Sápmi |

Ohcanáigi Sámi musihkkaakademiija joatkkaoahpuide álgá – Plánejit boahttevuhtii juo sámi musihka bacheloroahpuid

Sámi musihkkaakademiija viiddida oahpahusfálaldaga Ohcejoga sámelogahahkii ja pláne sámi musihka bacheloroahpuid ovttas Sámi allaskuvllain ja Giellagas-instituhtain.

Sámi musihkkaakademiija
Sámi musihkkaakademiija oahppit 2016-2017; Erke Eriksen, Anna Morottaja, Heli Huovinen, Laura Tapiola ja Auli Länsman. Govas maid oahpaheaddji Jukkapekka Hapuoja. Govva: Aslak Paltto / Yle Sápmi
ohcejohka

Boahtte čavčča Sámi musihkkaakademiija ordne joatkkaoahpuid. Dássážii musihkkaakademiija lea ordnen vuosttas jagi oahpuid golbmii ja dál lea ulbmil geahččalit nuppi jagi joatkkaoahpuid.

– Dat leat dárkkuhuvvo daidda, geat leat vázzán musihkkaakademiija vuosttas jagi muhto maiddai daidda, geain leat doarvái olu dárbbašlaš dieđut ja dáiddut sámemusihkas, čilge jođiheaddji oahpaheaddji Anna Näkkäläjärvi-Länsman.

Joatkkaoahpuide eai sáhte váldit nu galle oahppi, go leat nu gáržžes sajit.

– Mis leat guokte linnjá, de oahppiid mearri sáhttá leat stuorát go dušše ovtta linnjá oahppit, muitala prošeaktajođiheaddji Kati Eriksen.

Joatkkaoahpuin leat guokte linnjá, maid gaskkas galgá válljet, solistalinnjá ja musihkarlinnjá. Solistalinnjá lea plánejuvvon nu, ahte das leat lagašoahpahusperiodat sullii oktii mánus.

– Mii leat hábmen oahpu, mii doarjjošii sámi solista ovddos guvlui. Lassin leat jurddašan nu, ahte dasa livčče álki searvat, sáhttá fitnat deaivvademiiguin Ohcejogas, čilge Näkkäläjärvi-Länsman heivehuvvon oahpahusa birra.

Musihkarlinnjás oahpahus dáhpáhuvvá veháš eará láhkai.

– Dát lea vehá earálágan, go oahpahus lea juohke vahkus. Das fállat sámi musihka, musihkkateoriija ja čuojahanoahpuid, muitala Näkkäläjärvi-Länsman ja lasiha, ahte dát ollašuhttojuvvo ovttasbarggus Ohcejoga sámelogahagain.

Anna Näkkäläjärvi-Länsman
Sámi musihkkaakademiija jođiheaddji oahpaheaddji Anna Näkkäläjärvi-Länsman. Govva: Linnea Rasmus / Yle

Viiddidit čakčat musihkkaoahpahusfálaldaga Ohcejoga sámelogahahkii

Sámi musihkkaakademiija ulbmilin lea ovdánahttit duppaldutkkusvejolašvuođa ovttas Ohcejoga sámelogahagain.

– Boahtte jagi sámelogahaga oahppit sáhttet válljet alcces válljenkurssaid, nu ahte das boahtá oahpahus okta eahketbeaivi juohke vahkus. Dat lea oalle ollu, muhto jáhkán dat šaddá maid oalle somá, illuda Näkkäläjärvi-Länsman ođđa fálaldagas.

Boahtte čavčča sámi musihkkaoahpahusa isket vuosttas geardde sámelogahagas.

– Sávvat ahte boahttevuođas logahaga oahppit sáhttet válljet sámi musihkkasuorggi oahppoávnnasin, dadjá Näkkäläjärvi-Länsman.

Prošeaktajođiheaddji Kati Eriksen sávvá, ahte boahttevuođas Ohcejoga sámelogahagat livčče sámi musihka earenoamáš logahat.

Kati Eriksen
Sámi musihkkaakademiija prošeaktajođiheaddji Kati Eriksen. Govva: Linnea Rasmus / Yle

Boahttevuođa sávaldahkan sámi musihkkabachelor oahput

Sámi musihkkaakademiija lea áidnalunddot skuvlejupmi ja doaibmá ain Ohcejoga gieldda ja Sámi oahpahusguovddáža prošeaktan gitta 30.9.2020 rádjai.

– Ulbmil lea, ahte doaibma šaddá bissovažžan ja sámi musihka oahpahus joatkašuvvá, dadjá Eriksen.

Su mielde vejolaččat besset juo plánegoahtit sámi musihkkabacheloroahpuid ovttasbarggus Sámi allaskuvllain ja Giellagas-instituhtain.

– Mis leamaš čoahkkin ja buohkain lea beroštupmi ovttasbargat Sámi musihkkaakademiijain, joatká Eriksen ja muitala musihkkaoahpahusa dárbbu birra.

Boahttevuođas oassi oahpuin soitet ordnejuvvot gáiddusin dahje sierra guovlluin.

– Boahtte jagi periodaoahpahusa vásáhusaid vuođul diehtit jo olu eanet, čilge Eriksen joatkkaplánaid ovdáneamis.

Sámi musihkkaakademiija joatkkaoahpuid ohcanáigi álgá 10.4 ja bistá 15.5. rádjái. Joatkkaoahpuide sáhttá ohcat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä