Sápmi

Ođđasamos dieđut koronavirusis: Anárá njunušdoavttir ballá gieldda koronadili vearránit, Suopma gáibidišgoahtá koronaduođaštusa dahje -teastta mátkkálaččain

Outi Liisanantti
Anára njunušdoavttir Outi Liisanantti ávžžuha gieldalaččaid ohcalit koronaiskosii ja viežžat boahku vai buohkat sáhttet ávvudit juovllaid ráfis. Govva: Anneli Lappalainen / Yle

Yle Sápmi beaivida dán artihkkalii ođđasamos dieđuid koronavirusa dagahan dilis eandalit davvin.

3.12.2021 dii. 13.43 Suopma gáibidišgoahtá koronaduođaštusa dahje -teastta mátkkálaččain

Buot Supmii boahti mátkkošteaddjiin sáhttet 4.12. rájes gáibidit koronaduođaštusa dahje jus dakkár ii leat, de sin sáhttet stivret koronatestii. Dainna geahččalit várjalit álbmoga ođđa omikron-virusvariantta vuostá.

Stáhtaráđi mearrádus vuođđuduvvá Dearvvašvuođa- ja buresbirgenlágádusa cealkámuššii. Dan mielde omikron-virusvariántta dihtii dálá dilis eai leat dakkár riikkat dahje guovllut, gos sáhtášii beare boahtit iige dárbbašivčče fuolahit dorvvolašvuođadoaimmain.

3.12.2021 dii. 12.45 Roavvenjárgga koronadilli vuhtto Anáris

Anára gielddas lea koronadilli vearránan maŋimuš beivviid áigge, go gielddas leat gávnnahan máŋga ođđa koronanjoammuma.

Gieldda njunušdoavttir Outi Liisanantti muitala, ahte guovtti vahku áigge Anáris leamašan guhtta koronanjoammuma ja olbmuid leat mearridan erremii viehka olu.

– Čielgasit orru, ahte Roavvenjárgga dilli vuhtto misge, ja stuorra fuolla lea ahte dat lea dušše álgu. Mun ávžžuhan buohkaid ohcalit koronaiskosii ja viežžat koronaboahkuid, dadjá Liisanantti.

Avvila dearvvašvuođaguovddážis eai bastte dál testet buohkaid, geat leat gártan njoammunáitaga vuollái ja geain eai leat dávdamearkkat. Gielda lea ordnen koronatestema dál Avvila girdingieddái ja teasta lea nuvttá gieldalaččaide.

Álggus girdingietti testen lei dárkkuhuvvon mátkkošteddjiide girdingiettis, muhto gielda dagai soahpamuša testenfitnodagain, vai maid gieldalaččat besset testii, dadjá Anára njunušdoavttir Outi Liisanantti.

– Doppe leamašan buorre dilli. Beaivválaččat váldet sullii 30 koronaiskosa ja ráiddus lea ferten vuordit eanemusat vihtta minuhta.

3.12.2021 dii 7.53 Norga gáibidišgoahtá mátkkálaččain koronateastta

Norgga eiseválddit dieđihit, ahte buot mátkkálaččain gáibiduvvo dál koronateasta riikiiboahtima oktavuođas vaikko livččiige váldán koronaboahku dahje buohcan dávdda. Rádjebargit gal besset johtit nu mo ovdalge.

Ođđa njuolggadus lea boahtán fápmui otne bearjadaga. Doaimmaiguin háliidit eastadit koronanjoammumiid ja erenomážit Omicron virusvariántta leavvama. Teastta sáhttá válddihit rájá alde testenbáikkiin. Jus testenvejolašvuohta ii leat rasttildanbáikkis, teastta ferte válddihit eará sajis 24 diimmu siste riikiiboahtimis.

2.12.2021 dii. 15.57 Anáris golbma njoammuma, Muonás guokte ja Soađegilis okta

Lappi buohccedikšunbiires leat maŋŋebárgga maŋŋá gávnnahan 52 ođđa koronanjoammuma. Stuorámus oassi buohcedikšunbiire njoammumiin, 46, leat Roavvenjárgga guovllus. Buot njoammumiid vuolggasadji ii leat čielggas.

Maŋŋebárgga maŋŋá leat gávnnahan golbma njoammuma Anáris, guokte Muonás ja ovtta Soađegilis. Eatnat njoammumiid vuolggasadji lea dieđus.

2.12.2021 dii 13.05 Anára njoammumiid vuolggasadjin navdet Sajosa dánsundáhpáhusa

Anára gieldda jođiheaddjidoavttir lea addán lasáhusa ievttá koronadieđáhussii. Dan mielde koronanjoammumat leat lassánan Anára gielddas ja buot ođđa njoammumat leat gávnnahuvvon boahkokeahtes olbmuin.

Dálá dieđuid mielde njoammumiid vuolggasadjin lea 27.11. lágiduvvon dánsundáhpáhus Sajosis. Jođiheaddjidoavttir ávžžuha koronateastta válddiheapmi, jus lea oassálastán Sajosa dánsundáhpáhussii iige leat váldán koronaboahku dahje jus leat dávdamearkkat.

2.12.2021 dii 8.15 Avvila girdigiettis sáhttá maid válddihit koronateasttaid

Anára gielddas sáhttá fitnat koronateasttas dál maiddái Avvila girdigiettis. Anára gieldda ođđasamos koronadieđáhusa mielde teastabáiki lea rabas árgabeivviid diibmu 10–19 ja vahkkoloahpaid diibmu 10–17. Teasta lea nuvttá gieldalaččaide.

Anára gielddas leat gávnnahan maŋimuš beivviid áigge máŋggaid ođđa koronanjoammumiid ja danin jođiheaddjidoavttir ávžžuha olbmuid čuovvut dávdamearkkaid ja ohcalit teasttaide unnage dávdamearkkaid dihte.

Čuovvovaš pop up -boahkuhandilálašvuohta ordnejuvvo 7.12.2021 diibmu 9–15 Avvila dearvvasvuođaguovddážis.

1.12.2021 dii 13.06 Ođđa olahus koronanjoammumiin

Dearvvašvuođa- ja buresveadjinlágádus THL dieđuid mielde Suomas leat gávnnahan odne gaskavahku 1 570 koronanjoammuma. Dat lea olahuslohku ovtta beaivvi ala dan rájes go epidemiija álggii.

Buohcciviesuin leat divššus dálá dilis 275 olbmo. Beavttalmahttojuvvon divššus leat 51 koronabuohcci.

Maŋemuš guovtti vahkku áigge Suomas leat gávnnahan oktiibuot birrasiid 15 500 njoammuma.

1.12.2021 dii. 11.40 Lappi buohccidikšunbiires 39 ođđa njoammuma

Lappi buohccidikšunbiires leat gávnnahan vuossárgga maŋŋá 39 ođđa koronanjoammuma, main 31 leat Roavenjárggas.

Buohccidikšunbiire mielde njoammumat leat eanas vuollel 12-jahkásaš boahkokeahtes mánáin. Njoammumat leat gávnnahuvvon maiddái nuorra rávesolbmuin, geaid buohta njoammunbálggis ii leat čielggas. Stuorámus oassi koronai buohccán olbmuin ii leat váldán boahkuhusa.

Roavenjárgga lassin Muonás leat gávnnahan vihtta ođđa njoammuma ja Anára, Gihttela ja Kolari gielddain guđesge ovtta njoammuma.

1.12.2021 dii 11.26 Roavenjárgga Ylikylä skuvllas karantenas oktiibuot 230 oahppi ja rávesolbmo

Roavenjárgga Ylikylä vuođđoskuvllas leat dál karantenas oktiibuot 230 oahppi ja rávesolbmo. Koronanjoammumiid leat gávnnahan skuvllas dassážii gávcci.

Ylikylä skuvllas ordnejit boahtte bearjadaga koronatestema, mas sáhttet finadit buot skuvlla oahppit ja rávesolbmot.

Roavenjárga sirdásii ikte epidemiijas leavvanmuddui ja gávpogis ávžžuhit olbmuid bargat gáiddusin.

1.12.2021 dii. 10.42 Avvila dearvvašvuođaguovddážis eai bastte dál testet buohkaid, geat leat gártan njoammunáitaga vuollái

Avvila dearvvašvuođaguovddážis eai bastte dálá dilis vástidit buot telefovnnaide, dieđiha Anára gielda. Gieldda dieđáhusa mielde dearvvašvuođaguovddážis eai maiddái dál sáhte testet buot olbmuid, geain eai leat dávdamearkkat, muhto geat leat goittotge gártan njoammunáitaga vuollái almmolaš báikkiin mannan vahkuloahpas Avvilis ja Anáris.

Njoammunbálgáid guoradeaddjit gártejit dál buohkaid, geat leat leamašan lagaš oktavuođas koronadávdii buohccán olbmuiguin.

Jus olbmuin leat dávdamearkkat, de gielda ávžžuha riŋget gohcci buohccidivššárii nummárii 040 770 9187 dahje vástideaddji buohccidivššárii nummárii 040 517 8725.

Dearvvašvuođaguovddáža koronaboahkuhannummárii leat riŋgen odne nu máŋgasat, ahte oassi riŋgejeaddjiid nummáriin lea gahččan riŋgenlisttus eret. Jus dearvvašvuođaguovddážis eai riŋge ruovttoluotta, de gielda ávžžuha riŋget koronaboahkuhannummárii ođđasit.

1.12.2021 dii 8.50 Guovdageainnu skuvlamánáin koronanjoammumat

Guovdageainnu skuvlla golmma oahppis leat gávnnahan ruovttuiskosis koronanjoammumiid, dieđiha suohkan. Guovdageainnu suohkan lea váldán PCR-iskosiid dáin oahppiin ja joatká ain njoammunguorramiin. Guovdageainnu skuvllas leat bidjan johtui dábálaš doaibmabijuid ja buohkat geaidda ášši guoská, leat ožžon dieđu dan birra.

Mannan vahkkus suohkanis gávnnahedje oktiibuot golbma koronanjoammuma ja buot dát ledje skuvlamánáin.

1.12.2021 dii 8.23 Sámi oahpahusguovddáš sirdása gáiddusoahpahussii

Sámi oahpahusguovddáš Anáris lea mearridan sirdásit olles juovlamánnui gáiddusoahpahussii ja -bargui Anára gieldda guovllu koronanjoammunáittadili geažil. Skuvla dieđiha, ahte ná meannudit sihkkarvuođadoaibman.

30.11.2021 dii. 16.48 Korona lea njommon bálvalandálu bargái Avvilis

Anára gielda dieđiha, ahte boarrásiid bálvalandállu Männikkös Avvilis lea okta bargi dieđihuvvon koronapositiivalažžan otne maŋŋebárgga. Su bargovuoru áigge Mustikka ja Kaarnikka ossodagaid bargit ja ássit leat šaddan njoammunáitaga vuollái. Gieldda dieđuid mielde njoammunriska goit lea viehka uhcci suodjebiergasiid geavaheame dihte.

Mannan lávvardaga sáhttá leat šaddan njoammunvára vuollái Avvilis iešguđet gávppiin, apteaikkas, juovlameassuin ja báras ja Anáris borramušgávppis, hoteallas ja Sámekulturguovddáš Sajosis. Maiddái sotnabeaivvi avvillaš gávppis leamašan njoammunáitta. Dasa lassin Kakslauttanen luopmobáikkis leamašan njoammunáitta 24.–27.11.

Dárkkilut dieđuid dáid báikkiin ja áiggiin gávdná Anára gieldda neahttasiiddus.

30.11.2021 dii 13.15 Roavenjárggas sirdásit epidemiija leavvanmuddui

Yle dieđuid mielde Roavenjárgga koronadilli lea hedjonan nu olu, ahte doppe sirdásit dál epidemiija leavvan muddui. Ráddjehusat bohtet fápmui odne dahje ihttin. Gávpogis leamašan olu njoammumat maŋemuš guovtti vahkku áigge.

Leavvanmuddui sirdáseapmi oaivvilda dan, ahte čoahkkananráddjehusat bohtet fápmui ja badjel 20 olbmo čoahkkanemiid ii oaččo lágidit siste. Gávppiide, vuojadanhállii ja girjerádjosii oažžu gal mannat dego ovdalge, muhto ferte váldit vuhtii máskaávžžuhusaid ja dorvogaskkaid.

Jus olbmuin lea koronapássa, de sii ožžot lágidit deaivvademiid ja besset maiddái restoráŋŋaide sisa ráddjehusain fuolakeahttá.

Roavenjárggas ávžžuhit dál olbmuid sirdásit gáiddusbargui.

30.11.2021 dii 8.00 Koronadilli hedjonan Lappi buohccidikšunbiires

Koronadilli lea hedjonan Lappi buohccidikšunbiire guovllus. Maŋemuš vahkku áigge Lappi buohccidikšunbiires leat gávnnahan 122 njoammuma, mii lea golmmageardásaš lohku ovddit vahkku ektui.

Njoammumiin stuorámus oassi lea gávnnahuvvon Roavenjárggas, muhto njommumat leamašan maiddái Gihttelis, Muonás, Giemajávrris, Kolaris, Posios, Anáris ja Soađegilis. Eanemus njoammumat leat gávnnahuvvon mánáin ja boahkokeahtes rávesolbmuin.

Lappi buohccidikšunbiire lea dálá dilis njoammumiid ektui vuođđodásis, muhto koronakoordinerenjoavku mearrida odne, ahte sirdásitgo Lappis leavvanmuddui.

29.11.2021 dii 9.30 Koronadilli ráfon Kárášjogas ja Guovdageainnus – Deanus ođđa njoammumat

Koronalogut leat njiedjan maŋemuš vahkku áigge davimus Norgga rádjegielddain.

Deanu gielddas gávnnahedje vahkuloahpa áigge guokte ođđa koronanjoammuma. Árat mannan vahkkus Deanu gielda dieđihii golmma koronanjoammumis. Deanu jođiheaddjidoavttir ávžžuha olbmuid dál doallat gaska ja vealtit buot dárbbašmeahttun deaivvademiid.

Kárášjogas eai leat gávnnahan ođđa koronanjoammumiid guđa beaivái. Skábmamánus duođaštedje Kárášjogas oktiibuot 82 njoammuma, muhto dál gielddas leat nagodan bissehit njoammumiid.

Guovdageainnu suohkan dieđihii mannan bearjadaga ovtta ođđa koronajoammumis. Mannan vahkkus suohkanis gávnnahedje oktiibuot golbma koronanjoammuma ja buot dát ledje skuvlamánáin. Skábmamánus leat gávnnahan koronanjoammumiid oktiibuot 21 olbmos Guovdageainnus.

26.11. dii. 13.25 Ohcejogas goalmmát boahku ožžon 14,1 proseantta gieldalaččain

Sámi ruovttuguovllu gielddain leat ain unnán olbmot ožžon goalmmát koronaboahku. Yle ja THL dieđuid vuođul čohkkejuvvon tabealla mielde goalmmát koronaboahku leat Ohcejogas ožžon 14,1 % gieldalaččain, Anáris, Soađegilis badjel čieža proseantta ja Eanodagas gávcci proseantta gieldalaččain.

Olles Suoma álbmogis goalmmát koronaboahku leat ožžon dál njeallje proseantta álbmogis.

Bearjadaga Suomas dieđihedje 1 406 ođđa koronanjoammumis. Lohku lea 60 dáhpáhusa eanet go ikte, mii leamaš dán rádjái stuorimus beaivelohku oppa koronapandemiija álggu rájes. Goalmmadas koronanjoammumiin leat HUS buohccedikšunguovllus.

Dán rádjái Suomas leat gávnnahan 182 284 njoammuma. Koronai laktáseaddji buozalmasvuođaide leat bearjadaga rádjái jábmán 1 309 suopmelačča.

26.11. dii. 11.30 Avvila njoammunáitta leige golggotmánus

Divvojuvvon dii. 12.01. Avvila gávppis dáhpáhuvvan njoammunáitta leamaš golggotmánu 22. beaivve, ii skábmamánu 22. beaivve dego ovdalis čállojuvvui dán artihkkalis. Loga Anára gieldda koronadieđáhusaid dáppe.

26.11.2021 dii. 11.20 Oulu Sámit šluhtte ávvudoaluid

Oulu Sámit -searvi šluhtte searvvi 20 jagi ávvudoaluid boahtte vahkuloahpas. Searvvi ságadoalli Sigga-Marja Magga dadjá, ahte searvi váldá duođas hástaleaddji koronadili. Pohjanmaa guovlu, masa Oulu gávpot gullá lea gieskat sirdásaš korona leavvanmuddui.

–Mii áigut dutkat, jus searvi sáhttá ordnet doaluid boahtte jagi bealde, dadjá Magga.

Maiddái eará guovlluin leat dáhpáhusaid ordnemis hástalusat vearrás koronadili dihte.

Norgga bealde Guovdageannus eai šatta Ávvir-cup čiekčamat juovlamánu álggus, muitala NRK Sápmi.

Árabuš Guovdageainnus mearridedje maid, ahte sirdet duodjemárkaniid maŋŋelii juovlamánnui. Áššis čálii Ávvir.

25.11.2021 dii 15.10 Skábmamánus 20 njoammuma Guovdageainnus

Guovdageainnus leamašan oktiibuot 20 njoammuma skábmamánus. Dat lea eanet go ovdal olles pandemiija áigge, dieđiha Guovdageainnu suohkan. Golggotmánu 30. beaivvi rájes njoammumat leamašan oktiibuot 24.

Maŋŋebárgga bođii diehtu, ahte guovtti mánnái lea njommon covid-19-dávdda Guovdageainnus.

Kárášjogas eai leat maŋŋebárgga maŋŋá gávnnahan ođđa njoammumiid. Doppe leat skábmamánu álggu rájes gávnnahan juo 82 njoammuma.

25.11.2021 dii 12.22 Siidda huksenguovllus Anáris gávnnahuvvon korona

Siida Sámi Musea huksenbargoguovllus Anáris lea gávnnahuvvon okta koronanjoammun dán vahkku vuossárgga, dieđiha Anára gielda. Buot njoammunáitaga vuollái gártan olbmot leat gártejuvvon ja biddjon karantenii. Dassážii ođđa njoammumat eai leat boahtán ovdan. Gielda ja huksenfitnodat čuvvot dili dárkilit.

24.11.2021 dii. 10.45 Ain gávnnahit ođđa koronanjoammumiid Finnmárkkus

Kárášjogas leat gávnnahan ikte maŋŋebárgga ovtta ođđa koronanjoammuma. Erremis leat dál guhtta olbmo. Kárášjot gielddas leat skábmamánu álggu rájes gávnnahan 82 koronanjoammuma.

Guovdageainnus fas leat gávnnahan guokte ođđa njoammuma maŋŋebárgga. Erremis leat čiežas.

Deanu gielda fas dieđiha neahttasiiddustis, ahte leat gávnnahan ovtta njoammuma doavtterkantuvrra bargis maŋŋebárgga.

23.11. 2021 dii. 11.56 Muonás korona lea njommon bearrašiid siste

Muonás leat koronanjoammumat leavvagoahtán skuvllas vuollái 12-jahkásaččaid gaskkas, geat eai leat boahkuhuvvon. Koronanjoammumiid leat gávnnahan guovtte vahku áigge badjelaš 40. Njoammumat leat vuolgán Mátta-Suomas, iige Davvi-Norgga koronadilli váikkut Muonás.

– Váidalahtti ferte dadjat, ahte dilli ii leat buoremus vejolaš, ahte mis dáppe Muoná skuvllas lea šaddan dákkár epidemiija. Dasa laktasit viehka máŋgga bearraša njoammumat, muitala Muoná ja Eanodaga jođiheaddji doavttir Teemu Taulavuori Yle ođđasiidda.

Taulavuori mielde sáhka lea 14 bearrašis. Virus lea njommon dakkár bearrašiidda, main váhnemat eai leat boahkuhuvvon, dahje sis leat váilevaš boahkuheamit, dahje sii eai leat boahkuhuvvon ollege.

Muoná koronanjoammumiin leamaš váikkuhus muhtin ovttaskas dáhpáhussan maiddái Eanodahkii. Epidemiijan dat ii goittot leat šaddan Eanodaga guovllus, dadjá Taulavuori.

22.11.2021 dii. 13.30 Norgga rájá gohcigohtet fas

Hedjonan koronadili dihte Norgga rájá gohcigohtet fas, dieđiha Norgga ráđđehus.

Skábmamánu 26. beaivvi rájes galgá vuot registreret iežas jus lea rasttildeamen rájá Norgii.

Rasttildeami oktavuođas gáibidit fas váras negatiiva koronateastabohtosa, mii lea váldon 24 diimmu siste dahje váldit teastta rájá alde. Teastabohtosa eai gáibit, jus lea duođaštus guovtti koronaboahku oažžumis dahje das, ahte lea buohcan koronavirusa maŋimuš guđa mánu siste.

22.11.2021 dii. 10.49 Guovdageainnus njeallje ođđa koronanjoammuma vahkoloahpa áigge – Kárášjogas okta jápmán korona geažil

Guovdageainnu suohkan dieđihii lávvardaga, ahte Guovdageainnus leat ihtan njeallje ođđa koronanjoammuma. Guovttis dain laktásit dakkár njoammumiidda, mat leat jo dieđus. Guovtti njoammuma bálgá leat dál guorramen.

Kárášjogas fas ledje bearjadat rádjai gávnnahan golbma ođđa njoammuma, muitala Ávvir-aviisa. Kárášjohkalaš vuorrasut olmmoš jámii duorastaga koronavirusa dagahan dávdii. Dát lea vuosttas koronavirusa dagahan jápmu Kárášjogas.

Norga lea maid mearridan, ahte gielddat main leat koronaeastadandoaimmat fámus, sáhttet váldit atnui koronaduođaštusa. Koronaduođaštus lea seammalágan go Suoma koronapássa. Davvi-Norggas earret eará Kárášjoga, Čáhcesullo ja Romssa suohkanat árvvoštallet koronaduođaštusa atnuiváldima.

18.11.2021 dii. 7.00 Koronadilli vearrána máddin

Suomas leat ikte registerejuvvon 1151 ođđa koronavirusnjoammuma ja dat soaitá lea ođđa ovtta beaivvi olahus.

Eanáš njoammumat leat Mátta-Suomas. Lappi eanangottis vearrámus dilli lea dál Muoná, Durdnosa, Keminmaa ja Tervola gielddain.

Maiddái Gihttel ja Eanodat leat ivdnejuvvon Iltalehti-bláđi kárttas. Dan sadjái nuortin Ohcejogas, Anáris ja Soađegilis lea dál buorre dilli.

Muonás njoammunráidu lea vuolgán johtui báikkálaš skuvllas ja doppe ledje ikte gaskavahku 29 njoammuma.

17.11.2021 dii. 15.15 Koronaepidemiija ložže davvin

Muonás leat gávnnahan otne gaskavahku golbma ođđa koronanjoammuma. Sámegielddain eai leat leamaš maŋimuš beivviid áigge njoammumat.

Norgga bealde ránnjágielddain koronanjoammumat leat geahppánan. Kárášjogas leamašan okta ođđa njoammun ikte maŋŋebárgga. Guovdageainnus fas gávnnahuvvui okta ođđa koronanjoammun vuossárgga 15.11.

Mátta-Várjjagis ja Porsáŋggus eai leat leamaš koronanjoammumat mannan vahkuloahpa rájes.

17.11.2021 dii. 14.58 Sámegielddain boahkuhit goalmmát geardde korona vuostá

Buot sámegielddain leat addigoahtán goalmmát koronaboahkuhusaid badjel 60-jahkásaččaide ja riskajoavkkuide gullevaš olbmuide sihke olbmuide, geat ásset dikšolágádusain.

Goalmmát boahkuhusa sáhttá addit, go nuppi boahkuhusas lea gollan guhtta mánotbaji.

17.11.2021 dii. 7.00 Ráddjemat máhccet máttás?

Mátta-Suoma vearrás koronadili dihte čoahkkananráddjemat leat mahcamin Mátta-Supmii ja fiesttara beallai dihto eanangottiide. Turku guvlui dat lea juo ráddjejuvvon 50 olbmuid siste.

Mearrádusat sáhttet leat vuordimis juo otne ja boahtit fábmui 25.beaivvi. Čoahkkananráddjemiid sadjái sáhttá maid mearriduvvot gáibádus koronapássas almmolaš dilálašvuođain. Koronadilli lea ovdan ráđđehusas otne.

16.11.2021 dii. 12.07 Kárášjoga koronadilli lea stáđásmuvvamin

Kárášjoga gielddas sávvet, ahte koronanjoammumat leat dál geahppáneamen gielddas. Gielda giitala dieđáhusastis gieldda bargiid koronadili dikšumis ja álbmoga das, ahte leat áŋgirit váldán teasttaid ja čuvvon gieldda ávžžuhusaid. Kárášjogas gávnnahedje vuossárgga dušše ovtta ođđa njoammuma.

Maiddái Guovdageainnus gávnnahedje vuossárgga ovtta koronanjoammuma. Gieldda dieđáhusa mielde dán olbmos lea lagas oktavuohta dan olbmui, geas lávvardaga duođaštuvvui korona, ja lea de leamaš karantenas dan rájes.

15.11.2021 dii. 13.56 Muonás leat koronanjoammumat lassánan, Eanodagas eai leat ođđa njoammumat

Muonás leat jo badjel 20 koronanjoammuma, muitala Enontekiön Sanomat -aviisa. Buot njoammumat laktásit mannan vahkus skuvllas ja beaiveruovttus álgán epidemiijai.

Dán vahkus buot skuvlaluohkát, earret vuosttas luohkká, leat gáiddusoahpahusas ja buot mánáid astoáiggedoaimmat leat gaskkalduhtton. Boahtte vahku vuossárgga 22.11. skuvllat máhccet fas lagasoahpahussii. Skuvllas lea maid máskaávžžuhus fámus badjeskuvllas ja logahagas.

Eanodagas eai leat ođđa njoammumat.

15.11.2021 dii. 12.01 Korona njoammu ain Finnmárkkus

Vahkuloahpas leat measta buot Finnmárkku sámegielddat dieđihan ođđa koronanjoammumiin, muitala Ávvir.

Kárášjogas leat dieđihan lávvardaga njealji ođđa koronanjoammumis. Skábmamánus Kárášjogas leat dieđihan 74 olbmos koronanjoammuma. Ávvira dieđuid mielde 34 olbmo leat ain erremis ja njeallje olbmo leat buohcceviesus dahje dearvvasvuođaguovddážis. Ášši boahtá ovdán Kárášjoga gieldda neahttasiidduin.

Lávvardaga maiddái Guovdageainnus dieđihedje ođđa koronanjoammumis. Ávvira mielde gažaldagas lei olgobáikegoddelaš olmmoš ja sus ii leat oktavuohta ovddit njoammumiidda.

Ohcejoga kránnjágielddas Deanus fas koronanjoammumat leat gávnnahuvvon árat mannán vahkus. Lávvardaga Deanu gielda dieđihii, ahte gielddas lea nubbi koronanjoammun.

Porsáŋggu gielddas koronanjoammumat leat lassánan. Lávvardaga positiivvalaš iskkus gávnnahuvvui guovtti ođđa olbmos. Porsáŋggus leat oktiibuot 21 olbmo isolašuvnnas.

12.11.2021 dii. 14.53 Muoná njoammumat lea lassánan

Eanodaga ránnjágielda Muonás koronanjoammumat leat lassánan. Muoná skuvllas gávnnahedje gaskavahku vihtta koronanjoammuma ja duorastaga gielddas ledje čieža ođđa njoammuma.

Ođđa njoammumat eai leat dušše skuvllalaččain, baicce seamma njoammunbálgái gullet maiddái eará olbmot.

Muoná skuvlla buot 2.–5. luohká oahppit leat karantenas. Guđát luohkát ja badjeluohkát vázzet skuvlla gáiddusin. Karantena ja gáiddusskuvla joatkašuvvet Muoná skuvllas boahtte vahku bearjadaga, 19.11. rádjai. Karantenas leat máŋgalot máná.

12.11.2021 dii. 13.09 Kárášjogas vihtta ođđa njoammuma

Kárášjoga gielddas Norgga bealde lea duorastaga duođaštuvvon vihtta ođđa koronanjoammuma, dieđiha gielda. Olmmošlogu ektui lea gielda okta dain gielddain olles Norggas, gos dál leavvá eanemus korona.

Gielddas leat skábmamánu vuosttas beaivvi rájes 67 olbmos duođaštuvvon covid-19-dávda. Njealjis leat dál buohcciviesus dahje buohcciidruovttus.

12.11.2021 dii. 11.12 Korona leavvá Mátta-Várjjaga gielddas

Buođggáidnjárggas (su. Pykeijä) leat gávnnahan 17 koronanjoammuma boarrásiidsiiddas maŋimuš beivviid áigge. Maiddái Báhčaveaji mánáidgárddis ja skuvllas leamaš njeallje njoammuma ja Girkonjárggas okta.

Muhtin ovttaskas njoammumiid bálgáid eai leat bastán vuos čielggadit.

Gieldda neahttasiiddus muitalit, ahte koronanjoammumiid meari vurdet vel lassánit čuovvovaš beivviid áigge.

11.11.2021 dii. 8.42 Kárášjogas vihtta ođđa njoammuma

Kárášjogas leat gávnnahan dál oktiibuot 59 koronanjoammuma 1.11. rájes. Gaskavahku ovdanbohte vihtta ođđa njoammuma. Njealjis leat buohcceviesus ja 18 olbmo leat beassan eret erremis. Áššis muitala NRK Sápmi.

10.11.2021 dii. 13.44 Eanodagas okta ođđa njoammun, Muonás maid njoammumat

Eanodagas leat gávnnahan ovtta koronanjoammuma, muitala Enontekiön sanomat. Dávda ii leat njommon viidáseabbot.

Eanodaga ránnjágielddas Muonás fas navdet vuolleskuvllalaččaid gártan njoammunáitaga vuollái. Ovtta bearražis leat buohcan koronadávdda juo muhtun áigge, muhto njoammuma gávnnahedje easkka dál. Bearražis leat máŋga máná, ja danin virus soaitá leat njommon skuvllas.

Eanodaga njoammuma eai navdde laktásit Muoná njoammumiidda.

Muoná ja Eanodaga jođiheaddji doavttir Teemu Taulavuori sávvá, ahte olbmot válddášedje teasttaid herket. Son árvala, ahte dál lea ovddabealde nu gohčoduvvon koronadálvi.

– Jus it leat váldán boahkuid, de váldde. Virus ohcá álbmogis daid, geat eai leat boahkuhuvvon, ja váikkuhusat soitet leat vearrát, dadjá Taulavuori.

10.11.2021 dii. 12.46 Kárášjogas 52 njoammuma

Kárášjoga gieldda beaividuvvon dieđáhusa mielde gielddas leat maŋŋebárgga rádjai gávnnahan 52 njoammuma. Okta buohcciin lea buohcceviesus, ja guovttis leaba beassan eret erremis.

9.11.2021 dii. 18.04 Kárášjogas juo oktiibuot 50 njoammuma

Kárášjogas lea maŋŋebárgga gávnnahan vihtta ođđa koronanjoammuma, dieđiha Kárášjoga gielda. Njoammumat leat dál oktiibuot 50. Okta buohcciin lea dolvojuvvon buohccevissui. Buohccán olbmuin bealli lea boahkuhuvvon.

9.11.2021 dii. 9.00 Kárášjogas ođđa njoammumat – Guovdageainnu koronadilli stáđásmuvvame

Kárášjoga gielddas leat gávnnahan ain ođđa koronanjoammumiid. Vuossárgga áigge gielddas duođaštuvvojedje čieža ođđa njoammuma, muitala NRK Sápmi. Kárášjoga koronadilli lea hedjonan sakka maŋemuš vahkku áigge ja vahkkoloahpas gielddas gávnnahedje oktiibuot 38 njoammuma buot ahkásaččaid gaskkas.

Guovdageainnu koronadilli fas orru stáđásmuvvame. Suohkan dieđiha neahttasiiddustis, ahte maŋemuš golmma beaivái eai leat šat boahtán ođđa njoammumat ovdan. Guovdageainnu váldodoavttir Anne Lajla W. Kalstad goit bivdá guovdageaidnulaččaid leat várrugasat, jus johtet lagaš guovlluin Kárášjogas, Álttás ja Romssas.

Guovdageaidnu lea maid ávžžuhan, ahte suohkana bargit eai galggaše oassálastit čoahkkimiidda Álttás, Kárášjogas ja Romssas guovtte vahkkui dás ovddasguvlui.

Mannan vahkkus Guovdageainnus gávnnahedje 11 koronanjoammuma.

8.11.2021 dii. 15.38 Ohcejoga olbmuid ávžžuhit garvit Kárášjogas fitnama, jos beare vejolaš

Ohcejoga gielda ávžžuha dieđáhusastis, ahte gieldda olbmot eai finaše Kárášjogas ja ahte sii válddihivčče teastta jo láivves dávdamearkkaid geažil. Ohcejoga kránnjágielddas Kárášjogas leat 38 olbmo erremis koronavirusinfekšuvnna dihtii.

Gielda ávžžuha garvit Kárášjogas fitnama, jos beare vejolaš. Daid Kárášjogas fitnan olbmuid, geat eai leat boahkuhuvvon korona vuostá dahje geain lea beare nubbi boahkuhus, ávžžuhit fitnat koronateasttas Ohcejoga gildii máhcadettiin ja nuppi koronateasttas 3–5 jándora máhccama maŋŋá. Dan botta ávžžuhit geavahit máskka buot ruovttu olggobeale johtimiin ja fuolahit maid buorre giehtahygienas.

Daid, geat johtet rájá rastá jeavddalaččat ovdamearkka dihtii barggu geažil, ávžžuhit fitnat koronateasttas sullii oktii vahkus. Ávžžuhus ii guoskka daid, geat leat boahkuhuvvon guktii korona vuostá. Sii eai dárbbaš fitnat teasttas.

Gieldda dieđáhusas maiddái muittuhit, ahte jo láivves koronadávdamearkkaid geažil galgá fitnat koronateasttas nu jođánit go vejolaš.

– Dát guoská maid sin, geat leat boahkuhuvvon guktii korona vuostá. Bargui, skuvlii dahje beaiveruktui ii galgga mannat, jos leat infekšuvnna dávdamearkkat, čuožžu gieldda dieđáhusas.

8.11.2021 dii. 11.34 Kárášjogas 38 njoammuma, Guovdageainnus ovccis sirrejuvvon

Koronadilli lea vearránan hui jođánit maŋimuš vahku áigge Norgga bealde ja maiddái Suoma ránnjágielddain Kárášjogas ja Guovdageainnus.

Kárášjoga gielddas leat sotnabeaivvi eahket rádjai ovdanboahtán 38 njoammuma buot ahkásaččaid gaskkas. Sis bealli lei boahkuhuvvon korona vuostá. Dávda lea njommon dearvvašvuođa- ja dikšunbálvalusaid bargiide ja kundariidda ja maiddái skuvlaahkásaš mánáide, muitala Kárášjoga gielda neahttasiiddustis.

Guovdageainnus fas ovccis leat sirrejuvvon koronanjoammuma geažil, muitala Guovdageainnu gielda. Lávvardaga leat mannan háve ožžon dieđu golbma njoammumis. Buohkaid njoammunbálggis lea dieđus.

Maiddái Porsáŋggu gielddas leat dál 27 olbmo isolašuvnnas, muitala NRK Sápmi.

Loga maid: Koronadilli lea fas vearráneamen maid Sámis – Anára njunušdoavttir ávžžuha olbmuid váldit boahkuhusaid

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä