Sápmi |

Ohcejoga boazodáluid oktasašmeahcci áigu suodjalit 700 hektára sturrosaš boaresvuovddi Muttošjávrre bálgosa guohtuneatnamiin

Boazodáluid oktasašmeahcci lea vuolgán fárrui birasministeriija ruhtadan boaresvuvddiid suodjalanfidnui, mas eananoamastus bissu eananeaiggádis, muhto stáhta máksá muoraid árvvu eaiggádii ja meahcci fas suodjaluvvo agibeaivái.

Osmo Seurujärvi ja Ilmari Tapiola
Muttošjávrri bálgosa boazoisit Osmo Seurujärvi (gurut) dadjá, ahte boaresvuovddi suodjaleapmi bálgosa guohtuneatnamiin lea buorre ášši sidjiide. Ohcejoga boazodáluid oktasašmeahci ságadoalli Ilmari Tapiola (olgeš) lea movttet, ahte maiddái davimus Lappis lea vejolašvuohta suodjalit boaresvuvddiid dákkár ortnega bokte. Govva: Vesa Toppari / Yle, Jouni Aikio / Yle

Ohcejoga boazodáluid oktasašmeahcci áigu suodjalit birrasiid 700 hektára sturrosaš meahcceguovllu Anára gieldda davvioasis, Muttošjávrre bálgosa guohtuneatnamiin.

Boazodáluid oktasašmeahcci lea vuolgán fárrui birasministeriija ruhtadan boaresvuvddiid suodjalanfidnui, mas eananoamastus bissu eananeaiggádis, muhto stáhta máksá muoraid arvvu eaiggádii ja meahcci fas suodjaluvvo agibeaivái. Vuovddi suodjaleamis Ohcejoga boazodáluid oktasašmeahcci lea oččodeame 892 000 euro sturrosaš buhtadusa.

Ohcejoga boazodáluid oktasašmeahci ságadoalli Ilmari Tapiola muitala, ahte oktasašmeahci jahkečoahkkin mearridii áššis ovttamielalaččat mannan vahkus.

– Olbmot giite, ahte dikšungoddi lea dákkár buori barggu bargan ja bohtosii beassan. Dieđusge go badjeolbmot leat guktuid bealde, de mii háliidit maid Anár beale badjeolbmuid beali leat. Dathan lea maiddái dehálaš, ahte boazodilli joatkašuvvá guktuid bealde nu bures go sáhttá, dadjá Tapiola.

Ohcejoga boazodáluid oktasašmeahcis leat eatnamat birrasiid 5 000 hektára, main boaresvuovddit 2 000 hektára. Dáin boares vuvddiin suodjaluvvo dál goalmmádas, muhto Tapiola mielde áigot guođđit ráfái dan loahpage.

– Mii eat gal mana čuohppat daid, dat gal jullot min beales orrut. Muhto doppe leat olu eará barggut, maid ferte bargat. Doppe leat muhtin sajit šaddan nu suohkadat, ahte doppe ferte veháš hárvet mehciid, muitala Tapiola.

Buhtadus máksojuvvo muoraid meari mielde

Suoma golbma davimus EJB-guovddáža ožžo diibmá birasministeriijas 20 miljovnna euro lassimearreruđa, mainna lea ulbmil suodjalit boaresvuvddiid. Dán rádjai boaresvuvddiid suodjalanprográmma lea olahan dušše máttimus Lappii, muhto dál maiddái davimus Sámi meahcceeaiggádat besset fállat iežaset vuvddiid suodjaleapmái.

Lappi EJB-guovddáža bajit dárkkisteaddji Ari Neuvonen muitala, ahte jus vuovddis galggaš oažžut buhtaduvvot muoraid árvvu, de dat ferte leat boaresvuovdi ja máŋggabealat luondduárvvuid dáfus.

– Galhan dása leamašan dárbu, ahte sáhttit viiddidit suodjaleami olles Lappi eanangoddái. Olbmuin leamašan duođaid beroštupmi ja juohke beaivve gii nu riŋge ja áiggošii suodjalit vuovddis, muitala Neuvonen.

Dán rádjái Lappi EJB-guovddáš lea dahkan logi suodjalansoahpamuša oktiibuot 450 hektáras ja mearreruđaid leat geavahan 620 000 euro ovddas.

– Buhtadus máksojuvvo vuovdeeaiggádii muoraid meari mielde. Dálá dilis leat 100 álgaga siste ja buoremus lági mielde mii geahččalit daid gieđahallat, čilge Neuvonen.

Neuvonen nanne, ahte Ohcejoga boazodáluid oktasašmeahci suodjalanáššis lea mearrádus boađi boađi lagaš beivviid.

– Vuovdi lea luonddudilis ja sturrodaga dáfus dat lea mearkkašahtti. Das lea maid suodjalanárvu, dadjá Neuvonen.

EJB-guovddážiid suodjalanruđat galget geavahuvvot jagi 2022 lohppii. Vel ii leat diehtu joatkašuvvágo doaibma dan maŋŋel.

Mäntymetsä alhaalta ylöspäin kuvattuna, kuvassa puiden latvustoja sinistä taivasta vasten.
Jus vuovddis galggaš oažžut buhtaduvvot muoraid árvvu, de dat ferte leat boaresvuovdi ja máŋggabealat luondduárvvuid dáfus. Govva: Antti Laakso / Yle

Bálggus ja oktasašmeahcci ráđđádallet vejolaš vuovdebargguin sierra

Ohcejoga boazodáluid oktasašmeahci ságadoalli Ilmari Tapiola lea movttet, ahte maiddái davimus Lappis lea vejolašvuohta suodjalit boaresvuvddiid dákkár ortnega bokte. Muttošjávrri bálgosis oktasašmeahci suodjalanášši lea ožžon buorre vuostáiváldima.

– Bálgosa bealdi leamašan buorre duvdda midjiide ja mii leat bálgosiin dál soahpan, ahte mii oažžut doppe eará sajis bargat daid meahccedoallobargguid, go fal ovttas soahpat dain. Miihan eat leat bargan lossa eanabargguid ja ploven daid eatnamiid guhkes áigái, go mii leat mearridan, ahte eat diekkáriid bargga, dadjá Tapiola.

Muttošjávrri bálgosa boazoisit Osmo Seurujärvi dadjá, ahte 700 hektára sturrosaš boaresvuovddi suodjaleapmi bálgosa guohtuneatnamiin lea buorre ášši sidjiide ja sávvamis maid oktasašmeahccái.

– Dáthan lea sámeguovllus historjjálaš ášši, dadjá Seurujärvi.

Muttošjávrri bálggus lea beaggán guhká das, ahte dat lea dorron vuovdečuohppamiid vuostá.

Guovlu, man muoraid ja eatnama dál suodjalit, lea bálgosa dálveguohtuneana. Ohcejoga boazodáluid oktasašmeahcci ja Muttošjávrri bálggus leat soahpan, ahte jus oktasašmeahcis lea dárbu vuovdebargguide, de das ráđđádallet sierra.

– Dat lea nu, ahte mii geahčadit maŋŋelaš, ahte makkár dárbbut doppe leat. Ahte soahpágo dat dohko, gosa sii háliidit. Gal mun jáhkán, ahte dat lihkostuvvá bures, dadjá Seurujärvi.

Yle Ođđasiid Sámis ja Beaivvi ságaid sáhtát maid guldalit Yle Areenas.

Beaividuvvon 17.6.2021 dii 13.40. Lasihuvvon diehtu buhtadussupmis, man Ohcejoga boazodáluid oktasašmeahcci oažžu vuovddi suodjaleamis.

Varrasamosat: Sápmi

Váldoođđasat

Varrasamosat

Muualla Yle.fi:ssä