Sápmi |

Ohcejoga geainnut leat buoremus ortnegis olles Lappis

Sámegielddain heajumus geainnut gávdnojit Eanodagas.

Gáregasnjárgga geaidnu 19.10.2017
Gáregasnjárgga geaidnu divoduvvui moadde jagi dassái. Govva: Vesa Toppari / Yle Sápmi

Johtolatdoaimmahat Väylä varraseamos dieđuid mielde Ohcejoga gielddas leat Lappi buoremus geainnut. Ohcejoga geainnuin badjel 80 proseantta gullet guovtti buoremus ortnetluohkkái.

Väylä meroštallá geainnuid ortnega luohkkáide, mas leat vihtta sierra ceahki. Guokte buoremus ceahki dán ortnegis leat dakkárat, main geainnuid meroštallet leat hui buori ortnegis eaige dat gáibit makkárge divodemiid.

Väylä dieđuid mielde Ohcejoga gielddas dušše veháš badjelaš 3 proseantta geainnuin leat heajos ortnegis ja dárbbašit jođánepmosit divodeami. Lohku lea unnimus olles Lappis.

Lappi heajumus geainnut Badje-Durdnosis

Nubbin buoremus geainnut Lappi eanangottis gávdnojit Muonás. Veardádallamis birgejit bures maiddái Keminmaa, Anára ja Soađegili gielddat. Anára geainnuin veháš badjelaš 70 proseantta gullet buoremus ortnetluohkáide. Soađegilis lohku lea 67,07 proseantta.

Heajumus geainnut sámegielddain gávdnojit Eanodagas, gos geainnuin leat buori ortnegis vuollái 60 proseantta. Eanodaga gielddas gávdnojitge olu eanet heajos geainnut, go eará sámegielddain. Heajumus ortnetluohkáide gullet Eanodagas badjel 11 proseantta gieldda geainnuin.

Heajumus geainnut olles Lappis leat Badje-Durdnosis, gos dušše 35 proseantta gieldda geainnuin gullet buoremus ortnetluohkáide.

Geainnuid ortnega eai dutka juohke jagi

Johtolatdoaimmahat Väylä loguid mielde eanemus geainnut leat fuolahan láhkai Roavenjárggas, oktiibuot 702 000 geaidnomehtera. Soađegilis geainnut leat lagabui 592 000 geaidnomehtera ja Anáris 580 000. Fuomášan veara lea, ahte váikko Ohcejogas leatge geainnut buoremus ortnegis olles Lappis, de doppe eai leat geainnut fuolahan láhkai go dušše 252 000 geaidnomehtera. Eanodagas lohku lea 336 000.

Johtolatdoaimmahat Väylä dutká váldogeainnuid ortnega 1-2 jagi gaskkaid. Dakkár geainnuid, gos lea unnit johtolat, dutket 3-4 jagi gaskkaid.

Varrasamosat: Sápmi

Váldoođđasat

Varrasamosat

Muualla Yle.fi:ssä