa.

4.1. dii. 13.56 Epidemiijadilli lea vearráneamen Länsi-Pohjas – Lappis mannan vahkus badjel 40 ođđa njoammuma

Lappis leat gávnnahan ođđa koronavirusnjoammumiid. Mannan vahkus njoammumiid sihkkaraste oktiibuot 41, main Länsi-Pohja buohccedikšunbiires ledje 25 ja Lappi buohccedikšunbiires 16 njoammuma.

Ovdamearkka dihte Gihttela Levi njoammumiid gávnnahedje golmma olgobáikegottálaččas ja Roavvenjárggas njoammundáhpáhusat ledje njeallje, main buohkat ledje jo gárvvisin erremis.

Länsi-Pohjas epidemiijadilli lea vearráneamen ja doppe ávžžuhit garvit guossástallama ja galledemiid ruovttu olggobeallái čuovvovaš guovtti vahku áigge.

Lappi buohccedikšunbiires dilli lea goittotge ráfálaš.

– Njoammumiid álgu lea dieđus ja mii leat fáhten njoammunáitaga vuollái gártan olbmuid, dadjá Lappi buohccedikšunbiire bajit infekšuvdnadoavttir Markku Broas.

4.1.2021 dii. 11.43 Lappis álggahedje boahkuhemiid

Lappi guovllus álggahedje otne vuosttas koronavirusboahkuhemiid. Vuosttažin boahkuhit dearvvašvuođasuorggi kriittalamos bargguiguin bargi olbmuid nu buohcceviesuin, dearvvašvuođaguovddážiin go maiddái priváhta bealde.

Daidda gullet earret eará beavttálmahtton divššu ossodaga bargit ja koronačájánasaid váldit. Olles Lappi guovllus lea ulbmilin boahkuhit maiddái birrajandora dikšunossodagaid ássiid ođđajagimánu áigge.

Earáid boahkuhanáigetávval sihkkarastojuvvo maŋŋelabbos. Ulbmilin goittotge lea boahkuhit visot lappilaččaid ovdal geassemánu.

31.12.2020 dii. 15.54 NRK Sápmi: Norgii boahtti olbmuid geatnegahttet váldit koronateastta

Ođđajagimánu 2.1.2021 rájes leat olbmot geatnegahtton váldit koronaiskosa, go sii mátkkoštit olgoriikkas Norgii. Ná gáibida Norgga ráđđehus. Koronateastta galgá váldit maŋimusat jándora maŋŋel das go lea boahtán riikii. Sivvan lea dat go Norggas ballet njoammumiin, maid olbmot buktet olgoriikkas, dadjá Norgga stáhtaministtar Erna Solberg.

Áššis muitala NRK Sápmi.

31.12. dii. 14.50 Lappi buohccedikšunbiire guovllus njeallje ođđa koronanjoammuma

Lappi buohccedikšunbiire guovllus leat gávnnahuvvon njeallje ođđa koronanjoammuma.

Roavvenjárggas ođđa njoammumat leat golbma ja Gihttelis okta.

Länsi-Pohja buohccedikšunbiire guovllus ođđa koronanjoammumat leat gávnnahuvvon vihtta. Dán vahkus Länsi-Pohjas leat gávnnahan juo 18 ođđa koronadáhpáhusa.

31.12. dii. 7.10 Ohcejogas eai lasi koronanjoammumat

Ohcejoga ođđasamos koronavirusnjoammumaa laktaseaddji koronakarantenat leat nohkat eaige ođđa njoammumat leat gávnnahuvvon, dieđihit gieldda neahttasiiddus.

Gielddas muittuhit olbmuid čuovvut koronarávvagiid, ohcalit koronatestii jus veháge leat dávdamearkkat ja orrut karantenas dassái go teastabohtosat bohtet. Teasttat váldet juohke beaivve, maiddái basiid áigge, muittuhit gielddas.

30.12. dii. 13.50 Vuosttas koronaboahkuhanávdnasat leat ollen Lappi buohccedikšunbiirei

Vuosttas koronaboahkuhanávdnasat leat ollen Lappii. Boahkuheamit álggahuvvojit Lappi guovddášbuohcceviesus Roavvenjárggas vuossárgga ođđajagimánu 4. beaivve. Vuosttas boahkuheamit reahkkájit sullii 480 olbmui.

Vuosttasin boahkuheami ožžot bargit, geat dikšot infekšuvdnapasienttaid beavttálmahtton divššu ossodagas, dearvvasvuođadivššu gohcimis, akuhta ossodagain ja pasienttaid vuostáiváldimiin.

Lappi buohccedikšunbiire bajit infekšuvdnadoavttir Markku Broas muitala, ahte Posio, Salla, Gihttela ja Ohcejoga gielddat álggahit boahkuhemiid boahtte vahku duorastaga ođđajagimánu 7. beaivve. Loahppážiid maŋŋá nappo vahkus nummir 2 boahkuhemiid álggahit earáge Lappi gielddain.

Broas mielde koronaboahkut bohtet boahttevuođas eambbo vahkkosaččat.

Lappis leat gávnnahan čieža ođđa koronanjoammuma. Njeallje leat Länsi-Pohja buohccedikšunbiire guovllus, okta Roavvenjárggas, okta Pellos ja okta Sallas.

Ášši gávnnat suomagillii dáppe.

30.12. dii. 10.40 Anára gielddas olbmot sáhttán šaddat njoammunáitaga vuollái

Anára gielda dieđiha neahttasiiddustis, ahte olbmot leat sáhttán šaddat koronavirusa njoammunáitaga vuollái guovtti hoteallas. boradeami oktavuođas. Gielda ávžžuha olbmuid luđet telefovdnii Koronavilkku-áppa.

Avvilis Aurora Village

25.12.2020 dii. 10.30–11.15 ja dii. 20.00–20.30

26.12.2020 dii. 8.00–8.45 ja dii. 19.20–20.30

27.12.2020 dii. 10.30–11.15 ja dii. 12.00–14.00

Saariselkäs hotealla Star Arctic

25.12.2020 dii. 17.00-22.00

26.12.2020 dii. 12.00-14.00

30.12. dii. 8.26 Deanu gielddas okta koronanjoammun

Maŋŋebárgga 29.12. lea gávnnahuvvon koronanjoammun ovtta olbmos Deanu gielddas Norgga bealde. Son lea biddjon erremii ja lagaškontávttat leat kártejuvvon. Gávccis leat biddjon karantenai, muhto sis eai leat dávdamearkkat, muitalit Deanu gieldda neahttasiidduin.

29.12. dii. 16.38 Koronateasttaid mearri geahppánii goalmmádasain Lappis

Koronavirusteasttaid leat váldán Lappis čielgasit unnit juovllaid áigge.

Lappi ja Länsi-Pohja buohccedikšunbiirein válde mannan vahkus nappo vahkus 52 oktiibuot 2695 koronavirusteastta. Vahkus 51 teasttaid válde oktiibuot 4049. Teasttaid mearri geahppánii goalmmádasain.

Loguin leat mielde sihke almmolaš ja priváhta suorggi váldin teasttat.

Ovdamearkan Lappi buohccedikšunbiires mannan vahkus positiivvalaččat ledje 0,61 proseantta váldojuvvon teasttain nappo koronanjoammumat ledje oktiibuot 13. Dán vahkus Lappi buohccedikšunbiire ii leat raporteren ođđa koronanjoammumiin.

Ášši gávnnat suomagillii dáppe.

29.12. dii. 15.13 Badjel 50 olbmo dilálašvuođat gildojuvvon sámeguovllus ođđajagimánu loahpa radjái

Lappi guovlohálddahusdoaimmahat dieđiha, ahte dat joatká ođđajagimánu lohpii ráddjehusa, mii gieldá Lappi buohccedikšunbire gielddain buot badjel 50 olbmo albmotdilálašvuođaid ja čoahkkimiid nu olgun go siste.

Sissajiin ja ráddjejuvvon olgosajiin sáhttá goittotge ordnet albmotdilálašvuođaid ja almmolaš čoahkkimiid, maidda oassálastet eanemus 50 olbmo. Eaktun dakkár dilálašvuođaid ordnemii lea goittotge dat, ahte dain sáhttá sihkkarastit dorvvolašvuođa oahpahus- ja kulturministeriija ja Dearvvašvuođa ja buresveadjima lágádusa 21.9.2020 addán rávvagiid mielde.

Lappi guovlohálddahusdoaimmahaga mearrádus lea fámus 7.-31.1.2021. Dat guoská earret eará Anára, Eanodaga, Roavenjárgga, Soađegili ja Ohcejoga gielddaid.

29.12. dii. 13.15 Eanodaga gielda juohká koronabuhtadusa bargiide

Eanodaga gieldda váldostivra mearridii gieskat vuođđudit nu gohčoduvvon koronafoandda, man bokte áigot doarjut gieldda bargiid ruđalaččat.

Gieldda váldostivra mearridii juohkit gieldda bargiide 50 000 euro sturrosaš buhtadusaid korona dagahan badjelmearálaš bargguid dihte.

– Korona lea barggahan bargiid sihke fysalaččat ja vuoiŋŋalaččat. Buorre, ahte váldostivra jurddašii ollisvuođa ja mearridii, ahte dál 50 000 euro koronaruhta válmmaštallojuvvo vuđolaččat, dadjá gielddahoavda Jari Rantapelkonen.

Eanodaga gieldda dagai ovdal juovllaid muđuige historjjálaš bušeahta go jagi 2021 bušeahtas lea measta 8 miljovnna euro badjelbáza. Gieldda váldostivrra mielde bušeahtas oidno gieldda elrávdnjefitnodaga vuovdimis šaddan vuoitu.

29.12. dii. 12.40 Suomas 283 ođđa njoammuma

Suomas leat registreren maŋimuš jándora áigge 283 ođđa koronavirusdáhpáhusa, muitala Suoma dearvvasvuođa- ja buresveadjinlágádus THL.

THL goittotge muittuha, ahte juovlabasiid áigge olbmot leat válddihan uhcit teasttaid ja raporteremisge ádjána guhkit áigge. Guovlodásis dilli maiddái nuppástuvvá oppa áigge. Dál njoammumat leat lassáneamen Länsi-Pohja ja Ålándda buohccedikšunbiriid doaibmaguovlluin. Dan sadjái njoammumat leat geahppáneamen Varsinais-Suomi, Máttá-Savo, Vaasa ja HUS-guovlluin Uusimaas.

THL lea goittotge fuolas das, ahte mátkkošteapmái laktáseaddji njoammumat oidnogohtet easkka lagašbeivviid.

29.12. dii. 11.16 Norggas ođđa errennjuolggadusat

Norgga ráđđehus rievdada errenáiggi njuolggadusaid. Dál sáhtát beassat erremis jo čieža beaivvi maŋŋá go boađát Norgii, jus válddát guokte koronaiskosa ja guktot leat negatiivat. Dát rievdadus ii guoskka sin, geat bohtet Stuorra-Británnias.

Geavadat boahtá fápmui odne maŋŋebárgga 29.12. diibmu 8.00 Norgga áiggis.

Áššis muitala NRK Sápmi.

28.12. dii. 13.13 Lappis álget koronaboahkuheamit boahtte vahkus

Lappis koronaboahkuheamit álget dálá dieđuid miel boahtte vahkus. Lappi buohccedikšunbiire infekšuvdnadoavttir Markku Broas mielde boahkuheamit soitet álgit jo vuossárgga 4.1.

Lappi buohccedikšunbiires boahkuhanávdnasat reahkkájit álggos sullii 480 olbmui ja buohkat sis leat dearvvasvuođabargit. Broas ii vel máhte dárkilabbot muitalit, goas Lappii jovdet lasi boahkuhanávdnasat ja goas álget boahkuhit álbmoga.

Loga eambbo dáppe.

28.12. dii. 8.04 Koronaboahkuhusat álget otne miehtá Suoma

Suomas leat álggahan ikte sotnabeaivve koronaboahkuhusaid. Helssega ja Uusimaa buohccedikšunbiire bargit ledje vuosttasat geaid boahkuhedje korona vuostá. Otne boahkuhusat álget maid eará guovlluin Suomas.

Supmii bohte koronaboahkuhusat sullii 5 000 viđa duhát olbmuid nuppi juovlabeaivve. Dál álggos boahkuhit dearvvašvuođabargiid, geat dikšot koronabuohcciid, ja dan maŋŋá riskajoavkkuid.

Suoma dearvvasvuođa- ja buresbirgenlágádusas árvalit ahte viidábut koronaboahkuhusaid soitet beassat addit njukčamánus.

Loga áššis eanet suomagillii dáppe.

22.12. dii. 8.48 Norga geatnegahttá buohkaid Norgii boahtti olbmuid registreret iežaset

Norgga ráđđehus lea mánnodaga 21.12. dohkkehan nuppástusaid covid-19-ásahusaide. Ođđa mearrádusaid mielde buohkat geat bohtet Norgii, leat geatnegahtton registreret iežaset, vai njoammundávdda bastet gohcit buorebut.

Mearrádusat bohte fápmui ikte 21.12. dii. 12 Norgga áigge.

Juohkehaš gii manná Norgii, galgá registreret earet eará iežas nama, oktavuođadieđuid, karantenabáikki ja vejolaš bargoaddi. Registrerenskovi galgá printet ja doaimmahit rájá alde. Skovi gávnnat dáppe.

Mearrádus guoská maiddái Norgga riikavuložiid.

21.12. dii. 16.26 Gáregasnjárgga lihkadanhálla Njálla ja álšasále leat dál gitta

Ohcejoga gielda dieđiha, ahte Gáregasnjárgga almmolaš lihkadanbáikkit, lihkadanhálla Njálla ja álšasále, leat gitta 21.12.2020–10.1.2021. Sivvan dasa leat koronaráddjehusat. Lihkadanjoavkkut sáhttet ordnet olgun aktivitehtaid koronaráddjehusaid čuovvumiin. Gielda buhtada álšasále giddema boahtte jagi rehkegiin.

Ohcejoga gielddas sávvet, ahte olgobáikegottiin juovllaide boahtti olbmot eai geavat gieldda sislihkadanbáikkiid áigodagas 21.12.2020–10.1.2021.

Dieđáhusa gávnnat dáppe.

21.12. dii. 13.18 Ohcejogas okta ođđa koronanjoammun

Ohcejoga gielddas lea sotnabeaivve 20.12. gávnnahuvvon okta ođđa koronanjoammun. Ohcejoga gielda dieđiha, ahte njoammun gávdnui sosiála- ja dearvvasvuođafuolahusa bargis. Njoammunáitaga vuolde leat leamaš eanaš su asttuáigge kontávttat, muhto maiddái pasieanttat ja eará sode-bargit.

Njoammunáitaga vuollái leat gártan sullii 30 olbmo. Ohcejoga gieldda vástideaddji doavttir Heidi Eriksen muitala, ahte buot njoammunáitaga vuollái gártan olbmot leat fáhtejuvvon ja biddjon karantenii.

Njoammun laktása jáhkkimis gieldda árat njoammunbálgái.

Gielddas leat dál olu testen olbmuid ja eará njoammumat eai leat dán rádjái gávdnon, muhto gielddas testejit ain váljis olbmuid. Eriksen ávžžuhage olbmuid váldit koronateastta, jus leat veháge dávdamearkkat

21.12. dii. 7.46 Soađegilis okta ođđa njoammun, njealji bigálusas leat sáhttán gártat njoammunáitaga vuollái

Soađegilis gávnnahuvvui mannan vahku bearjadaga 18.12. okta ođđa koronanjoammun. Njoammunbálgá guorrama leat dahkan, ja njoammunáitaga vuollái leat gártán sulaid 20 olbmo. Njoammuma dihte njealji bigálussii oassálastán olbmuid bivdit dárkot iežaset dávdamearkkaid ja ohcalit teasttaide jos sis leat makkárge dávdamearkkat. Dát bigálusat ledje mannan vahkus Tanhuas, Kotasuvantos, Kersilös ja Kelujärvis.

Soađegili gielda deattuha ain, ahte buot addojuvvon dorvorávvagiid ja ávžžuhusaid galgá čuovvut dárkilit, vai virusa leavvama bastit eastit. Dan lassin lea earenoamáš dehálaš ohcalit koronatestii, jos leat vehášge dávdamearkkat.

15.12. dii. 16.15 Anára gieldda jođiheaddji doaktára dieđáhus galledemiin juovlabasiid áigge

Anára gieldda jođiheaddji doavttir Outi Liisanantti sávvá, ahte erenoamážit epidemiijadili vearránan- ja leavvanguovlluin boahtti oapmahaččat garvvášedje galledemiid Avvila dearvvašvuođaguovddáža seaŋgaossodagas dahje beavttálmahtton ássanbálvalusa ovttadagain. Seammás Liisanantti ávžžuha, ahte vuoras olbmuid eai válddáše guossái basiid áigái, go ruovttuin gaskkaid ja máskkaid doallan lea hástaleaddji. Seammás ávžžuhuvvo, ahte deaivvadeamit ordnejuvvojit dainna lágiin, ahte dain lea sohppojuvvon bargiiguin. Galledeaddjiid mearrin sávvet eanemusat guovttis golmma guossái ja galledeapmi oažžu bistit guhkimusat 30 minuhta.

Seammás Liisanantti ávžžuha, ahte Anára gielddas leat geavahusas oalle luohtehahtti ja jođánis koronavirusa antigenateasttat, maidda mátkkálaččat sáhttet ohcalit.

15.12. dii. 15.56 Soađegili gielda joatká dorvorávvagiid ja ávžžuhusaid 10.1.2021 rádjái

Soađegili gieldda njoammundávddain vástideaddji jođiheaddji doavttir Minna Jokinen lea addán ávžžuhusa joatkit báikegottis árat addojuvvon dorvorávvagiid ja ávžžuhusaid koronavirusepidemiija leavvama eastadeami dihte. Jođiheaddji doaktára ávžžuhusa mielde Soađegili gielda joatká ráddjehusaid ja doaibmabijuid koronaepidemiija eastadeami dihte 10.1.2021 rádjái.

Fámus lea máskaávžžuhus almmolaš sajiin, gos ii leat vejolaš doallat gaskka. Máskka ávžžuhit geavahit maid nuppi dási oahppolágádusain ja allaskuvllain.

Nana ávžžuhus garvit galledemiid sosiála- ja dearvvašvuođafuolahusa ovttadagaide. Lassin ávžžuhit garvit mátkkošteami guovlluide, gos koronadilli lea vearrát earret eará astoáiggedoaimmaid olis. Fámus lea maid ávžžuhus garvit borramuša ja juhkamuša fállama gieldda sajiin ordnejuvvon almmolaš dáhpáhusain.

Lassin Soađegilis galgá čuovvut buot almmolaš dorvvolašvuođa- ja hygieniijarávvagiid, Lappi buohccedikšunbire rávvagiid ja Lappi guovlohálddahusvirgedoaimmahaga mearrádusaid dáhpáhusaid ordnemis.

15.12. dii 11.54 Suoločielggis fas koronanjoammun mátkkálaččas

Anára gielddas Suoločielggis leat ikte vuossárgga gávnnahan koronvirusnjoammuma ovtta mátkkálaččas. Buot olbmot geat leat šaddan njoammunáitaga vuollái, leat gártejuvvon, dieđiha Anára jođiheaddji doavttir Outi Liisanantti.

Koronavirusii buohccán mátkkálaš lea fitnan borrame iđitbiepmu 12.12. Roavenjárgga Lapland Hotels Ounasvaara -hoteallas diibmu 9.00-10.00 ja son ii leat geavahan máska. Seamma mátkkálaš lea maiddái seamma beaivve áigge galledan Kiveliön kala -buvddas diibmu 15.00-15.30.

15.12. dii 7.31 HUS jođiheaddjibajimusdoavttir ávžžuha olbmuid ávvudit juovllaid ruovttus

Helssega ja Uusimaa buohccidikšunbiire (HUS) jođiheaddjibajimusdoavttir Markku Mäkijärvi ávžžuhii odne Yle jearahallamiis olbmuid ávvudit juovllaid ruovttus.

– Dorvvoleamos juovllat leat dál ruovttus unna birrasis, dadjá Mäkijärvi.

Dálá dilis Helssega ja Uusimaa koronadilli lea stáđis. Koronabuohccit leat buohcceviesuin birrasiid čuođis ja beavttálmahttojuvvon divššus logis. Njoammumiid mearri ii leat šat lassánan, muhto eai njoammumat leat vel geahppánange.

Mäkijärvi mielas olbmot eai váldde nu duođas galledan ávžžuhusaid go galggašii. Korona njoammu bearrašiid, fulkkiid ja ustibiid gaskkas. Mäkijärvi mielas vejolaš ráddjehusaid ferte vihkkehallat dárkket.

– Háliiditgo mii ráddjejuvvon giđa vai dakkár dili, mii mis lei álgočavččas, mii lei jo lahka normála eallima, jearrá Mäkijärvi.

14.12. dii. 11.06 Vahkuloahpa koronanjoammumat Lappis – Suoločielggis gávnnahuvvui koronanjoammun mátkkálaččas

Lappis leat gávnnahan máŋga koronavirusnjoammuma vahkuloahpa áigge. Lappi buohccedikšunbire guovllus girjejedje ovcci ođđa njoammuma ja Länsi-Pohjas guokte.

Njoammundáhpáhusain guokte gávnnahedje olgobáikegottálaš mátkkálaččain, main okta gávnnahuvvui Gihttela Levis ja okta Anára Suoločielggis.

Anára jođiheaddji doavttir Outi Liisanantti mielde Suoločielggi koronanjoammun lea gávnnahuvvon mátkkálaččas ja buot njoammunáitaga vuollái gártan olbmot leat gártejuvvon.

Roavvenjárggas gávnnahedje čieža ođđa njoammuma.

Lappi buohccedikšunbire bajit infekšuvdnadoavttir Markku Broas mielde lea fuolastuhtti, ahte eandalii Roavvenjárggas leat njoammundáhpáhusat, maid álggu eai dieđe. Máŋgga njoammundáhpáhusas njoammunbálggis álgá eará sajis, go Lappis.

11.12. dii. 14.53 Ohcejoga dearvvašvuođaguovddáža seaŋgaossodagas galledangielddus otná rájes

Ohcejoga gielda dieđiha, ahte Ohcejoga dearvvašvuođaguovddáža seaŋgaossodagas boahtá fápmui galledangielddus otne bearjadaga 11.12. rájes. Gielddus lea fámus doaisttážii.

Gielddus ii guoskka mieđuštandivssu pasienttaid galledeami. Dakkár galledemiin ferte soahpat ovddalgihtii seaŋgaossodaga divššáriiguin.

Dorvvus, Seitakartanos ja Aspa-ruoktu Goađis sáhttá gallestallat, jus čuovvu njoammuneastadeami várás addon rávvagiid. Pasieanttaid ožžot galledit 1–2 olbmo hávil. Galledeaddjis eai oaččo leat makkárge dávdamearkkat infekšuvnnas.

Galledeami áigge ferte fuolahit buorre giehtahygieniijas ja gaskkain, geavahit máskka ja čuovvut bargoveaga rávvagiid. Galledemiin galgá almmuhit ovddalgihtii telefovnnain rivttes ossodaga divššáriidda.

11.12. dii. 7.00 Sisministeriijas ođđa mearrádus: sápmelaččat sáhttet rasttildit ráji vaikko čuoiggá

Sápmelaččat ja rádjeservošii gullevaš olbmot sáhtet rasttildit Ruoŧa ja Norgga vuostásaš eatnanráji ja rádjejogaid earáge báikkiin go virggálaš rádjerasttildanbáikkiid bokte. Ná lea Suoma Sisministeriija mearridan.

Nuba ráji sáhttáge rasttildit ovdamearkka dihte mohtorgielkkáin, čuoiggá dahje vázzi.

Sisministeriijas muitalit, ahte sápmelaččaid oasil ii gáibiduvvo, ahte orru rádjeservošis.

Mearrádus boahtá fápmui vuossárgga 14.12.

10.12. dii. 15.01 Stáhtaráđđi mearridii: Alkohola vuovdin nohká Lappi restoráŋŋain diibmu 22 – sivvan logit duháhat mátkkálaččat

Alkohola vuovdin nohká Lappi restoráŋŋain diibmu 22.00. Stáhtaráđđi mearridii odne duorastaga čavget ásahusain olles Lappi eanangotti restoráŋŋaid ráddjehusaid. Alkohola vuovdin nohká guokte diimmu ovdal lávvardaga 12.12. rájes.

Stáhtaráđđi ákkastallá ráddjehusaid nu, ahte dáinna ráhkkanit juovllaid ja ođđa jagi mátkesesoŋŋii. Lappii vurdet juovllaid álgovahkus juoba 35 000 ruovtturiikka mátkkálačča, erenoamážit guovlluin, gos dávdadilli lea vearrát, go Lappis.

Alkohola vuovdin lea Lappi buot restoráŋŋain lobálaš diibmu 7.00–22.00 gaskkas. Restoráŋŋa, gos alkohola vuovdin lea váldodoaibma, oažžu leat rabas gitta diibmu 23.00 rádjai ja geavahusas oažžu leat bealli áššehasbáikkiin. Eará restoráŋŋat ožžot leat rabas diibmu 01.00–24.00 ja geavahusas ožžot leat 75 proseantta áššehasbáikkiin.

Áššehasbáikkiid, rahpanáiggiid ja alkohola vuovdima guoski ráddjehusat váldojuvvojit geavahussii olles Lappi eanangottis. Eanangoddái gullevaš Länsi-Pohja buohccidikšunbire guovllus epidemiija lea vearráneami dásis (su.kiihtymisvaihe), muhto Lappi buohccidikšunbire lea ain vuođđodásis.

Ráddjehusat leat fámus guovvamánu loahpa rádjai.

Dan lassin stáhtaráđđi lea mearridan, ahte rádjegohcima jotket vel badjel mánotbaji nappo 12.1.2021 rádjai.

Áššis suomagillii dáppe.

9.12. dii. 15.39 NRK: Buohkat, geat bohtet Norgii galget registreret iežaset digitálalažžan ođđajagimánu rájes

NRK mielde Norga čavge kontrolla rájá alde nu, ahte rájá rasttildeaddji ferte registreret iežas digitálalaččat vuogádahkii, ovdal boahtá Norgii. Dát guoská sihke Norgga stáhtaborgáriid ja earáid. Rájá rasttildeaddji oažžu koda, man son ferte čájehit Norgga rájá alde, ovdal son beassá Norgii, muitala guolástusministtar Odd Emil Ingebrigtsens NRK-áviisii.

Norgii boahtti olmmoš galgá registreret vuogádahkii dieđuid earret eará nama, oktavuođadieđuid, karantenabáikki ja dieđihit maiddái bargoaddái, go dát doaibmabidju boahtá fápmui ođđajagimánus.

Dat oaivvilda, ahte dát registreren veahkeha njoammunbálgáid guorrama, dadjá Ingebrigtsens. Su mielde sullasaš systema gávdno juo muhtin riikkain, ovdamearkka dihte Spánias.

Dálveguolástus davvin dagaha dán proseassa áigeguovdilin. Dálvesesoŋŋii vurdet stuorra meari guossebargiid nu, ahte dat lea buorre doaibmabidju, muitala guolástusminister NRK-áviisii.

Áššis muitalii NRK.

9.12. dii. 12.15 Norgga álbmotdearvvašvuođainstituhtas ođđa karantenaávžžuhusat Lappi ja Vaasa buohccidikšunbirein

Norgga álbmotdearvvašvuođainstituhta FHI ávžžuha, ahte Lappi buohccidikšunbires boahtti olbmot galggašedje karantenii boahtte lávvardaga 12.12. rájes. Seammás FHI ávžžuha, ahte Vaasa buohccidikšunbire šattašii fiskadin ja karantenaávžžuhus váldojuvvošii eret.

Lappi buohccidikšunbires njoammunlohku lea leamašan mannan ja ovddit vahkus 29,9 njoammundáhpáhusa 100 000 olbmo guovdu.

Vaasa buohccidikšunbires njommunlohku lea leamašan mannan ja ovddit vahkus 13,6 njoammundáhpáhusa 100 000 olbmo guovdu.

9.12. dii. 11.14 Lappi buohccidikšunbires leat váldán eanet koronateasttaid go ovdal

Lappi buohccedikšunbires leat váldán koronavirusteasttaid eambbo go ovdal.

Mannan vahku áigge váldojuvvojedje 3 200 teastta. Ovddit vahkuin teasttaid mearri lea lassánan sullii čuđiin dahje guvttiinčuđiin vahkus.

Lappi buohccidikšunbire infekšuvdnadoavttir Markku Broas mielde olbmot ohcalit teasttaide eanet, olles riikka hedjonan dávdadili dihte.

Maiddái jođánis teasttaid geavaheapmi lea lasihan testema.

Broasa mielde Lappis leat váldán dábalaččat eanemus koronateasttaid ássiidlogu guovdu.

8.12. dii. 14.32 Olgoriikalaš molssastudeanttaid mielde johte koronai buohccán olbmot Lappis mannan vahku – busset fitne Anáris ja bisánedje maid Roavvenjárggas

Lappis vudje mannan vahkus máŋga busse, man mielde johte olgoriikalaš molssastudeanttat. Busses leamašan olbmuin njealjis gávnnahuvvui mátkki maŋŋá koronavirusnjoammun. Sii leat sáhttán dagahit earáid njoammunáitaga vuollái.

Lappi buohccidikšunbire bajit infekšuvdnadoavttir Markku Broas mielde gažaldagas lei mátki Mátta-Suomas Lappii, mii ordnejuvvui molssastudeanttaide, geat studerejit Suomas. Sii johte Anára guovllus.

Broas muitala, ahte busset leat bisánan earret eará Roavvenjárggas Napapiiri Shell-bensenstášuvnnas gaskavahku 2.12. sullii diibmu 13–15 gaskkas. Olbmot, geat leat leamašan dalle bensenstášuvnnas, ávžžuhuvvojit ohcalit koronatestemii, jus dávdamearkkat ihtet.

Molssastudeanttat leat seamma joavku, man johtimis Suoločielggis Anár gielda dieđihii ikte vuossárgga.

8.12. dii. 9.11 Ohcejogas okta ođđa koronanjoammun, laktása árat njoammumiidda

Ohcejogas gávdnui ikte vuossárgga okta ođđa koronavirusnjoammun, gielda dieđiha. Njoammun lea nu gohčoduvvon joatkkanjoammun, mii laktása Ohcejoga árat njoammumiidda.

Dieđáhusa mielde olmmoš leamašan karantenas, iige leat njoammudan virusa ovddosguvlui.

7.12. dii. 16.38 Soađegili joavkoteasttain eai gávnnahan ođđa koronavirusnjoammumiid

Soađegili vuorrasiid beavttálmahtton ássanbálvalusovttadat Nutukas:is dahke lávvardaga 5.12. maŋimuš joavkoteasttaid koronavirusa dihte. Buot bohtosat ledje negatiivat nappo virus ii gávdnon.

Soađegili gieldda mielde Nutukas:is čorgejit čuovvovažžan vuđolaččat, man maŋŋá máhccet árgaritmii.

Maid Buresveadjinguovddáš Sopukka veaijuiduhttinossodat lea máhccan dábálaš dillái.

Soađegilis lea ain nana ávžžuhus garvit galledemiid sihke Sopukka ossodagaide ja sosiála- ja vuorrasiidbarggu ássanbálvalusovttadagaide.

7.12. dii. 14.33 Lappis leat gávnnahan vahkkoloahpa áigge 16 koronavirusnjoammuma – Anár gielddas okta njoammun

Lappis leat gávnnahan vahkkoloahpa áigge oktiibuot 16 koronavirusnjoammuma. Gávcci njoammuma leat gávnnahuvvon Länsi-Pohjas, čieža Roavvenjárggas ja okta Anár gielddas.

Lappi buohccidikšunbire bajit infekšuvdnadoavttir Markku Broas muitala, ahte Roavvenjárgga njoammumiin guokte leat olgoriikkas, guokte Oulus, okta Helssegis ja okta njoammun laktása mannan vahku njoammumii.

Anár gieldda koronanjoammun laktása Gihttela Levi Ihku-restoráŋŋa njoammunbálgái.

– Sáhka lea jáhkkimis nu gohčoduvvon joatkkanjoammumis nappo njoammuma ožžon olmmoš ii leat ieš fitnan Levis, lasiha Broas.

Levi restoráŋŋaide laktáseaddji njoammunbálgáin leat gávnnahan dán rádjai 20 koronavirusnjoammuma.

Lappi buohccidikšunbire muitala lassin koronavirusa ožžon olbmos, gii lea sáhttán dagahit earáid njoammunáitaga vuollái. Son lea galledan gaskavahku 2.12. Anára Suoločielggis Holiday Club Saariselkä lounges diibmu 10–14 ja seamma beaivve Anne´s Garden Grill & Cafes diibmu 14–15.

Buohccidikšunbire ávžžuha čuovvut dávdamearkkaid, jus lea galledan aitosaš báikkiin ja ohcalit kotonatestemii, jus ihtet veháge dávdamearkkat.

Anára gielda dieđihii odne vuossárgga koronavirusa ožžon turisttain, geat ledje johtán Suoločielggis 29.11.–2.12.

Ášši gávnnat suomagillii dáppe.

7.12. dii. 10.20 HUS almmuhan Anára gildii Suoločielggis johtán olbmuin, geain lea koronavirus

Anára gielda lea ožžon dieđu Helssega ja Uusimaa (HUS) buohccedikšunbires, ahte 29.11. – 2.12. leat Suoločielggis johtán olbmot, geain leamaš koronavirus.

Gielda ávžžuha buot guovllus bálvalansuorggis bargi olbmuid ohcalit uhcage váttuiguin koronavirustestii. Koronavirusa dábálaš dávdamearkkat leat earret eará gosahat, oaivebávččas ja deahkkebákčasat.

Gielda dieđiha áššis maŋŋelabbos, jus dat oažžu áššis dahje olbmuid johtimis dárkilut dieđuid.

4.12. dii. 16.48 Lappis bivdda ráđđehussii – alkohola vuovdin ferte nohkat restoráŋŋas diibmu 22

Lappis restoráŋŋaid alkohola vuovdin nohká diibmu 22.00, jus Lappi buohccidikšunbire koronakoordinašuvdnajoavkku evttohusa dohkkehit stáhtaráđis. Alkohola vuovdin nogašii guokte diimmu árat dáláža ektui.

Koordinašuvdnajoavku mearridii odne bearjadaga evttohit alkohola vuovdima áradeami. Seamma lea evttohan Lappi mátkeealáhusa lihttu jo árat dán vahkus.

– Mátkeealáhusa lihtu evttohus lea buorre. Dáinna lágiin virusa leavvama riskkat geahppánivčče. Orru leamen nu, ahte restoráŋŋat eai mieđa dása eaktodáhtolaččat, dadjá koordinašuvdnajoavkku ságadoalli ja Lappi buohccidikšunbire bajit jođiheaddji doavttir Jukka Mattila.

Mattila sávvá stáhtaráđi mearridit áššis buriin áiggiin ovdal juovllaid.

Ášši gávnnat suomagillii dáppe.

4.12. dii. 14.48 Lappi guvlui juovllaide boahtti olbmuide almmustahtte koronarávvagiid – davás vurdet juoba 35 000 guossi máddin

Lappi buohccidikšunbire lea almmustahttán Lappii boahtti ruovtturiikka mátkkošteaddjiide rávvagiid. Rávvagat leat oaivvilduvvon koronadili vearránan ja leavvanguovlluin boahtti olbmuide.

Rávvagiin čuožžu, ahte ferte vihkkedallat fuolalaččat, leago mátki vealtameahttun. Rávvagiin muittuhit geavahit máskka almmolaš johtolagas ja dakkár báikkiin siste, gos gaskkaid ii sáhte doallat. Moadde vahku ovdal Lappi mátkki berre garvit diliid, main sáhttá gártat njoammunáitaga vuollái. Lappii berre boahtit dušše dearvvašin, go eai leat makkárge dávdamearkkat.

Rávvagiid ráhkadedje dan dihte, go Lappii vurdet boahtit olu olbmuid juovllaid áigge miehtá riikka.

Juovllaid álgovahkus loahppážiid rádjai vurdet sullii 35 000 mátkkálačča Lappii. Stuorámus oassi sis lea mannamin čierastallanguovddážiide, muhto maiddái Roavvenjárgii vurdet mearkkašahtti meari olbmuid. Lappi buohccidikšunbire bajit jođiheaddji doavttir Jukka Mattila mielde máddin bohtet garvemeahttumit maid dakkár olbmot, geat lebbejit njoammuma dieđekeahttá.

Áššis suomagillii dáppe.

4.12. dii. 18.08 Ohcejoga gielddas leat gávnnahan odne ođđa koronanjoammuma

Ohcejoga gielda dieđiha, ahte Ohcejogas lea gávnnahuvvon odne bearjadaga 4.12. okta ođđa koronavirusnjoammun.

Ikte duorastaga 3.12. gávnnahedje maiddái guokte positiiva koronanjoammuma jođánis koronateasttain, mat leat dál sihkkarastojuvvon positiivan.

Ohcejoga gieldda vástideaddji doavttir Heidi Eriksen mielde ievttá njoammumiin nubbi lea olgobáikegottálaš olbmos.

– Dát laktásit mannan vahku njoammumii. Ikte gávdnon guovtti njoammumis, mat testejuvvojedje Ohcejogas, nubbi lea olgobáikegottálaš ja son lea Anár gieldalaš.

Buohkat leat leamašan erremis ja ođđa njoammunáitaga vuollái gártamat eai leat boahtán Eriksen mielde.

4.12. dii. 11.32 Guokte ođđa koronadáhpáhusa Lappis – goabbáge dáhpáhus laktása Levi restoráŋŋaide

Lappis leat gávnnahan guokte ođđa koronavirusnjoammuma, nubbi njoammun lea Roavvenjárggas ja nubbi Ohcejogas. Goabbáge laktása Gihttela Levi Bar Ihku -restoráŋŋa njoammunbálgái, muitalit Lappi buohccidikšunbires.

Lappi buohccidikšunbire bajit infekšuvdnadoavttir Markku Broas mielde maŋimuš áiggiid gávnnahuvvon njoammumat leat nu gohčoduvvon joatkkanjoammumat nappo dát olbmot eai leat ieža leamašan restoráŋŋas, muhto sii leat gártan njoammunáitga vuollái ja ožžon njoammuma olbmos, guhte lea leamašan restoráŋŋas.

Duorastaga bohte dihtui seamma njoammunbálgái laktáseaddji dáhpáhusat Anáris ja Ohcejogas. Levi máilmmicup-vahkkoloahpa eahketdoaluide laktáseaddji koronanjoammumat leat dál dieđus oktiibuot 19.

Áššis suomagillii dáppe.

4.12.2020 dii. 8.05 Anára gielddas guokte ođđa njoammuma

Anára gielddas leat duorastaga gávnnahan guokte ođđa koronavirusnjoammuma. Nubbi njoammumiin laktása jo árabut gávnnahuvvon, Levis vuolgán njoammunbálgái, eaige dáhpáhussii laktás ođđa olbmot, geat livčče gártán njoammunáitaga vuollái.

Nubbi njoammun laktása Suoločielggi guovllu turismii. Suoločielggi turismii laktáseaddji njoammumis njoammunáitaga vuollái leat gártán máŋggat olbmot, geain stuorámus oasi leat jo kárten ja mearridan karantenii. Čielggadeami vuolde lea ain muhtin galledeamit restoráŋŋas.

Anára gieldda jođiheaddji doavttir Outi Liisanantti sávvá, ahte olbmot ohcalit dalán teasttaide, jos sis leat muhtin dávdamearkkat.

Liisanantti muittuha, ahte lea dehálaš geavahit máskka ja doallat dorvogaskkaid, ja son maid ávžžuha garvit badjelmearálaš čoahkkanemiid ja lagaš kontávttaid.

– Uhkkin lea, ahte Suoločielggi ja olles Anára juovllaid doallan gártá vára vuollái, jos njoammunbálgát bohtet eanet, čállá Liisanantti Anára gieldda dieđáhusas.

3.12.2020 dii. 16.10 Lappi buohccidikšunbire guovllu čoahkkananráddjehusat

Lappi guovlohálddahusdoaimmahat AVI gieldá Lappi buohccidikšunbire gielddaid guovllus siste ja olgun ordnejuvvon almmolaš dilálalašvuođaid ja čoahkkimiid, maidda oassálastet badjel 50 olbmo.

Badjel 50 olbmo dáhpáhusaid lea vejolaš ordnet daid eavttuiguin, ahte dain čuvvot ministeriija ja Suoma Dearvvašvuođa ja buresveadjima lágádus THL rávvagiid.

Ráddjehusat leat fámus 7.12.2020-6.1.2021. Ráddjehusat gusket Eanodaga, Anára, Gihttela, Giemajávrri, Kolari, Muoná, Pelkosenniemi, Pello, Posio, Ranua, Roavvenjárgga, Salla, Suovvaguoikka, Soađegili ja Ohcejoga gielddaid.

Koronavirusdilli lea vuođđodásis Lappi buohccidikšunbires.

Áššis eanet suomagillii dáppe.

3.12. dii. 13.58 Ođđa koronanjoammumat Anáris, Ohcejogas ja Soađegilis

Lappis leat gávnnahan ođđa koronavirusnjoammumiid.

Soađegilis lea gávnnahuvvon okta ođđa koronanjoammun. Koronanjoammuma ožžon olmmoš lea olgobáikegottálaš ja njoammunáitaga vuolde leat vuollel logi olbmo.

Anára koronananjoammumiin leat guovttelágan dieđut. Anára gieldda jođiheaddji doavttir Outi Liisanantti mielde Anáris leat gávnnahuvvon dán rádjai golbma ođđa koronanjoammuma mannan vahku koronanjoammundáhpáhusa maŋŋá. Lappi buohccidikšunbire bajit infekšuvdnadoavttir Markku Broas mielde Anáris leat gávnnahan ovtta ođđa koronanjoammuma mannan vahku rájes.

Anáris mearridedje mannan vahkus vihttalot olbmo erremii, mii lea dál nohkamin. Anára koronanjoammundáhpáhusat laktásit Gihttela Levi máilmmicup-vahkkoloahpa njoammunbálgái. Anára gielda dieđiha áššis maŋŋá.

Ohcejoga gielda dieđiha, ahte Ohcejogas leat gávnnahan odne duorastaga 3.12. guokte ođđa koronavirusnjoammuma jođánis koronateasttain. Njoammuma ožžon olbmot leaba leamašan erremis, eabage soai leat njoammudan earáid.

2.12. dii. 16.28 Joavkoteasttain eai gávnnahan korona Soađegilis

Vuorrasiid beavttálmahtton ássanbálvalusovttadat Nutukas bargiid ja ássiid joavkoteasttain eai leat gávnnahan odne gaskavahku ođđa njoammumiid. Okta Nutukas ossodat ja dan bargit testejuvvojit vel lávvardaga 5.12., go maŋimuš erremat nohket.

Nutukas ássiid ja bargiid leat testehan máŋgii. Ovddit koronanjoammun gávnnahuvvui joavkoteasttas mannan vahku gaskavahku.

Maŋimuš njoammun báikegottis gávnnahuvvui bearjadaga 27.11.

Soađegilis leat gávnnahan koronaepidemiija áigge oktiibuot 59 koronanjoammuma.

2.12. dii 7.34 Lappi turismaorganisašuvnnat gáibidit čavagut ráddjehusaid restoráŋŋaid alkohola vuovdináiggiide

Levi eahketeallin ja doppe johtui vuolgán koronanjoammunbálgát leat ožžon Lappi turismaorganisašuvnnaid gáibidit čavgadut ráddjehusaid restoráŋŋaid alkohola vuovdináiggiide.

Organisašuvnnat gáibidit ahte alkohola vuovdima galgá heaitit guokte diimmu árabut go dál.

Lappi Turismasuorggi lihttu, Visit Rovaniemi, Visit Levi ja máŋga eará guovloorganisašuvnna ávžžuhit lappilaš restoráŋŋaid heaitit alkohola vuovdima jo diibmu 22, nugo dál gáibiduvvo dakkár guovlluin, gos koronavirus lea jođánis leavvama muttus.

Lappi buohccedikšunbire guovllus koronadilli lea vuođđodásis, nuba stáhtaráđi ásahus dohkkeha alkohola vuovdima gaskaija rádjái. Restoráŋŋat galget giddet uvssaideaset ihkku ovtta áigge.

1.12. dii 11.47 Eai ođđa koronanjoammumat Lappis

Lappis eai leat gávnnahan ođđa koronavirusnjoammumiid vuossárgga maŋŋá. Áššis muitalit Lappi ja Länsi-Pohja buohccidikšunbiret odne maŋŋebárgga.

Maŋimuš áiggiid ovttas dahje máŋggas njoammumis leat muitalan beaivválaččat.

Lappi buohccidikšunbire bajit infekšuvdnadoavttir Markku Broas dadjá, ahte dilli lea dál ráfálaš.

Levi máilmmicup-vahkkoloahpa gilvvuid eahketdoaluide laktáseaddji njoammumiin eará guovllus riikkas eai leat boahtán eanet dieđut Lappii. Broas mielde diehtu ii goittot vealttakeahttá jođe gitta Lappii, go dakkár geatnegasvuohta ii leat.

Levi restoráŋŋain ovddit vahkkoloahpa fitnan olbmuid gaskkas leat gávnnahan aŋkke 13 koronanjoammuma, main stuorámus oassi lea Lappis, muhto ovttaskas dáhpáhusat leat maiddái máddin Suomas.

30.11. dii. 15.56 Soađegilis eai ođđa njoammumat joavkoteasttain

Soađegili beavttálmahtton ássanbálvalusovttadat Nutukas bargiid ja ássiid joavkoteasttain eai leat gávnnahuvvon koronanjoammumat odne vuossárgga.

Maiddái koronai árat buohccán ássiid boađus lei maŋimuš joavkoteasttain negatiiva muitalit Soađegili gielddas.

Oassi Nutukas ássiin lea erremis vel dán vahku áigge, ja ovttadagas jotket ain beavttálmahtton njoammuneastadandoaimmaid.

Vahkuloahpa áigge Soađegilis eai gávnnahan ovttage ođđa koronanjoammuma. Maŋimuš njoammun lea gávnnahuvvon bearjadateahkeda 27.11. ja dat laktásii árat njoammunbálgái.

Soađegilis leat gávnnahan koronaepidemiija áigge oktiibuot 59 njoammuma. Báikegottis epidemiija lea vuođđodásis, dego eará guovllusge Lappi buohccidikšunbires.

30.11. dii. 14.55 Ođđa koronadáhpáhusat Lappis – Levi restoráŋŋain leavvan juo aŋkke 13 koronanjoammuma

Gihttela Levi máilmmicup-gilvovahkkoloahpa eahketdoaluid geažil leat gávnnahan ođđa koronanjoammumiid.

Levi Bar Ihkui laktáseaddji ođđa njoammumiid raporterejedje Lappis vuossárgga gávcci: vihtta Länsi-Pohja buohccidikšunbire guovllus, guokte Gihttelis ja okta Roavvenjárggas. Länsi-Pohja buohccidikšunbires eai muital, guđe gielddain njoammumat leat.

Maiddái Espoos lea gávdnon njoammun, mii laktása restoráŋŋa Ihkui. Levi restoráŋŋain vuolgán njoammumat leat gávnnahuvvon dán rádjai aŋkke 13.

Lappi buohccidikšunbire bajit infekšuvdnadoavttir Markku Broas mielde dát lea fuolastuhtti. Broas ávžžuha, ahte buohkat, geat leat leamašan ovddit vahkkoloahpa Narranis, Bar Ihkus ja Pub Hölmöläs mannet koronateasttaide, jus leat veháge dávdamearkkat. Dáid restoráŋŋaid bargiid ávžžuhedje mannat koronatestii mannan vahkus.

Gihttela Levis ledje olu olbmot čoahkkanan 19.–22.11. čierastallama máilmmicup-gilvvuid áigge.

30.11. dii. 12.32 Ođđa koronanjoammumat Lappis – Levi restoráŋŋain leavvan juo čieža koronanjoammuma

Lappis leat gávnnahan fas ođđa koronajoammundáhpáhusaid. Mannan bearjadaga maŋŋá ođđa njoammumat leat gávnnahuvvon čieža Lappi buohccidikšunbire guovllus.

Gihttela Levi restoráŋŋa Bar Ihkui laktáseaddji ođđa njoammumat leat golbma, main guokte leat Gihttelis ja okta Roavvenjárggas.

Lappi buohccidikšunbire bajit infekšuvdnadoavttir Markku Broas mielde dát lea fuolastuhtti. Broas ávžžuha, ahte buohkat, geat leat leamašan ovddit vahkkoloahpa Narranis, Bar Ihkus ja Pub Hölmöläs mannet koronateasttaide, jus leat veháge dávdamearkkat. Dáid restoráŋŋaid bargiid ávžžuhedje mannat koronatestii mannan vahkus.

Lassin leat sihkkarastojuvvon golbma ođđa njoammuma Roavvenjárggas, mat laktásit árat njoammunbálgái gávpogis ja okta dáhpáhus Gihttelis, mii ii laktás Levi restoráŋŋaide.

Ođđa njoammumiid gáldu lea Broas mielde dieđus nappo gažaldagas eai leat dovdameahttun njoammungáldut.

Broas lasiha, ahte epidemiija lea ođđa njoammumiin fuolakeahttá vuođđodásis Lappi buohccidikšunbires.

30.11. dii. 7.23 Ohcejoga ealáhusdoaibma addán fitnodagaide ávžžuhusaid áššehašdorvvolašvuođas

Ohcejoga ealáhusdoaibma lea addán fitnodagaide ávžžuhusaid áššehašdorvvolašvuođas.

Mannan vahkus Ohcejoga gielddas gávdnui koronajoammun, ja logemat olbmo gárte karantenii.

Dáhpáhusa oktavuođas lea boahtán ovdan, man váigat áššehasbálvalusa áššehasaide lea muitit dárkilit, galli áigge sii leat bálvalusaid geavahan, dieđiha Ohcejoga gielda.

Dan dihte ealáhusdoaimmas ávžžuhit fitnodagaid, main leat unnimustá 15 minuhtasaš áššiid dikšumat dahje áššehasbálvalandilit, mearkut doarvái dárkilit bajás áššehasaid oktavuođadieđuid ja galledemiid diibmoáiggiid.

Dieđuid galgá goittotge mearkut nu, ahte áššehas diehtá, man dárkkuhussii su dieđut geavahuvvojit ja man guhká dat seailluhuvvojit.

Dákkár doaibmavugiin lea vejolaš jođálmahttit ja álkidahttit vejolaš koronavirusinfekšuvnnaid njoammunbálgáid čielggadeami ja áššehasaid fáhtema dákkár dilis.

27.11. dii. 16.07 Ohcejoga gielda: njoammundáhpáhussii laktáseaddji olbmot čielggaduvvon – gielddas ávžžuhusat astoáiggedoaimmaide

Ohcejoga gielda dieđiha, ahte gielddas eai leat gávnnahuvvon ođđa koronavirusnjoammumat bearjadaiđida 27.11. rájes. Gielddas gávnnahuvvui ikte duorastaga 26.11. okta koronanjoammun, ja njoammunbálgá gártenbargu lea čađahuvvon dan rájes.

Ohcejoga gielda dieđihii ikte duorastaga, ahte Hotelli Utsjoki restoráŋŋas vuossárgga dahje maŋŋebárgga gaskabeaiáigge fitnan olbmot leat soaitán gártat njoammunáitaga vuollái. Dál lea čielgan, ahte dáhpáhusbáikái laktása okta njoammunáitta. Dearvvašvuođa fuolahus lea fáhten olbmo ja mearridan su erremii. Maiddái eará olbmot, geat leat soaitán šaddat njoammunáitaga vuollái dán koronanjoammuma dihte leat dál čielggaduvvon ja mearriduvvon erremii.

Koronavirusii buohccán olmmoš veadjá bures ja son lea dál erremis. Njoammun laktása Anára koronanjoammumii, mii lea jáhkkimis ožžon álggu Levi máilmmicup-gilvvuin mannan vahkuloahpa.

Ohcejoga gieldda vástideaddji doavttir Heidi Eriksen ávžžuha olbmuid váldit koronateastta, jus leat veháge dávdamearkkat. Eriksen muittuha maiddái máskaávžžuhusas.

Suoma iehčanasvuođabeaivve eai leat doalut ja gielda muittuha eará dilálašvuođaid ordnejeaddjiid čuovvut dárkilit rávvagiid njoammuneastadeami dihte. Gielda bivdá maid giddet erenoamážit fuomášumi, go fitná ovdamearkka dihte álšasáles. Gielda maid ávžžuha, ahte lihkadansáliid geavaheaddjit merkejit vuoruid oassálastiid girjái ja maiddái álšasále geavaheaddjit dahket dan seammá.

Ollislaš dieđáhusa gávnnat ja eanet dieđuid gávnnat dáppe.

27.11. dii. 14.03 Ledjetgo Levis dáid golmma olgobáikkis mannan vahkkoloahpa? Leat soaitán gártat njoammunáitaga vuollái

Koronanjoammuma ožžon olbmot leat fitnan mannan vahkkoloahpa golmma restoráŋŋas Gihttela Levis. Báikkit leat Hölmölä, Narran ja Ihku.

Lappi buohccidikšunbires muitalit, ahte njoammuma ožžon guokte olbmo finaiga Narranis bearjadaga skábmamánu 20. beaivve eahkes ja Hölmöläs lávvardaga eahkes 21. beaivve. Lassin okta njoammuma ožžon olmmoš lea leamašan Ihkus duorastaga eahkes skábmamánu 19. beaivve, bearjadaga eahkes 20. beaivve ja lávvardaga eahkes skábmamánu 21. beaivve. Dát njoammuma ožžon olbmot leat fitnan dáid olgobáikkiin sullii diibmu 21–24 gaskasaš áigge.

Dál Lappi buohccidikšunbires ávžžuhit, ahte buohkat geat leat fitnan dáid áiggiid olgobáikkiin mannet koronateasttaide, jus veháge dávdamearkkat ihtet.

– Mis leat dieđus golbma njoammuma, mat orošedje laktáseamen Levi eahketrestoráŋŋaide mannan vahkkoloahpa. Njoammuma ožžon olbmot leat Anáris, Ohcejogas ja Poris, muitala Lappi buohccidikšunbire bajit infekšuvdnadoavttir Markku Broas.

Levis ledje ollu olbmot mannan vahkkoloahpa. Čierastallama máilmmicup lassin čuoiganguovddážis ledje earret eará Aurinkomatkat mátkelaččat eará guovllus Suomas.

27.11. dii. 13.26 Soađegili joavkokoronateasttaid boađus: Eai ođđa koronanjoammumat

Soađegilis eai leat gávnnahan ođđa koronanjoammumiid. Vuorrasiid beavttálmahtton ássanovttadat Nutukas bargi ja ássit testejuvvojedje fas odne bearjadaga, ja buot teasttat ledje negatiivvat, muitalit gielddas.

Čuovvovaš Nutukas joavkotestemat leat boahtte vuossárgga.

Ovddit háve Nutukas joavkoteasttain gávdnui njoammun gaskavahku.

Soađegilis leat gávnnahan oktiibuot 58 koronanjoammuma. Mannan lávvardaga gielda muitalii, ahte vihtta koronanjoammuma ožžon Nutukas ássi leat jápmán.

27.11. dii. 11.48 Ođđa koronanjoammumat gávnnahuvvon Lappis – njoammundáhpáhusat Gihttelis, Roavvenjárggas ja Soađegilis

Lappi buohccidikšunbire guovllus leat sihkkarastojuvvon golbma ođđa koronavirusnjoammuma. Dat leat duođaštuvvon Gihttelis, Roavvenjárggas ja Soađegilis.

Lappi buohccidikšunbire bajit infekšuvdnadoavttir Markku Broas mielde Gihttela dáhpáhus laktása árat vahkkoloahpa gávnnahuvvon njoammunbálgái ja Soađegili njoammun lea báikegotti stuorra njoammunbálgái laktáseaddji dáhpáhus. Goabbáge daid olbmuin lea erremis. Roavvenjárgga njoammun lea Broas mielde vuolgán olgoriikkas.

27.11. dii 10.45 Lappi gielddat gáibidit, ahte njoammundávdaláhka galgá dahkat vejolažžan dorvvolaš mátkkošteami Lappii

Lappi gielddat ja Lappi lihttu leat addán cealkámuša njoammundávdaláhkii, man leat aiddo válmmaštallamen. Gielddat ja Lappi lihttu gáibidit, ahte riikkaidgaskasaš turismii dahkat čielga, testemii vuođđuduvvi doaibmanmálle, man mielde mátkkošteami Lappii sáhttit rahpat ráfálaččat ja dearvvašvuhtii dorvvolaččat.

Korona dearvvašvuođaváikkuhusaid lassin galgá váldit vuhtii ekonomalaš váikkuhusaid, celket Lappi gielddat ja Lappi lihttu.

– Mátkkoštanráddjehusain lea Suoma turismii hui negatiiva váikkuhus, eandalii Lappii, gos riikkaidgaskasaš turisma ossodat olles Lappi turismma gávpejođus lea sulaid 75 %.

Sii gáibidit, ahte láhkaevttohusa ja bargovugiid galgá dahkat oktageardánabbon ja láhkaevttohusas galgá dovddastuvvot THL, STM ja Lappi doibmiid ovttas dahkan dearvvašvuhtii dorvvolaš doaibmanmálle.

Testemii vuođđuduvvi mátkkošteami rahpamii galgá maiddái sihkkarastit doarvái resurssat

– Mátkkošteddjiid beaktilis testen rájirasttildanbáikkiin gáibida jođánis teasttaid atnuiváldima, doarvái bargoveaga ja eiseválddiid ovttasbarggu sihke dárbbašlaš resurssaid dáhkideami. Dán dilis gielddain eai leat doarvái resurssat mátkkošteddjiid testemii. Dan lassin galgá deahtistit Lappi, Ruoŧa ja Norgga rádjegielddaid ovttasbarggu ja ráhkkaneami pandemiija sullasaš kriissaide, celket Lappi gielddat ja Lappi lihttu.

26.11. dii. 17.04 Anára koronanjoammumii laktáseaddji olbmot leat dál gártejuvvon – muhtun Anára skuvlla oahppit laktásit njoammunbálgái

Anára gielddas lea gávnnahuvvon odne duorasta 26.11. okta koronavirusnjoammun.

Anára gieldda jođiheaddji doavttir Outi Liisanantti mielde njoammunbálgá guorran ja gártenbargu leat dahkkojuvvon. Njoammunbálggis álgá Levis. Maiddái oassi Anára skuvlla oahppiin laktása njoammunbálgái ja sii leat mearriduvvon erremii.

Liisanantti ávžžuha olbmuid geavahit máskka, go ii leat vejolaš doallat gaskka ja vihkkedallat dárkilit, leago dárbu mátkkoštit gielddaráji olggobeallái.

Eanet áššis dáppe.

26.11. dii. 14.10 Hotelli Utsjoki restoráŋŋas vuossárgga dahje maŋŋebárgga gaskabeaivvi áigge fitnan olbmot leat soaitán gártat koronanjoammunáitaga vuollái – ávžžuhit váldit oktavuođa dearvvašvuođaguovddážii

Ohcejoga gielda dieđiha, ahte vuossárgga 23.11. sullii dii. 11.30–12.00 ja maŋŋebárgga sullii dii. 11.50–12.30 gaskasaš áigge Hotelli Utsjoki restoráŋŋas fitnan olbmot leat soaitán gártat koronavirusa njoammunáitaga vuollái.

Olbmot, geat leat fitnan dáid áiggiid Hotelli Utsjokis ávžžuhit váldit oktavuođa Ohcejoga dearvvašvuođaguovddážii vejolaš njoammunáitaga vuollái gártama čielggadeami dihte.

Ohcejogas lea odne duorastaga 26.11. gávnnahuvvon jođánis koronateasttain positiiva koronavirusčájánas. Dáhpáhusa dihte njoammunáitaga vuollái gártan olbmot leat gártejuvvon.

Oktavuohtadieđuid gávnnat dáppe.

26.11. dii. 12.29 Anára gieldda jođiheaddji doavttir: gielddas jođus njoammunbálgá guorran

Anára gieldda jođiheaddji doavttir Outi Liisanantti dieđiha, ahte gielddas lea jođus njoammunbálgá guorran ja gártenbargu, mii laktása olbmui, gii lea ožžon koronavirusnjoammuma. Liisanantti ávžžuha sakka, ahte gieldda olggobeale ordnejuvvon speallandáhpáhusa ja speallanmátkkit šluhttejuvvojit 6.12. rádjai. Seamma ávžžuhus guoská maiddái gieldda guovllu speallandáhpáhusaid, maidda oassálastit bohtet gielddarájiid olggobealde.

26.11. dii. 12.17 Ohcejogas lea gávnnahuvvon okta koronavirusnjoammun jođánis koronateasttain

Ohcejoga gielda dieđiha, ahte Ohcejogas lea addojuvvon odne duorastaga 26.11. positiiva koronavirusčájánas jođánis koronateasttain.

Čájánasa bohtosa sihkkarastet vel PCR-teasttain, man dahket NordLab:s Roavvenjárggas. Bohtosa árvalit gárvánit dán jándora áigge.

Positiiva koronateastta ožžon olmmoš lea biddjojuvvon erremii ja dearvvašvuođafuolahus lea guorragoahtán njoammunbálgáid.

Ohcejoga gielda dieđiha áššis maŋŋelabbos.

25.11. dii. 14.29 Máŋgga koronanjoammuma gáldu lea mystera Lappis – Roavvenjárgga vuostáiváldinguovddáža njoammunbálgás okta ođđa njoammun

Lappis máŋgga koronanjoammuma gáldu ii leat dieđus.

Maŋimuš beivviid leat gávnnahan Roavvenjárggas vihtta ja Gihttelis ovtta njoammuma, maid gáldu eai dieđe. Dat fuolastuhttá ja njoammumiid gáldu čielggadit ain Lappi buohccidikšunbire bajit infekšuvdnadoavttir Markku Broas mielde.

Broas lasiha, ahte maŋimuš beivviid ođđa njoammumiid mearri lea leamašan vuollegaš.

Roavvenjárggas leat gávnnahan ovtta ođđa njoammuma ja dat laktása Roavvenjárgga vuostáiváldinguovddáža njoammunbálgái, mas leat gávnnahan golbma njoammuma Roavvenjárggas ja ovtta Oulus.

Länsi-Pohja buohccidikšunbires leat sihkkarastojuvvon guokte ođđa njoammuma.

25.11. dii 7.41 Norgga álbmotdearvvašvuođainstituhtas ođđa karantenaávžžuhusat Supmii

Norgga álbmotdearvvašvuođainstituhta ávžžuha, ahte Lappi buohccedikšunbires boahtti olbmot eai galggaše šat karantenii boahtte lávvardaga rájes. Seamma guoská maiddái Nuorta-Savos ja Ålánddas Norgii boahtti olbmuid.

Buot dain guovlluin lea maŋimuš guovtti vahku áigge almmuhuvvon vuollel 25 njoammundáhpáhusa 100 000 olbmo guovdu. Lappi buohccedikšunbires njoammumat leamaš 23,1, Nuorta-Savos 7,5 ja Ålánddas 3,3 njoammuma čuohte duhát olbmo guovdu.

Norgga álbmotdearvvašvuođa instituhta ávžžuha karantenii boahtte lávvardaga rájes olbmuid, geat bohtet Norgii Gaska-Suoma, Davvi-Gárjila, Pirkanmaa ja Päijät-Häme buohccedikšunbiriin.

Norgga ráđđehus mearrida álbmotdearvvašvuođainstituhta rávvagiid vuođul ođđa mátkkoštanráddjehusain.

24.11. dii. 15.42 Oaivegávpotguvlui boahtimin garra ráddjehusat

Oaivegávpot Helsset ja Helsset-Uusimaa buohccedikšunbiire HUS muitaledje maŋŋebárgga 24.11. ođđa evttohusaid koronavirusráddjehusain. Oaivegávpotguovllus koronanjoammumat leat leavván olu ja dan dihte eiseválddit galget bargat garra ráddjehusaid.

Ođđa ráddjehusain Helssega, Espoo ja Vantaa gávpogiid bálvalanbáikkit áigot bidjat gitta, almmolaš dilálašvuođaid ii oaččo ordnet ja nuppi skuvladási sirdášuvvá gáiddusoahpahussii.

Maid dáid gávpogiid válaštallanhállat, jiekŋahállat ja vuojadanhállat giddejuvvojit.

Lasi dán fáttás suomagillii otná dieđihandilálašvuođas dáppe.

24.11. dii. 12.05 Ođđa koronavirusnjoammumat Lappis: guokte Muonás, okta Roavvenjárggas ja okta Soađegilis

Lappis leat gávnnahan ođđa koronavirusnjoammumiid. Virus lea gávdnon guovtti Muonás luomus leamašan olgobáikegoddelaš olbmos, ovtta olbmos Roavvenjárggas ja ovtta olbmos Soađegilis.

Muonás luomostallan olbmot oaččuiga njoammuma bearašlahtus ja Soađegili njoammun laktása boarrásiid dikšunovttadat Nutukas njoammunbálgái ja dat gávnnahuvvui karantenas leamašan olbmos.

– Epidemiijadilli lea ain ráfálaš Lappi buohccedikšunbires, muitala infekšuvdnadoavttir Markku Broas.

Son goittotge lasiha, ahte máŋggaid ovttaskas njoammumiid gáldu ii leat dieđus, muhto vel ii dárbbaš fuolastuvvat, go njoammunáitaga vuollái gártan olbmuid ja njoammunbálgáid čielggadit ain.

Lappi buohccedikšunbire guovllus leat gávnnahan dán rádjái 310 njoammuma. Dáin 30 leat olgobáikegoddelaččain.

24.11. dii. 11.32 Bargguhisvuohta ii oro geahppáneamen Lappis

Bargguhisvuohta ii oro geahppáneamen Lappis. Barggu haga ledje golggotmánu loahpas 10 660 lappilaš olbmo, mii lea measta 2 300 eanet go jahki ovdal. Bargguhis olbmuin luopmudahtton olbmot ledje measta 1 500. Bargguhis lappilaččat ledje sulaid 120 eanet go mánotbadji dassái.

Dát boahtá ovdan Lappi EBI-guovddáža loguin.

EBI-guovddáža mielde koronavirusii laktáseaddji ráddjehusaid váikkuhusat eandalii turismii oidnojit gielddaid ja guovlogottiid bargguhisvuođa ovdáneapmin. Koronakriisa oidno maiddái nu, ahte luopmudahttimat guhkkot, guhkes áiggi bargguhisvuohta lassána ja nuoraid barggu fidnen lea váttásmuvvan. Lassin rabas bargosajit leat geahppánan ja fitnodagat leat hui várrugasat ođđa bargiid bálkkáheamis.

Vearrámus bargguhisvuođadilli lei Savukoskis, Muonás, Pelkosenniemis, Anáris, Eanodagas ja Kolaris. Buoremus dilli lei Simos, Keminmaas ja Soađegilis.

Bargguhis olbmuid oassi bargofámus lei Lappis 13,2 proseanta, go olles riikkas bargguhisvuođaproseanta lei 11,9.

24.11. dii. 10.58 Soađegili boarrásiidruovttus eai leat gávnnahan ođđa njoammumiid

Soađegili gieldda dieđáhusa mielde boarrásiid beavttálmahtton ássanbálvalusovttadat Nutukkaas mánnodaga dahkkon joavkotestemiin eai leat gávnnahan ođđa njoammumiid. Ássanbálvalusovttadagas dahkat joavkotestemiid vel gaskavahku.

Dán rádjái 11 boarrásis ja logi bargis leat gávnnahan koronavirusnjoammuma.

Gielddas eai leat gávnnahan ollenge ođđa koronanjoammumiid maŋimuš njealje beaivve áigge.

23.11. dii. 16.06 Anára gielddas jođánis koronateasttat geavahussii

Anára gielda dieđiha, ahte gielddas lea geavahusas covid-19-antigenateasta, man vástádusa oažžu sullii 15 minuhtas. Bargiid árvvoštallama vuođul sáhttet váldit vel dábálaš koronateastta. Positiivvalaš jođánis teastta boađus sihkkarastojuvvo PCR-teasttain, man vástádus boahtá 1–2 jándora geažes. Njoammudávddain vástideaddji doavttir almmuha positiivvalaš bohtosa ja ásaha pasientta sirremii čieža jándorii. Avvila dearvvašvuođaguovddáš gárte olbmuid, geat leat gártan njoammunáitaga vuollái ja njoammudávdadoavttir dahká vejolaš errenmearrádusaid logi beaivái. Njoammunáitaga vuollái gártan olbmuid gártejit 48 diimmu ovdal dávdamearkkaid álgima ja čieža beaivvi dávdamearkkaid álgima maŋŋá.

Lappi buohccidikšunbire lea koronainfekšuvnna vuođđomuttus. Ain lea dehálaš muitit gaskkaid, gieđaid bassama ja desinfierema ja máskka geavaheami. Máskka ávžžuhit geavahit buot almmolaš báikkiin, gos ii sáhte doallat gaskkaid.

23.11. dii. 15.59 Gihttel joatká koronaráddjehusaid valáštallanjoavkkuide: Eai speallanreaissut juovlamánu 13. beaivvi rádjai

Gihttela gielda joatká báikkálaš valáštallanjoavkkuide ávžžuhuvvon ráddjehusaid.

Gihttela gieldda lihkadanbáikkiin eai ordne speallandáhpáhusaid, maidda oassálastet olgobáikegotti joavkkut. Dákkár dáhpáhusaid galgá gieldda mielde sirdit dahje šluhttet ollásit. Lassin gielda ávžžuha, ahte Gihttela báikkálaš valáštallanjoavkkut eai oassálastte eará báikegottiid speallandáhpáhusaide pandemiijariskka unnidan dihte.

Ávžžuhus lea fámus 23.11–13.12.2020.

Gielda ákkastallá ávžžuhusaid rádjegielddaid lassánan koronavirusnjoammumiin.

Maiddái eará Lappi gielddain leat addán sullasaš ávžžuhusaid maŋimuš áiggiid.

23.11. dii. 7.27 Soađegilis mannan vahkus vihtta koronai laktáseaddji jápmindáhpáhusa

Soađegilis leat mannan vahkus dáhpáhuvvan vihtta koronai laktáseaddji jápmima. Jápmán olbmot leat vuorrasiid beavttálmahtton ássanbálvalusovttadat Nutukas ássit.

Lappi guovddášbuohcceviesu infekšuvdnadoavttir Markku Broas mielde jápmán olbmot leat gullan alla riskajoavkui, sii leat leamaš boarrásat ja sis leat leamaš vuođđobuohcuvuođat.

Koronai leat Nutukas ossodagas buohccán 11 ássi. Bargoveaga siste njoammumiid leat gávnnahan logi olbmos.

Oktiibuot Soađegilis leat gávnnahan 56 koronanjoammuma.

20.11. dii. 12.16 Lappi guovlohálddahusdoaimmahat: Lappis čoahkkananráddjehusat bissot ain seammán juovlamánus

Lappi guovlohálddahusdoaimmat dieđiha, ahte dat joatká ain ráddjehusaid čoahkkimiin, maidda oassálastet badjel 50 olbmo.

Guovlohálddahusdoaimmahat gieldá siste ja olgun ordnejuvvon almmolaš dilálašvuođaid ja čoahkkimiid, maidda ossálastet badjel 50 olbmo. Dát ráddjehus lea koronavirusnjoammumiid eastadeami dihte.

Goittotge siste ja ráddjejuvvon olgodáhpáhusain lea vejolaš ordnet badjel 50 olbmo dilálašvuođaid ja čoahkkimiid dainna eavttuin, ahte dorvvolašvuohta sihkkarastojuvvo oahpahus- ja kulturministeriija ja Suoma dearvvašvuođa- ja buresveadjinlágádus THL 21.9.2020 addin rávvagiid mielde.

Lappi guovlohálddahusdoaimmahaga ráddjehus lea fámus 1.12.–31.12.2020. Ráddjehus guoská buot Lappi 21 gieldda.

Áššis suomagillii dáppe.

20.11. dii. 12.02 Soađegilis guokte ođđa njoammuma, eará guovlluin Lappi buohccedikšunbires koronadilli hui ráfálaš.

Soađegilis leat gávnnahan guokte ođđa koronavirusnjoammuma.

– Njoammumat nannejuvvojedje duorastaga ja dat leat nu gohčoduvvon bearašnjoammumat, muitala infekšuvdnadoavttir Antti Väänänen Lappi buohccedikšunbires.

Soađegili gielda muitalii duorastaga eahketbeaivve, ahte epidemiija lea gielddas máhccamen jođánis leavvama muttus ruovttoluotta vuođđomuddui. Dán dihte gielda burgá koronaráddjehusaid ja ávžžuhusaid.

Boahtte mánnodaga rájes Soađegilis skuvllat máhccet lagašoahpahussii, astoáiggedoaimmat ja searvedoaimmat ožžot joatkašuvvat dihto ráddjehusain ja ávžžuhus priváhtadilálašvuođaid olmmošmearis nohká.

Väänänen govvida Lappi buohccedikšunbire koronadili hui ráfálažžan.

20.11. dii 9.46 Soađegili gielda burgá koronaráddjehusaid, epidemiija ložžemen báikegottis

Soađegili gielda burgá oasi koronaepidemiija dihte mearriduvvon ráddjehusain ja ávžžuhusain. Sivvan lea epidemiija ráfon Soađegilis.

Gieldda mielde Soađegilis golbma vahku dassái álgán koronaepidemiija njoammunbálggis lea dál measta boatkanan. Soađegilis leat gávnnahan 56 njoammuma. Maŋimuš 1,5 vahku áigge gielddas gávnnahuvvon ođđa njoammumat laktásit árabut dieđus leamašan njoammumiidda.

Soađegili gieldda stivrenjoavku mearridii ráddjehusaid ložžemis duorastaga. Stivrenjoavku mielde Soađegilli lea máhccán koronaepidemiija jođánis leavvama muttus fas vuođđomuddui.

Ráddjehusaid ja ávžžuhusaid burgigohtet skábmamánu 23. beaivvi rájes. Dát dárkkuha dan, ahte skuvllain máhccet lagašoahpahussii, astoáiggedoaimmat ja searvedoaimmat ožžot joatkašuvvat dihto ráddjehusain ja ávžžuhus priváhtadilálašvuođaid olmmošmearis nohká.

Loga olles artihkkala suomagillii dáppe.

19.11. dii. 15.00 Suopma joatká čavga sisrádjegohcima

Ráđđehus lea mearridan joatkit čavga ráddjehusaid mátkkošteamis. Suopma joatká ain rádjegohcima maid friddja johtima Schengen-guovllus.

Sisrádjedárkkistusat joatkašuvvet 13.12. radjái.

Nu gohčoduvvon ruoná riikkat, main Supmii sáhtášii mátkkoštit friddja, eai boađe lasi, dasgo Suopma doallá korona rádjeárvvuid dálá dásis. Suoma koronadilli lea Eurohpa buorimus, ja ráđđehus geahččala mátkkošteami ráddjemiiguin eastádit njoammumiid boahtima Supmii ráji rastá.

Dego dán radjái, Ruoŧa ja Norgga rádjeservošiin johtin Lappi guovllus lea friddjat. Estteatnama ja Ruoŧa bargojohtolagas eai boađe dásge ovddosguvlui leat karantenat.

Ráđđehus ávžžuha ain, ahte Suoma riikkavuložat eai mátkkoštivčče eará go vealtemeahttun sivain. EU olggobeallái mátkkoštettiin ráddjehusaide bohtet smávva nuppástusat.

18.11. dii. 15.27 Ođđa koronanjoammun Soađegilis

Soađegilis ja Giemajávrris leat gávnnahuvvon goappáge báikkis okta ođđa koronavirusnjoammun.

Soađegili njoammun lea gávnnahuvvon olbmos, gii lea gártan seamma bearrašis njoammunáitaga vuollái. Soađegilis leat gávnnahan dán rádjai oktiibuot 53 koronavirusnjoammuma.

Vuorrasiid beavttálmahtton ássanbálvalusovttadat Nutukas:s dahkkojuvvon joavkokoronateasttain eai leat ođđa njoammumat. Čuovvovaš háve Nutukas ássiid ja bargiid testejit skábmamánu 20. beaivve.

Soađegili koronadilli lea dán dilis ráfálaš, ja gieldda jođihanjoavku árvala ráddjehusdoaimmaid ja ávžžuhusaid joatkaga dahke vejolaš burgima birra dađistaga duorastaga skábmamánu 19. beaivve.

Dáid njoammumiin fuolakeahttá epidemiijadilli lea ráfálaš Lappi buohccidikšunbires. Ovdamearkan Roavvenjárggas gávnnahedje maŋimuš koronanjoammuma vahkku dassái.

Lappi buohccidikšunbire bajit infekšuvdnadoavttir Markku Broas giitá Lappi guovllu olbmuid das, ahte sii leat váldán ovddasvástádusa dilis ja doaibman nu, ahte koronadilli lea dál kontrolla vuolde.

Broas lasiha, ahte Roavvenjárggas ja Soađegilis duvle leavvan njoammunbálgát leat bisánan.

17.11. dii. 17.16 Soađegilis okta ođđa koronanjoammun – Lappi buohccidikšunbire eará guovlluin "erenoamáš ráfáláš" koronadilli

Soađegilis lea gávnnahuvvon okta ođđa koronavirusnjoammun. Gažaldagas lea vuorrasiid ássanbálvalusovttaga Nutukas bargi. Nutukas:s válde vuossárgga koronateasttaid buot dálu ássiin ja bargiin.

– Soađegilis dilli lea goittot bures kontrollas. Eará guovlluin Lappi buohccidikšunbires lea erenoamáš ráfálaš dilli, muitala Lappi buohccidikšunbire bajit infekšuvdnadoavttir Markku Broas.

Epidemiija lea ráfodan Roavvenjárggas. Roavvenjárgga gávpot mearridii maŋŋebárgga, ahte epidemiija lea sirdásan vearráneami muttus ruovttoluotta vuođđomuddui.

Broas muittuha, ahte koronadilli ii leat mannan meattá eará guovlluin riikkas.

– Mis leat guovllut, gos dávda sáhttá leavvagoahtit. Ovdamearkan oaivegávpotguovllus lea olu virus, dadjá Broas.

Bajit infekšuvdnadoavttir Broas lea gealdagasas čierastallama máilmmecup-gilvvus, mii ordnejuvvo Levis boahtte vahkuloahpa.

– Dehálamos lea, ahte buohccin ii vuolgge geahččat gilvvuid. Siste geavahit máskka, jus ii leat vejolaš doallat gaskka, dadjá Broas.

16.11. dii. 15.27 Ávvir: Álttá sámi mánáidgárddi bargis duođaštuvvon koronavirus

Álttás Guovddáš mánáidgárddis lea duođaštuvvon koronavirus ovtta bargis, muitala Álttá gielddahoavda Rikke Raknes Ávvirii. Guovddáš mánáidgárdi lea Álttá gieldda sámi mánáidgárdi. Mánáidgárdi dollojuvvo rabas.

Raknes muitala Ávvirii, ahte sii eai leat vuoruhan giddet Guovddáš mánáidgárddi dan dihte, go sis lea kontrolla dilis. Bargi koronateasta lei negatiiva álgovahkus, muhto nubbi koronateasta, man son válddii moatti beaivvi maŋŋá, lei positiiva. Bargi lea biddjon erremii mannan vahku álggus.

– Son ii leat njoammunguoddi, go son ii leat leamaš barggus dan áigodagas obanassiige, dadjá Rikke Raknes Ávvirii.

Áššis muitala Ávvir-áviisa.

16.11. dii. 13.38 Vihtta ođđa koronanjoammuma Soađegilis – buot njoammumat laktásit Nutukas njoammunbálgái

Soađegilis leat gávnnahan vihtta ođđa koronanjoammuma bearjadaga rájes.

Golbma njoammuma ožžon olbmuin barget Nutukas-nammasaš vuorrasiid ássanbálvalusovttadagas. Okta njoammuma ožžon olbmuin lea Nutukas ássi ja okta bargi lagašbirrasii gullevaš olmmoš.

Lappi buohccidikšunbire bajit infekšuvdnadoavttir Markku Broas mielde koronadilli lea kontrollas Soađegilis, dasgo eará Nutukas:ii laktáseaddji njoammumat eai leat gávnnahuvvon guhkes áigái.

Dan lassin okta ođđa koronanjoammun lea duođaštuvvon Muonás olbmos, guhte orru olggobealde Lappi guovllu.

Broas govvida Roavvenjárgga epidemiijadili ráfálažžan.

Lappis leat gávnnagan dán rádjai 559 koronanjoammuma. Dain 294 leat Lappi buohccidikšunbires ha 265 Länsi-Pohja buohccidikšunbires.

16.11. dii. 10.20 Länsi-Pohjas vihtta ođđa koronanjoammuma

Länsi-Pohjas leat gávnnahuvvon 12 ođđa koronanjoammuma vahkuloahpa áigge. Njoammumiin vihtta leat duođaštuvvon sotnabeaivve ja loahpat lávvardaga.

Bajit jođiheaddjidoavttir Jyri J.Taskila ávžžuha olbmuid várret áiggi koronatestemii, jus leat veháge dávdamearkkat.

16.11. dii. 9.58 Suopma válmmaštallamin mátkkoštanráddjehusaid joatkaga

Suopma válmmaštallá álgovahkus mearrádusa mátkkoštanráddjehusaid joatkašuvvamis. Yle dieđuid mielde áššis áigot mearridit duorastaga.

Suopma lea válmmaštallamen dárkkistusaid joatkaga EU sisrájiin maiddái skábmamánu loahpas ovddosguvlui koronadili dihte.

Sisrájáid dárkkisteapmái ii leat eará molssaeaktu, dasgo Suopma ii leat bastán hutkat rájáide doarvái buori teasta- ja karantenavuogádaga.

Olgoministeriija čielggadeami mielde máŋggain riikkain livčče hástaleaddji mátkkoštit Supmii, vaikko Suopma geahpedivččege ráddjehusaid.

13.11. dii. 16.12 Soađegilis guokte ođđa koronanjoammuma, Muonás okta

Lappis leat gávnnahan ođđa koronanjoammumiid odne bearjadaga. Guokte njoammuma leat gávnnahuvvon Soađegilis. Koronanjoammuma ožžon olbmot bargaba Nutukas-nammasaš boarrásiid beavttálmahtton bálvalanássama ovttadagas. Dáhpáhusaid mielde Soađegili koronanjoammumiid mearri loktanii 49 njoammumii. Gielda lea julggaštan epidemiija vearráneami muttu duorastaga ja báikegottis jotket ain ráddjenávžžuhusaid, dego earret eará gáiddusoahpahusa.

Muonás koronanjoammun lea gávnnahuvvon olgoriikalaš čuoiganjoavkkus. Dát lei njealját positiiva koronateastaboađus, mii lea duođaštuvvon Muonás hárjehalli čuoiganjoavkku lahtuin.

Báikegottálaš olbmuin Muonás ii leat duođaštuvvon koronavirusnjoammun.

13.11. dii 7.29 Soađegilis skuvllaid gáiddusoahpahusa ja eará koronaráddjehusaid jotket vahkuin

Soađegili gielda joatká vel vahkuin skuvllaid gáiddusoahpahusa ja ovdalis mearriduvvon ráddjehusaid ja ávžžuhusaid mainna figget eastit koronaepidemiija leavvama. Duorastaga addojuvvon ávžžuhusat leat fámus skábmamánu 22. beaivvi rádjái.

Soađegilis leat gávnnahan dán rádjái oktiibuot 47 koronavirusnjoammuma, ja njoammunáitaga vuollái leat gártán sulaid 490 olbmo. Ođđasamos njoammumiin muitaledje ikte.

Boarrásiidruoktu Nutukas njoammumiid mielde Soađegilis leat sirdásan koronavirusepidemiija jođánis leavvama muddui.

12.11. dii. 15:58 Olgoriikalaš čuoiganjoavkkus guokte koronanjoammuma Muonás ja Soađegilis guokte ođđa koronanjoammuma

Muonás ja Soađegilis leat gávnnahan ođđa koronanjoammumiid.

Muonás virus lea gávdnon guovtti olgoriikalaš čuoiganjoavkku lahtus. Muoná gieldda jođiheaddji doavttir Teemu Taulavuori ii muital, guđe riikkas čuoiganjoavku lea eret.

Taulavuori mielde joavkku lahtuin eai lean dávdamearkkat ja sin testejedje rutiinnaid mielde, go sii ledje leamašan riikkas badjel golbma jándora nappo 72 diimmu.

Soađegili ođđa koronanjoammumat leat gávnnahuvvon Nutukas-nammasaš boarrásiid beavttálmahtton bálvalanássama ovttadaga guovtti bargis. Lappi buohccidikšunbire bajit infekšuvdnadoavttir Markku Broas mielde positiiva koronateasttaid gávnnahedje joavkotestemis jođánis koronateasttain.

Dán rádjai Nutukas ássiin logi ja guhtta bargi ožžon koronanjoammuma.

12.11. dii. 13.42 Anára jođiheaddji doavttir ávžžuha ain sirdit speallanmátkkiid ja -dáhpáhusaid

Anára gieldda jođiheaddji doavttir Outi Liisanantti ávžžuha, ahte Anára gielddas ain garvet astoáiggedoaimmaide laktáseaddji speallanmátkkiid eará gielddaide. Ávžžuhus lea fámus 22.11. rádjai.

Liisanantti čujuha Lappi ja Länsi-Pohja buohccidikšunbireid koronavirusepidemiija diliide. Lappi buohccidikšunbires epidemiija ii leat vearráneamen eará sajis, go Roavvenjárggas.

Dábálaš astoáiggedoaimmat sáhttet joatkašuvvat, muhto gaskkaid ja máskka geavaheami ávžžuhit vejolašvuođaid mielde.

12.11. dii. 12.03 Jođánis koronateasttat váldojuvvon geavahussii Gihttelis

Gihttela dearvvašvuođaguovddážis leat váldán geavahussii jođánis koronavirusteastta. Gieldda mielde jođánis teastta boađus boahtá sullii guovtti diimmus.

Jođánis koronateasttaid leat árat váldán geavahussii Lappi guovllus aŋkke Soađegilis ja Muonás.

Gihttelis epidemiijadilli lea ráfálaš. Olles Lappi buohccidikšunbire lea epidemiija vuođđodásis, muhto Roavvenjárggas epidemiijadássi lea ovdánan vearráneami guvlui.

11.11. dii. 15.12 Soađegili koronanjoammumiid dihte galledangielddus Nutukas guovtti ossodagas

Máŋggaid koronanjoammumiid ja joavkonjoammunáitaga dihte Soađegilis Nutukas-nammasaš boarrásiid beavttálmahtton bálvalanássama ovttadaga guovtti ossodagas lea dál galledangielddus. Galledeamit gildojuvvojit guovtti ossodagas, Tiuhtas ja Peskis, gos olbmot leat gártan njoammunáitaga vuollái. Dáid ossodagain 16 ássi leat njoammunáitaga vuolde ja sis logi leat ožžon koronanjoammuma. Dan lassin njeallje Nutukas bargi leat buohccán koronavirusii.

Soađegili gielda ávžžuha sakka, ahte olbmot eai gallet Nutukas earáge ossodagain.

11.11. dii. 15.02 Länsi-Pohjas eanemus koronanjoammumat ássiidlogu ektui

Länsi-Pohja buohccidikšunbires leat THL mielde Suoma buohccidikšunbirein eanemus koronanjoammumat ássiidlogu ektui. Guovllu guovtti vahku koronanjoammumiid ihtinlogut leat dál 91,9 čuođiduhát ássi guovdu.

Gaskavahku leat gávnnahan vihtta ođđa njoammuma. Erremis leat oktiibuot badjel 500 olbmo. Njoammumat leat gávnnahuvvon Länsi-Pohja iešguđet guovlluin, muhto stuorámus oassi dain laktása durdnoslaš restoráŋŋii.

Länsi-Pohjas koronadilli lea čielgasit duođalamos Durdnosis, gos leat odne čávgen koronarávvagiid. Doppe ávžžuhit, ahte buot joavkoastoáiggedoaimmaid galgá gaskalduhttit.

11.11 dii. 14.03 Lappis leat gávnnahan čieža ođđa koronanjoammuma

Lappis leat gávnnahan fas ođđa koronavirusnjoammumiid. Länsi-Pohja buohccidikšunbire guovllus ođđa koronanjoammumat leat vihtta, Roavvenjárggas okta ja Soađegilis okta.

Bajit infekšuvdnadoavttir Markku Broas mielde Lappi buohccidikšunbires dilli lea ráfálaš.

Roavvenjárgga koronanjoammun gávdnui erremis leahkki olbmo lagašbirrasis ja Soađegili koronanjoammun lea Nutukas-nammasaš vuorrasiid beavttálmahtton bálvalanássama ovttadaga bargis.

Soađegili gieldda jođiheaddji doavttir Minna Jokinen muitala, ahte koronanjoammun gávnnahuvvui Nutukas divššáris, gii lea juo árat gártan njoammunáitaga vuollái.

Dán rádjai logi Nutukas ássi ja njeallje bargi leat buohccán koronavirusii.

10.11. dii. 14.45 Soađegilis vihtta ođđa njoammuma, main njeallje boarraśiidruovttus

Soađegilis leat gávnnahan vihtta ođđa koronavirusnjoammuma. Dain njeallje leat Nutukas-nammasaš boarrásiid beavttálmahtton bálvalanássama ovttadagas.

– Buohkanassii logi Nutukas ássi ja golbma bargi leat njomohallan, muitala Lappi buohccedikšunbire infekšuvdnadoavttir Markku Broas.

Dasa lassin Länsi-Pohja buohccedikšunbires leat gávnnahan golbma ođđa njoammuma ja Roavvenjárggas ovtta.

– Maŋimuš vahku áigge olbmot eai leat joavkkuid mielde gártan njoammunáitaga vuollái nu mo vel ovddit vahkuid áigge, baicce eanetlohku ođđa njoammumiin leat dakkár olbmuin, geat leat jo karantenas, čilge Broas.

10.11. dii. 7.12 Koronadilli vearrána Lappi buohccedikšunbires

Koronadilli vearrána Lappi buohccedikšunbires. Lappi buohccedikšunbires koronavirusnjoammumiid mearri lea jo 70 njoammuma 100 000 ássi guovdu maŋimuš guovtti vahku áigge.

Mannan vahkus ja dán vahku mánnodaga buohccedikšunbires leat gávnnahan oktiibuot 49 ođđa koronavirusnjoammuma. Eanemusat ođđa njoammumat leat leamaš Soađegilis, gos leat gávnnahan 30 njoammuma. Eanaš oassi dain laktása boarrásiidruoktu Nutukas njoammunbálgái.

Lappi guovddášbuohcceviesu infekšuvdnadoavttir Markku Broas muitala, ahte measta buot ođđa njoammumiid vuolggasaji leat bastan guorrat ja stuorra oassi njoammuma ožžon olbmuin lei jo válmmašin karantenas.

Olles Lappis leat gávnnahan dál jo oktiibuot badjel 500 koronavirusnjoammuma.

9.11. dii. 13.14 Vuosttaš olmmoš jápmán koronai Porsáŋggus

Porsáŋggu gielda dieđiha, ahte vuosttas olmmoš gielddas lea jápmán koronavirusa dagahan dávdii sotnabeaivve 8.11.

Porsáŋggu gielddas muitalit ahte jápmán olmmoš lei pasienttan Porsáŋggu dearvvašvuođaguovddážis koronavirusa dihte. Gielda ii muital lassedieđuid jápmán olbmo birra priváhtavuođa suodjaleami ja oapmahaččaid dihte.

9.11. dii. 12.45 Lappis buorit vásáhusat jođánis koronateasttas

Lappis leat ožžon buriid vásáhusaid nu gohčoduvvon jođánis antigenateasttain. Jođánis antigenateasttain leat bastán guorrat koronavirusa njoammunbálgáid beaktilit, go teastaboađus gárvvásmuvvá vuollel diibmobealis. Dat lea maid olu hálbbit, go laboratoriijas dahkkon pcr-teastta.

Lappi guovddášbuohcceviesu infekšuvdnabajitdoavttir Markku Broas lohká, ahte pcr-teastta ja jođánis teastta dárkkilvuođas eai leat jur erohusat.

9.11. dii. 7.26 Soađegilis vihtta ođđa njoammuma vahkkoloahpas

Soađegilis leat gávnnahuvvon vihtta ođđa koronavirusnjoammuma vahkkoloahpa áigge.

Sotnabeaivve eahketbeaivvi rádjái Soađegilis lei gávnnahuvvon oktiibuot 30 koronavirusnjoammuma.

Gielda muitala dieđáhusastis, ahte njoammunáitaga vuollái gártan olbmuid mearri ii leat sturron fuomášahtti olu, ja oktiibuot koronavirus njoammunáitagavuollái gártan olbmuid ja karantenii biddjon olbmuid mearri lea sulaid 460. Oassi karantenain lea jo nohkan.

Soađegili gielda muittuha, ahte ain lea earenoamáš dehálaš čuovvut buot addojuvvon rávvagiid ja ráddjemiid.

6.11. dii. 14.20 Lappi buohccidikšunbires logi ođđa koronanjoammuma, guovtti njoammuma gáldu eai vel dieđe

Lappi guovddášbuohcciviesu bajit infekšuvdnadoavttir Markku Broas muitala, ahte duorastaga maŋŋá leat gávnnahan logi ođđa koronanjoammuma. Dain guhtta leat gávnnahuvvon Roavvenjárggas, golbma Soađegilis ja okta Lappi smávva gielddas, gos leat vuollel vihtta koronanjoammuma.

Ođđa njoammumiin gávcci laktásit boares njoammunbálgáide, ja koronanjoammuma ožžon olbmot leat juo leamašan erremis njoammunáitaga vuollái gártama dihte. Dan sajis guovtti ođđa njoammuma gáldu eai vel dieđe. Broas mielde daid njoammumiid áitaga vuollái gártan olbmuid čielggadeapmi lea jođus, ja sii biddjojuvvojit erremii.

Suomagillii áššis gávnnat dáppe.

6.11. dii. 6.36 Máŋgasat gártan njoammunáitaga vuollái boarrásiidruovttus Soađegilis

Soađegilis boarrásiidruovttus Nutukkaas máŋgasat leat gártán korona njoammunáitaga vuollái. Áššis muitala Soađegili gielda.

Ássanbálvalusovttadagas njoammunáitaga vuollái leat gártán olbmot guovtti ossodagas, ja danin daid ossodagaid ássit ja oassi bargiin leat bidjon karantenii. Dain ossodagain ii oaččo galledit.

Soađegilis leat dán rádjái gávnnahan oktiibuot 22 koronavirusnjoammuma. Ikte gávnnahedje vihtta ođđa njoammuma.

5.11. dii. 14.24 Norga čavge koronaráddjehusaid – stáhtaministtar ávžžuha bissut ruovttus

Koronavirusnjoammumiid lassáneami dihte Norggas leat mearridan váldit atnui čavgadut ráddjehusaid koronavirusa leavvama eastadeami dihte. Ná muitala NRK. Norgga stáhtaministtar Erna Solberg ávžžuhii duorastaga olbmuid bissut ruovttuin nu ollu go vejolaš ja ráddjet sosiála oktavuođaid boahttevaš vahkuid áigge.

Norgga ásahan koronadoaimmaide gullet earret eará ráddjehusat čoahkkanemiide almmolaš báikkiin ja ráddjehusat restoráŋŋaid rahpanáiggiin. Lassin maiddái ruovttuide eai ávžžut bovdet eambbo go vihtta guossi ain hávvális, jus fal buot guossit eai leat seamma bearraša lahtut.

Áššis suomagillii gávnnat dáppe.

5.11. dii. 12.26 Soađegilis njeallje ođđa koronanjoammuma

Soađegilis leat gávnnahan njeallje ođđa koronavirusnjoammuma. Koronanjoammuma ožžon olbmot leat juo erremis ja seamma njoammunbálgás, mii álggii jiekŋaskearrospealus ovddit vahkkoloahpa. Ná muitalii bajit infekšuvdnadoavttir Markku Broas Lappi buohccidikšunbires duorastaga gaskabeaivve áigge.

Roavvenjárggas ođđa koronanjoammumiid eai leat gávnnahan gaskavahku maŋŋá. Roavvenjárgga gávpot lea koronaepidemiija muttus vearráneami guvlui. Länsi-Pohja buohccidikšunbire sirdásii virusa lassáneami muddui ikte.

Dat guovllut, gos koronavirus lea leavvamin eambbo ávžžuhit gaskkalduhttit joavkoastoáiggedoaimmaid ja garvit badjel 20 olbmo čoahkkanemiid.

Áššis suomagillii dáppe.

5.11. dii. 11.40 Koronatestenbiila vuodjigoahtá fargga Muonás ja testegoahtá turisttaid

Muonás plánejit mátkkálaččaid koronavirustestema priváhta johtti testenbiilla vehkiin. Koronateasttat dahkkojuvvošedje báikkálaš mátkefitnodatdoalliid diŋgomiid vuođul sin áššehasaide. Koronatestema sáhtášii dahkat goas beare jándora áiggis ja boađus boađášii 15 minuhtas.

Doaimma lea ulbmil álggahit moatti vahku geažes, go lobiid gieđahallan lea gárvvis. Soahpamušoassebealli ja haddi ii muitaluvvo vel almmolašvuhtii.

Tunturi-Lapin Ensihoito Oy lea ráhkkanan váldit dálvvi áigge juoba duhát koronateastta.

– Bálvalus ii leat oaivvilduvvon ovttaskas gieldalaččaide, baicce diŋgojeaddji áššehasaide. Jurdda lea dat, ahte almmolaš vuođđodearvvašvuođadivššu kapasitehta lea ráddjejuvvon ja dát dárbbašuvvo turismmas, go turisttaid mearri lassána, muitala Tunturi Lapin ensihoito Oy jođiheaddji Petteri Hirsinkangas.

Muoná jođiheaddji doavttir Teemu Taulavuori mielde priváhta koronatestenbálvalus buorida guovllu testengárvvisvuođa ja geahpeda dušši johtima koronaáiggis.

4.11. dii. 16.07 Leatgo fitnan Soađegili Torikioskis dahje Buresveadjinguovddáš Sopukka vuordinfeaskáris 29. golggotmánu – leat soaitán gártat koronanjoammunáitaga vuollái

Soađegili Torikioskis ja Sopukka vuordinfeaskáris duorastaga 29.10. fitnan olbmot leat soaitán šaddat koronavirusnjoammunáitaga vuollái, muitala Soađegili gielda. Gieldda mielde duorastaga 29.10. Torikioskis diibmu 21–22 gaskkas fitnan olbmot galget váldit oktavuođa Soađegili infekšuvdnavuostáiváldimii dakkaviđe.

Maid Buresveadjinguovddáš Sopukka feaskáris leamašan olbmot leat sáhttán šaddat koronanjoammunáitaga vuollái seamma beaivve diibmu 8–9 gaskkas. Gielddas ávžžuhit olbmuid čuovvut mielde, jus dávdamearkkat ihtet ja mannat koronavirustestemii, jus leat veháge dávdamearkkat.

Soađegilis leat gávnnahan gaskavahku veaiggi rádjai oktiibuot 16 duođaštuvvon koronanjoammuma. Njoammunáitaga vuollái leat gártan oktiibuot badjel 400 olbmo. Soađegili njoammunbálgái laktáseaddji vuosttaš njoammunáitaga vuollái šaddan olbmuid erremat leat nohkamin, muhto stuorra oassi njoammunáitaga vuollái gártan olbmuin lea ain erremis.

4.11. dii. 15.56 Länsi-Pohjas koronaepidemiija lea jođálmuvvan

Báikkálaš pandemiijabargojoavku lea linnjen gaskavahku, ahte Länsi-Pohja buohccidikšunbire lea sirdásan koronaepidemiija vearráneami muddui.

Linnjema ákkastallet lassánan koronanjoammumiin ja dainna, ahte njoammumiid gáldu eai leat sáhttán guorrat. Stuorámus oassi njoammumiin laktása goittotge juo dieđus leahkki njoammunbálgáide.

Koronavirusnjoammumiid mearri lea dál 50 njoammuma 100 000 ássi guovdu ja dan árvalit loktanit vel. Gaskavahku iđđes Länsi-Pohjas bohte dihtui čieža ođđa njoammuma.

Lappi buohccidikšunbires leat gávnnahan gaskavahku golbma ođđa njoammuma, main guokte leat Roavvenjárggas ja okta Soađegilis.

4.11. dii. 12.12 Soađegilis dál oktiibuot 16

Soađegilis lea dál oktiibuot 16 koronavirusnjoammuma. Ievttážis mearri lea lassánan otná, diibmu 12 radjái guvttiin sihkkaraston njoammumiin.

Áššis muitala Yle Sápmái Soađegili jođiheaddji doavttir Minna Jokinen.

Jokinen muitala, ahte buot dán rádjái duođaštuvvon njoammumat leat seamma njoammunbálgás. Njoammumat laktásit Soađegili jiekŋahállas lávvardaga 24.10. ordnejuvvon speallandáhpáhussii.

4.11. dii. 10.30 Porsáŋggus leat gávnnahan vihtta ođđa koronanjoammuma

Porsáŋggu gielda dieđiha preassadieđáhusastis, ahte ovtta buhcciid ossodaga pasienttas ja njealji bargis leat gávnnahan koronavirusnjoammuma. Buohkat leat isolašuvnnas ja dearvvašvuođabargit fuolahit sis. Lagaškontávttat leat biddjojuvvon erremii ja njoammunguorran lea dahkkon.

Ossodahkii leat dál garra njuolggadusat gussiid ektui ja guossit besset guossástallat dušše erenoamáš dilálašvuođain soahpamuša mielde.

Porsáŋggu gielda áigu geavahit buot vejolaš resurssaid gieđahallat dán ášši. Kriisanjunnošat čoahkkimastet dál ja eambbo diehtu boahtá odne dii. 12.00 Norgga áiggis.

4.11. dii 7.17 Norgga álbmotdearvvašvuođainstituhtas ođđa karantenaávžžuhusat Supmii

Norgga álbmotdearvvašvuođainstituhtta evttoha, ahte Suomas golmma buohccedikšunbire guovlluin boahtti olbmot galget fas karantenii. Dat guovllut leat Lappi, Länsi-Pohja ja Nuorta-Savo buohccedikšunbiret.

Buot dain guovlluin lea maŋimuš guovtti vahku áigge almmuhuvvon badjel 30 njoammundáhpáhusa 100 000 olbmo guovdu.

Norgga ráđđehus mearrida álbmotdearvvašvuođainstituhtarávvagiid vuođul ođđa mátkkoštanráddjehusain. Ođđa njuolggadusat bohtet fápmuilávvardaga 7.11.

3.11. dii. 17.02 Ávvir: Gávcci olbmo leat erremis Guovdageainnus

Guovdageainnu gielddas leat dál gávcci olbmo erremis dan maŋŋá, go ovtta olbmos duođaštuvvai koronavirusnjoammun mannan vahkus.

Njoammuma ožžon olmmoš lea boahtán rukses riikkas, gos korona lea leavvan nu, ahte norgalaččat eai beasa johtit dan riikkas errema haga.

Guovdageainnu sátnejođiheaddji Hans Isak Olsen muitala Ávvirii, ahte gávcci olbmo leat gártan erremii. Okta sis lea gieldda dearvvašvuođabargi. Boarrásiidruovttus leat maid leamašan garrasut njuolggadusat galledeapmái vahkkoloahpa áigge. Sátnejođiheaddji mielde moatti ássis boarrásiidruovttus ledje nuorvvu dávdamearkkat, ja gieldda dearvvašvuođabálvalus mearridii čavget njuolggadusaid gussiide.

Olsen mielde sii leat váldán kronaiskosa ovtta ássis, iige dat lean koronanjoammun. Dan dihte leat fas boarrásiid- ja buhcciidruovttus dábálaš njuolggadusat.

Áššis muitala Ávvir-áviisa.

3.11. dii. 15.50 Anára gieldda jođiheaddji doavttir: Ávžžuhus speallanmátkkiid ja speallandáhpáhusaid sirdimii

Anára gieldda jođiheaddji doavttir Outi Liisanantti ávžžuha ráddjet buot ahkásaččaid speallan- ja hárjehusmátkkiid gieldda rájiid olggobeallái. Sivvan Liisanantti muitala Lappi koronavirusdili, mii lea vearráneamen.

Liisanantti mielde miehtá riikka lea nana vásáhus koronavirusa leavvamis erenoamážit speallamátkkiin, gos njoammunáitaga vuollái gártá hearket lagašoktavuođain ja guhkes áiggi. Maiddái Anára gielddas ordnejuvvon spealuid ja speallandáhpáhusaid galgá doaisttážii sirdit, ávžžuha Liisanantti.

Jiekŋaskearru astoáiggedoaimma bokte lea leavvan koronavirus ovdamearkka dihte Soađegilis ja Roavvenjárggas.

Ávžžuhus lea fámus 15.11. rádjai.

3.11. dii. 15.20 Ođđa koronavirusnjoammumat leat fas gávnnahuvvon Lappis: Soađegilis vihtta, Länsi-Pohjas njeallje, Gihttelis okta ja Kolaris okta

Lappis leat gávnnahan ođđa koronavirusnjoammumiid. Soađegilis leat gávnnahan vihtta, Länsi-Pohja buohccidikšunbires njeallje, Gihttelis ovtta ja Kolaris ovtta ođđa njoammuma.

Lappi buohccidikšunbire bajit infekšuvdnadoavttir Markku Broas mielde aŋkke oassi Soađegili njoammumiin laktása jiekŋaskearru astoáiggedoaimmaide. Buot njoammumiid álggu eai leat vel čielggadan.

Soađegilis koronavirusnjoammumat leat gávnnahuvvon dán rádjai 14 ja koronanjoammunáitaga vuollái leat gártan sullii 400 olbmo. Soađegilis leat gártan máŋgii olbmot joavkonjoammunáitaga vuollái badjelaš vahku áigge. Njoammunáitaga vuollái leat gártan Tähtikunta skuvllas, Soađegili jiekŋahállas friddjavuoruin, Pahtavári ja Kevitsa ruvkkes ja Jeagárprikáhtas. Maŋimuš joavkonjoammunáitaga vuollái leat gártan guovddáš ássanguovllu ovdaskuvlajoavkkus, man oahpaheaddjit ja oahppit leat biddjon erremii.

Koronadili jođánis rievdama dihte Soađegilis lasihit mánáid koronatestema. Buot mánát, maiddái vuollel 7 jahkásaččat galget dolvojuvvot koronavirustestii, jus sii ožžot veháge dávdamearkkaid, muitalit gieldda dieđáhusas.

Länsi-Pohja koronanjoammumat leat gávnnahuvvon olbmuin, geat leat erremis, muitala bajit jođiheaddji doavttir Jyri J. Taskila.

Vaikko Roavvenjárggas eai leat gávnnahuvvon ođđa koronavirusnjoammumat vahkuloahpa maŋŋá, ii Broas jáhke, ahte epidemiija livččii gávpogis kontrolla vuolde.

3.11. dii. 14.16 Roavvenjárga lasiha koronateasttaid resurssaid

Koronavirusteasttaid váldiid mearri lea lassánan Roavvenjárggas. Roavvenjárgga gávpoga hehttehusdili njunušjoavku gieđahalai maŋŋebárgga koronavirusdili ja dan váikkuhusa gávpoga bálvalusaide.

Roavvenjárgga gávpot ja priváhta bálvalusbuvttadeaddjit leat lasihan koronateasttaid resurssaid, vai buohkat geain leat dávdamearkkat, sáhttet testejuvvot. Ulbmilin lea, ahte koronateastta beassá váldit seamma beaivve dahje maŋimuštá čuovvovaš beaivve.

Njunušjoavku linnjii maid, ahte studeanttaide geain ii leat buorre ráđđi, juhkkojuvvojit muohtomáskkat oahppolágádusaid bokte. Ulbmilin lea garvit dan, ahte olbmot eai bahkke oktanaga Roavvenjárgga guovddážis Kansalaisdálus ordnejuvvon máskkajuohkimii, gos máskkat juhkkojuvvojit gieldalaččaide, geain ii leat nu buorre ráđđi.

Koronavirusepidemiija lea Roavvenjárggas lahka vearráneami, muhto koronanjoammumiid mearri ii leat lassáneamen sakka, baicce dilli lea vehá stáđásmuvvan mannan vahku loahppageaži loguin.

Roavvenjárgga gávpothoavdda mielde gávpoga bargit eai galgga ordnet unnajuovlačoahkkaneamiid dán jagi. Roavvenjárgga gávpot ávžžuha gieldalččaid, ahte sii eai oassálastte unnajuovllaide koronavirusnjoammumiid eastadeami dihte.

3.11. dii. 9.09 Lappis badjel 60 ođđa njoammuma mannan vahkus

Lappis gávnnahedje mannan vahkus badjel 60 ođđa koronavirusnjoammuma. Dát boahtá ovdan Lappi ja Oarje-Lappi buohccedikšunbiriid dieđuin. Lappi buohccidikšunbires ođđa koronanjoammumiid gávnnahedje 40 ja Oarje-Lappis 27 ođđa njoammuma.

Koronavirus leavai eandalii Roavvenjárggas, gos duođaštuvvojedje 24 ođđa njoammuma mannan vahku áigge.

Koronavirusdilli lea dál Lappi buohccidikšunbires vearrát go giđđat. Lappis leat gávnnahan dán rádjai oktiibuot 429 koronavirusnjoammuma. Lappi buohccedikšunbires njoammumat leat duođaštuvvon 226 ja Oarje-Lappis 203.

2.11. dii. 15.56 Soađegilis Kevitsa ruvkkes koronavirusa njoammunáitta – gieldda mannan vahku logát duođaštuvvon koronavirusnjoammun

Soađegili Kevitsa ruvkkes máŋgasat leat gártán njoammunáitaga vuollái. Áššis muitala Soađegili gielda.

Boliden Kevitsa bargis gávnnahuvvui koronavirusnjoammun sotnabeaivve 1. skábmamánu Soađegilis. Gielddas muitalit, ahte njoammunáitta lea boahtán ruvkke doaibmasajiin ja bargojohtolaga linnjábiillain maŋŋebárgga 27. golggotmánu ja duorastaga 29. golggotmánu gaskasaš áigge.

Soađegilli infekšuvdnadoaibma lea leamaš oktavuođas olbmuide, geaidda njoammunáitta guoská ja sii gártet karantenii. Stuorámus oassi dain olbmuin lea infekšuvdnadoaimmas juo dieđus.

Mannan vahku áigge Soađegilis lea duođaštuvvon oktiibuot 10 koronavirusnjoammuma.

2.11. dii. 14.19 Ávvir: Hámmárfeasttas testegohtet oahppiid ja oahpaheaddjiid koronateasttain

Mannan vahkus gávnnahuvvui, ahte Hámmárfeasttas ovtta Baksalen skuvlla oahppái lei njommon koronavirus. Olles ovccát luohkká ja vihtta oahpaheaddji šadde dan dihte erremii.

Hámmárfeastta gieldda sátnejođiheaddji Marianne Sivertsen Næss muitalii odne preassačoahkkimis, ahte sii leat ceggemin koronatestentealttá Baksalen skuvlla olggobeallái, go sii testegohtet oahpaheddjiid ja ohppiid, geain lea leamašan oktavuohta koronanjoammuma ožžon nuorra olbmuin. Testen dahkkojuvvo skuvlabeaivvi maŋŋá.

Errenlohku lea lassánan Hámmárfeasttas Baksalen skuvlla njoammuma dihte. Oktiibuot 85 olbmo leat dál erremis ja sis leat 53 skuvlla oahppi ja vihtta oahpaheaddji. Hámmárfeastta buohcciviesu bargit leat oktiibuot 27 erremis.

Áššis muitala Ávvir-áviisa.

2.11. dii. 7.19 Soađegilis ođđa njoammumat – vuođđoskuvllat ja logahagat gáiddusoahpahussii

Soađegilis leat gávnnahan sotnabeaivve 1.11. golbma ođđa koronavirusnjoammuma.

Gávnnahuvvon njoammumiid ollislaš mearri lei sotnabeaieahkeda oktiibuot 9 ja njoammunáitaga vuollái leat gártán badjel 300 olbmo.

Soađegilis váldit gieldda mielde atnui ođđa ráddjendoaibmabijuid ja nana ávžžuhusaid koronavirusa leavvama easttadeami dihte.

Doaibmabijut leat earet eará vuođđoskuvllaid ja logahagaid sirdáseapmi gáiddusoahpahussii, 20 olbmo čoahkkananráddjehus ja nana ávžžuhus astoáiggedoaimmaid gaskkalduhttimii. Dát doaibmabijut leat fámus skábmamánu 15. beaivvi rádjái.

Maiddái Lappi skuvlenguovddáš REDU Soađegili doaibmaovttadat sirdása odne gáiddusoahpahussii ja gáiddusoahpahus joatkašuvvá skábmamánu 13. beaivvi rádjái.

30.10. dii 16.12 Anára gieldda jođiheaddji doavttir: ávžžuhus asttoáiggedoaimmaid ráddjemis koronadili dihte

Lappi buohccidikšunbires koronavirusnjoammumat leat lassánan. Anára gielddas dilli lea koronavirusa ektui vel doaisttážii ráfálaš, eaige koronavirusnjoammumat leat gávnnahuvvon čavčča áigge.

Lappi buohccidikšunbire ávžžuha goittotge, ahte njoammumiid dilli vuhtiiváldojuvvo miehtá Lappi eanangotti nu, ahte gielddat gárvvistit báikkálaš doaibmanrávvagiid Lappi eanangotti viidodaga dihte.

Anára gieldda njoammundávddaid vástideaddji doavttir Outi Liisanantti ávžžuha Anára gieldda neahttasiidduin sakka, ahte gieldda guovllus eai ordnejuvvo asttoáiggedoaimmaide laktáseaddji stuorát dáhpáhusat, maidda oassálastet olbmot eará gielddain. Maiddái speallanmátkkiid (suom. turnausreissut) ávžžuhit sirdit. Erenoamáš riskan dollojuvvojit badjel 12 jahkásaččaid speallandáhpáhusat, mat ordnejuvvojit siste.

Liisanantti mielde eará asttoáiggedoaimmat sáhttet joatkit doaibmat dábálaččat.

Dát ávžžuhus lea fámus 15.11.2020 rádjai.

30.10. dii 15.42 Soađegili Tähtikunta skuvllas guokte koronanjoammuma: badjeskuvlla oahppit gáiddusoahpahussii guovtti vahkkui

Soađegili Tähtikunta skuvllas leat gávnnahan guokte koronavirusnjoammuma. Gielda muitalii áššis bearjadaga.

Báikegotti vuosttas njoammun gávnnahuvvui gaskavahku Buresveadjinguovddáš Sopukka bargis.

– Aŋkke guokte njoammuma laktásit mannan vahkuloahpas ordnejuvvon jiekŋaskearrodáhpáhussii Soađegili jiekŋahállas, muitala vs. gielddahoavda Tarja Lempeä.

Joavkonjoammunáitaga vuolde leat leamaš olbmot Buresveadjinguovddáš Sopukkas, Soađegili jiekŋahállas ja Tähtikunta skuvllas. Lempeä mielde logit Soađegilis ássi olbmot leat karantenas.

Tähtikunta skuvlla njoammumiid ja njoammunáitaga dihte badjeskuvlla oahppit nappo luohkát 7–9 sirdásit 2.11. rájes gáiddusoahpahussii guovtti vahkkui. Skuvla dieđiha bargoveaga, oahppiid ja fuolaheaddjiid dárkilabbot gáiddusoahpahusa ordnestallamiin.

Gáiddusoahpahussii sirdásemiin viggat eastit njoammumiid ja njoammunáitaga leavvama.

Soađegili gieldda stivrenjoavku mearridii áššis bearjadaga.

30.10. dii. 14.46 Korona njoammugoahtán jođáneappot Roavvenjárggas – dán vahkus 19 ođđa njoammuma, máŋgasiid vuolggasadji ii leat dieđus

Koronavirus lea njoammugoahtán jođáneappotRoavvenjárggas. Áššis muitalii Roavvenjárgga gávpot bearjadaga.

Njoammumiid mearri gávpogis lea sturron ja mannan vahku loahpa maŋŋá sulaid bealli njoammumiin leat dákkárat, ahte daid vuolggasadji ii leat dieđus.

Roavvenjárgga gávpogis muitalit, ahte epidemiija orru dál leavvamin nuoraid ja nuorra rávesolbmuid gaskkas.

Roavvenjárggas leat gávnnahan dán vahkus bearjadateahketbeaivvi rádjái jo 19 koronavirusnjoammuma.

Lappi buohccedikšunbire ja Roavvenjárgga gávpot ávžžuhit, ahte badjel 20 olbmo dilálašvuođat eai ordnejuvvo Roavvenjárgga guovllus.

Eará sajiin Lappi buohccedikšunbire guovllus koronadilli lea ráfálaš. Seamma dilli lea maiddái olles Länsi-Pohja buohccedikšunbires.

Logaolles artihkkala suomagillii dáppe.

30.10. dii. 13.30 Soađegilis ođđa koronavirusnjoammun – oassi Tähtikunta skuvlla ohppiin ja oahpaheaddjiin karantenii

Soađegilis lea gávnnahuvvon okta ođđa koronavirusnjoammun. Gieldda mielde sáhka lea olbmos, gii lea leamaš njoammunáitaga vuolde Soađegili jiekŋahállas mannan lávvardaga 24. golggotmánu.

Njoammuma ožžon Tähtikunta skuvlla oahppi lea ovdal dávdamearkkaid álgima vázzán skuvlla dábálaččat mánnodaga 26. ja distaga 27. golggotmánu.

Oasi Tähtikunta skuvlla oahppiin sihke koronai buohccán oahppi oahpaheaddjiid ja eará olbmuid geat leat leamaš seamma sajis buohccán oahppiin, bidjat karantenii. Gielda ohcá eará olbmuid geat leat vejolaččat njoammunáitaga vuolde ja váldá sidjiide oktavuođa.

Tähtikunta skuvllas njoammunáitaga vuollái šaddan olbmuid leat rávven bissut ruovttus karantenalágan dilis ja vealtit sosiála kontávttaid dássážii, go sidjiide váldit oktavuođa infekšuvdnavuostáiváldimis ja addit dárkilut rávvagiid.

Soađegili vuosttaš koronanjoammun gávnnahuvvui gaskavahku.

29.10 dii. 17.53 Lávvordaga lea fas vejolaš mátkkoštit Lappi guovllus Norgii karantena haga

Norgga álbmotdearvvašvuođainstituhtta evttoha, ahte Suomas earret eará Lappi guovllus boahtti olbmot eai dárbbaš lávvordaga rájes šat karantenii, go bohtet Norgii. Lappi lassin maiddái viđa eará guovllus karantena evttohit váldit eret. Dat leat Davvi-Karjala, Viesttarbađaeana, Gaska- ja Lulli-Nuortabađaeana ja Lulli-Savos. Nappo dát guovllut rivdet fiskes guovlun Eurohpá njoammunkárttas.

Suoma guovlluin Ålándda, Davvi-Savo, Davvebađaeana ja Kymenlaakso rivdet rukses guovlun, nappo dain guovlluin go mátkkošta Norgii de galgá lávvordaga rájes logi beaivve karantenii. Dát njuolggadusat bohtet fápmui golggotmánu maŋimus beaivve nappo lávvordaga.

29.10 dii. 16.51 Restoráŋŋaide ođđa ráddjehusat

Duorastaga ráđđehus muitalii ođđa restoráŋŋa ráddjehusain mat leat guovlluid mielde ja mat bohtet fápmui skábmamánu álggus, nappo sotnabeaivve.

Njoammundávdalága mielde restoráŋŋaid doaimma sáhttet ráddjet guovllu koronadili vuođul ja dan vuođul makkár restoráŋŋas lea gažaldat.

Restoráŋŋat gos fállet eanáš alkohola dego bárat ja pubbat, daid ráddjehusat sáhttet leat čavgasat, go boradanrestoráŋŋaid.

Duorastaga dohkkehuvvon ráđđehusa ásahusas leat meroštallan dárkileabbo guovlluid ráddjehusaid. Bearaš –ja vuođđobálvalusministtar Krista Kiuru mielde ráddjehusaid leat juohkán njeallje sierra dássái dávdadili mielde.

Earret eará Lappi eanangotti guovllus eai ráddje áššehasmeriid. Restoráŋŋat mat vuvdet eanáš alkohola sáhttet leat rabas diibmu 01.00 rádjai. Eará restoráŋŋain rabasáiggiid leat luoitán, muhto čuovgamearka boahtá goittotge diibmu 24. Buot eanangottiin áššehasain galgá goit leat čohkkánsadji.

Lága mielde restoráŋŋaid áššehasmeriid ja rabasáiggiid lea vejolaš ráddjet dušše dan veardde, go lea dárbu vai koronavirus ii leava.

Restoráŋŋain gos fállet alkohola dego klubbaid ja pubbaid áššehasmeari sáhttá ráddjet eanemustá beallái. Boradanrestoráŋŋaid ja kafeaid áššehasmeriid sáhttá ráddjet eanemustá njealjátosiin. Áššehasmeriid ja rabasáiggiid ráddjehusaid lea vejolaš geahpedit jus koronadilli ii leat nu vearrái guovllus.

Ásahusas maid meroštallojuvvo dat makkár restoráŋŋaid rabasáiggi guovllus ráddjejit. Rabasáiggiid ráddjen ii guoskka kafeaid dahje restoráŋŋaid mat leat boaldámušvuovdinbáikkiid oktavuođas. Maiddái dámppaid ja girdiid fálaldagain eai leat ráddjehusat.

Jus muhtin guovllus eai leat njoammumat, de dain guovlluin ráddjehusaid sáhttet váldit boahttevuođas eret.

Loga eanetáššis dáppe.

29.10. dii. 13.06 Soađegilis lea gávnnahuvvon vuosttaš báikkálaš koronavirusnjoammun

Soađegili gielda dieđiha, ahte gielddas lea gávnnahuvvon vuosttaš báikkálaš koronavirusnjoammun. Koronavirusnjoammuma ožžon olmmoš bargá Buresveadjinguovddáš Sopukkas, ja bargit leat joavkonjoammunáitaga vuolde. Sopukka áššehasat ja guossit eai leat njoammunáitaga vuolde.

Koronavirusii buohccán bargi ii bargga áššehaččaiguin. Son lea geavahan muohtomáskka bargosajis ja fuolahan eará suddjemis rávvagiid mielde.

Dan lassin Soađegili jiekŋahállas lávvardaga 24.10. ordnejuvvon speallandáhpáhusas fitnan olbmot sáhttet vejolaččat leat njoammunáitaga vuolde. Goittotge buot jiekŋahállas fitnan olbmuid ii dárbbaš bidjat erremii, go jiekŋaskearrolihtu dáhpáhusain lea muohtomáskabággu, iige buohccán olmmos leat leamašan lagašoktavuođas buohkaiguin.

Eambbo dieđuid gávnnat dáppe.

29.10. dii. 8.20 Roavvenjárggas beaiveruovttus koronavirusnjoammun – 101 máná ja 32 bargi karantenii

Roavvenjárggas leat vuot ođđa dieđut vearránan koronadilis.

Roavvenjárgga gávpoga Väinämöisentie beaiveruovttu bargis lea duođaštuvvon koronavirusnjoammun ikte gaskavahku 28. golggotmánu. Gávpogis muitalit, ahte bargi lea leamaš barggus mannan háve 21. ja 22. golggotmánu, eaige sus leat leamaš váttut. Dalle báikki alde leat leamaš 101 máná ja 32 bargi. Njoammunáitaga dihte sii buohkat leat karantenas logi beaivve.

Väinämöisentie beaiveruoktu lea gitta karantena áigge.

Roavvenjárggas gávnnahuvvui gaskavahku čieža ođđa koronavirusnjoammuma.

28.10. dii. 14.29 Roavvenjárggas koronadilli lahka vearránit

Lappi buohccidikšunbire dieđiha, ahte Roavvenjárggas koronanjoammumiid gávnnaheapmi bissu ain badjin. Roavvenjárggas leat gávnnahan vahkus 42 ovcci koronanjoammuma, vahkus 43 koronanjoammumat ledje 17 ja dán vahkus dál gaskavahku veaiggi rádjai oktiibuot gávcci koronanjoammuma.

Vahkuin 42 ja 43 stuorámus oassi njoammumiin lea laktásan Ylläs ja Roki jiekŋaskearrojoavkku njoammunoktavuođaide.

Maŋimuš beivviid gávnnahuvvon njoammunoktavuođain viđas eai leat sáhttán sihkkarastit, gos njoammun lea álgán. Lappi buohccidikšunbire eará guovlluin lea ráfálaš dilli. Roavvenjárgga gávpoga oasil koronadili vearráneapmi lea lahka.

Vai koronadilli ii vearránivččii Roavvenjárggas ja olles buohccidikšunbires, lea dehálaš doallat dorvogaskkaid, buori giehtahygieniija ja geavahit muohtomáskka siste, gos ii leat vejolaš doallat dorvogaskkaid.

28.10. dii. 13.34 Johkamohki márkanat boahtte jagi digitálalaččat

Johkamohki márkanat ordnejuvvojit digitálalaččat boahtte jagi koronaviruspandemiija dihte. Johkamohkki gielda mearridii áššis odne. Johkamohkki márkaniid leat ordnen badjel 400 jagi.

Áššis muitala oddasat.se -neahttasiiddu.

28.10. dii. 12.11 Roavvenjárggas ollugat karantenii njoammunáitaga dihte

Roavvenjárgga skuvllain leat odne almmuhan vuot koronavirusa njoammunáitagiin.

Nivavaara skuvlla luohkáid 1b ja 2b oahppit leat mearriduvvon karantenii njoammunáitaga dihte. Nivavaara skuvllas olbmot ledje seamma luohkkálanjas 23. golggotmánu olbmuin, geas lea duođaštuvvon koronavirus.

Karantenii mearriduvvon oahppit leat oktiibuot sullii 40. Maiddái skuvlla oktavuođas doaibmi mánáid veaigedoaibmabáikkis 23. golggotmánu leamaš mánát leat mearriduvvon karantenii.

Roavvenjárggas almmuhit buot bearrážiidda, geain lea njoammunáitta ja sii ožžot dárkilut doaibmarávvagiid.

Ikte maŋŋebárgga 27.10. almmuhuvvui, ahte Roavenjárgga Ounasvaara logahat sirdášuvvá otnáža rájes gáiddusoahpahussii viiddes njoammunáitaga geažil.

Logahagas mannan vahkus sullii 100 oahppi ja vihtta oahpaheaddji ledje leamaš seamma sajiin olbmuin, geas lea ikte duođaštuvvon koronavirus. Buot dát olbmot, geat suinna leamaš seamma lanjain, leat mearriduvvon karantenii.

– Oahppi, guhte lea ožžon maŋŋebárgga positiiva koronavirusbohtosa, lei mannan vahkus golbma beaivve skuvllas ja gearggai bargat viđa sierra oahppojoavkkus ja son lea fitnan boradeamin ja johtán miehtá skuvlla, čilge skuvlla rektor.

Lei measta veadjemeahttun gávnnahit, geaidda dávda livčče sáhtán njoammut, nuba eiseváldi ávžžuhii sirdit olles skuvlla gáiddusoahpahussii.

Ounasvaara logahaga gáiddusoahpahus guoská maid seamma giddodagas doaibmi Lappi skuvlenguovddáš Redu Porokatu doaibmaovttadaga, mii maid lea odne sirdášuvvan gáiddusoahpahussii.

Áššis suomagillii dáppe.

28.10. dii. 10.52 Ávvir: Guovdageainnus lea gávnnahuvvon koronavirusjoammun

Guovdageainnus lea gávnnahuvvon koronavirus ovtta olbmos. Guovdageainnu sátnejođiheaddji Hans Isak Olsen muitala Ávvirii, ahte sii leat ikte maŋŋit eahkes ožžon dieđu áššis. Olsen mielde koronabuohcci lea boahtán olgoriikkas, ja son lea leamašan erremis ovdal, go iskosa bohtosat bohte. Áššis muitala Ávvir-áviisa.

27.10. dii. 13.01 Rádjebargit galget váldit koronateastta ain juohke čihččet beaivve

Rádjebargit, geat johtet Norggas barggus Suoma ja Ruoŧa bealde eai dárbbaš váldit koronateastta juohke goalmmát beaivve lávvardaga 31.10.2020 rájes, vai siis besset eret errenáiggis.

Storskog rádjestašuvnnas muitalit, ahte rádjebargit galget ain váldit koronateastta juohke čihččet beaivve Norgga ráđđehusas lávvardaga 17.10.2020 boahtán njuolggadusaid mielde. Dalle sii eai dárbbaš leat erremis, go sii fitnet koronateasttas vahkkosaččat.

27.10. dii. 7.28 NRK Sápmi: Norgii olgoriikkain boahtti bargit galget oažžut negatiivvalaš koronavirus teastabohtosa juohke goalmmát beaivve

Norgii olgoriikkain boahtti bargit galget oažžut negatiivva teastabohtosa koronavirusii juohke goalmmát beaivve vai besset eret errenáiggis. Dan lassin sii galget orrut sierra lanjas vuosttaš beivviidgo leat Norggas. Dan lohká norgga stáhtaministtar Erna Solberg. Dál rukses riikkain Norgii boahtti olbmot galget erremii. Áššis muitala NRK Sápmi.

23.10. dii. 14.02 Anára gielddas maid johtilis teasta atnui

Anára guovllus váldit boahtte vahkus atnui johtilis koronavirusteastta. Álggus olbmuin váldojuvvo sihke johtilis teasta ja dábálaš teasta. Johtilis teasta doaibmá boahttevuođas maid mátkkošteaddjiid testemii.

Anára guovllu riikkaidgaskasaš mátkkošteami rahpama ja koronatestenvugiid ovddidit álmmolaš mearrádusaid vuođul. Vuollel 72 diimmu Lappi guovllus leahkki mátkkošteaddjiin gáibiduvvo dušše okta negatiivvalaš koronaiskkus vuolginriikkas.

23.10. dii. 7.33 Anára gielda ávžžuha geavahit muohtomáskka

Anára gielda dieđiha, ahte ávžžuhit geavahit máskka almmolaš johtolaga lassin maiddái gávppis, girjerádjosis, gielddadálus, filbmateáhteris, konsearttain ja restoráŋŋain.

Skuvllaid ja oahppolágádusaid dat ávžžuhus ii goit vuos guoskka.

Maŋimuš vahkku áigge Lappi buohccedikšunbires leat sihkkarastán 12 koronanjoammuma. Anár gieldda guovllus ii leat leamašan dál oktage njoammun.

23.10. dii. 7.26 Lappi guovllus čoahkkananráddjehusat bissot seammaláganin skábmamánu

Lappi guovlohálddahusdoaimmahat lea mearridan, ahte skábmamánu áigge sáhttá ordnet čoahkkanemiid seammalágan ráddjehusain go dál golggotmánusge. Dat dárkkuha dan, ahte badjel 50-olbmo dilálašvuođaid sáhttá ordnet dušše beare nu, ahte dilálašvuođas basttet doallat dorvogaskka ja sihkkarastit doarvái buorrehygieniija.

Dát ráddjehus lea fámus skábmamánu. Ráddjehusa sáhttet goittotge árvvoštallat ođđasit, jus dilli rievdá. Lappi eanangottis lea dál ráfálaš dillikoronanjoammumiid ektui, dieđiha Lappi guovlohálddahusdoaimmahat.

22.10. dii. 9.20 Deanus 12 olbmo šaddan koronanjoammunáitaga vuollái

Deanus leatoktiibuot 12 olbmo šaddan koronanjoammunáitaga vuollái, ja leat dál erremis. Hámmárfeastalaš olmmoš lei fitnamin Deanus ja oaččui doppe positiiva bohtosa koronavirusteasttas. Son lei geargan leat dahkamusaš daiguin 12 olbmuin.

Deanu sátnejođiheaddji Helga Pedersen muitala Ávvirii, ahte dain 12 olbmos váldet koronavirusteastta.

21.10. dii. 12.40. Deanus leat gávnnahan koronanjoammuma hámmárfeastalaš olbmos

Deanu gielda dieđiha, ahte okta Hámmárfeastta ássi lea leamašan galledeamen Deanus mannan vahkus. Deanus finadettiin son lea ožžon positiiva covid-19-teastta. Dán olbmos eai leat garra dávdamearkkat ja son lea sirrejuvvon eret eará olbmuin Hámmárfeasttas.

Olbmot geain leat dávdamearkka ávžžuhuvvojit váldit oktavuođa gieldda koronatelefovdnii jođánamos lágiin koronateastta várás. Deanu gielddas ávžžuhuvvo, ahte olbmot geain leat korona dávdamearkkat bissot ruovttuerremis dassážii sii leat ožžon oktavuođa koronatelefovnnain.

Gieldda váldodoavttir čađaha njoammunguorrama, ja sus lea gieldda dieđáhusa mielde buorre kontrolla daid olbmuin, geat leat leamaš lagašoktavuođas njoammuduvvon olbmuin. Oassi dáid lagaškontávttain leat dál ruovttuerremis.

Heahtedillenjunnošat čoahkkanit odne dii. 14.00 Norgga áiggis gieđahallat dili.

20.10. dii. 18.10. Hámmárfeastta buohcceviessu gártan šluhttet masá visot doaimmaidis koronavirusa leavvama dihte

Hámmárfeasttaváldobuohcceviessu lea gártan šluhttet masá oalát doaimmas, daningo buohcceviesus lea koronavirus leavvagoahtán. Buohcceviesus váldet pasieanttaid vuostá dušše beare akuhtta- ja mánáidossodagas. Riegádahttinossodaga doaibma lea ráddjejuvvon.

Buohcceviesu 14 bargis ja njealji pasieanttas leat gávnnahan koronavirusnjoammuma. Hámmárfeastta váldobuohcceviesus leat oktiibuot 550 bargi, geain 112 leat karantenas.

Hámmárfeastta gielddas leat dál 20 sihkarastojuvvon koronavirusnjoammuma, main dušše guokte leat buohcceviesu olggobealde.

Buot earáid, earret akuhttapasieanttaid, dikšot jogo Girkonjárgga buohcceviesus dahje Romssa universitehta buohcceviesus.

20.10. dii. 14.55 Norgga rádji ii kontrollerejuvvo jeavddálaččat, muhto periodaid mielde

Norgga olgoministeriija dieđihii mannan vahku duorastaga 15.10.2020, ahte Norga ráddjegoahtá mátkkošteami Suomas. Norgii nu gohčoduvvon rukses guovlluin boahtti mátkkošteaddjit šaddet logi beaivve karantenii.

Norgga dearvvašvuođaeiseváldi NIPH dieđuin boahtá ovdan, ahte karanteana ii guoskka bargomátkkošteddjiid, jos sii leat addán negatiivvalaš koronateastabohtosa juohke čihččet beaivve. Vel ii leat addon sierra diehtu, gusketgo karanteanamearrádusat rádjeservošiid ássiid, geat eai bargga Norggas.

– Rádjeservoša bargit sáhttet johtit Norgii barggu olis, muhto sii galget testejuvvot juohke čihččet beaivve vai sii eai dárbbaš eallit errema lágan dilis bargoáiggi olggobealde, muitalit Norgga dearvvašvuođaeiseváldi NIPH:s.

Friddjaáigge mátkkit Suomas Norgii eai leat dál vejolaččat. Norgii lea vejolaš beassat nu gohčoduvvon rukses riikkas, muhto beassamii gáibiduvvo juogo barggu oktavuohta dahje registrerejuvvon čujuhus Norggas. Registrerejuvvon čujuhus gáibiduvvo dasa, ahte ráji rasttildeaddjis lea vejolašvuohta čađahit logi beaivvi errema.

Norgga dearvvašvuođaeiseváldi NIPH:s muitalit, ahte rádji ii leat njuolga giddejuvvon, muhto ráji rasttildeaddjis galgá leat dokumentašuvdna, gos son áigu leat Norggas.

Storskog rádjestašuvnnas muitaluvvo, ahte Norgga boles kontrollere rájá periodaid mielde. Norgga boles ii čuoččo ráji alde birra jándora.

Norggas ii sáhte dál vuodjit Suoma čađa Norgii dán dilis.

Ihttin gaskavahku 21.10.2020 diibmu 12:30 Norgga áiggis dollojuvvo preassakonferánsa Norgga riekte- ja gearggusvuođaministeriijain ja dearvvašvuođaministeriijain koronadili birra. Preassakonferánssa lea vejolaš čuovvut dáppe.

Loga maid: Yle Sámi koronačuovvoleapmi 19.10. rádjai

Varrasamosat

Muualla Yle.fi:ssä