Sápmi |

Ohcejoga gielda lea álggaheamin prošeavtta eastadandihte iešsoardimiid

Ohcejoga gielda lea álggaheamin proševtta, man ulbmilin lea eastadit iešsoardimiid. Prošeavtta olis skuvllejuvvojit olbmot, vai sii máhttet riekta láhttet, juos soames áitái iešsoardimiin, muitala Ohcejoga gielddadoavttir Heidi Eriksen.

Olmmoš sáhttá juvssahallat lossa jurdagiidda goas beare ja vuostamužžan lea dehalaš, ahte lea gii nu geainna ságastit.  Danin Ohcejoga gielddadoavttir Heidi Eriksen leage bidjamin johtui prošeavtta vai bastet veahkehit.

– Mis leat iešsoardimat, mat guoskkahit unna servodagas hui stuorra joavkku, báhcet ollu morašteaddjit. Ja de leat gávnnahan dan maiddái, ahte sápmelaččaiguin eandalit lea váttisvuohta gávdnat dan veahki, ohcat dan veahki ja oažžut dakkár veahki.

Ohcejoga gielda lea ožžon badjel 80 000 euro sosial- ja dearvvasvuohtaministerias, vai besset álggahit dán prošeavtta. Davvi-Suomas ja nu maid Davvi-Ruoŧas ja Norggas leat ollu iešsoardimat ja máŋga eallima lea nohkan menddo árrat.

– Dovdet máŋga, geat lea dan bargan, muhto mii lihkká eat nákce hállat dán ášši birra, ja dárkkuhussan livčče maiddái nugo buktit dan áddejumi, ahte lea earáge vuogit, dallego bohtet váttisvuođat, de čoavdit daid go váldit iežas heakka, dadjá Eriksen.

Áigot skuvlet olbmuid rávvenbargui

Bargui áigot beassat jođánit vai oktage ii báze okto. Prošeavttas ulbmilin lea skuvlet olles čuohte olbmo, buot ahkásaččaid vai sii máhttet reageret juos soames áitá iešsoardimiin. Sii galget máhttit veahkehit olbmo ovddosguvlui ámmátveahki lusa. Dehaleamos vuosttas veahkki lea ságastallan.

– Dan skuvlejumi bokte livčče dárkkuhussan addit dan máhtu, mo veahkeha dakkár olbmo, mo doalvut dan ságastallama, maid mun galggan bargat dan dilis go mun háleštan geainna nu skihpáriin ovdamearkka dihtii, son muitala, ahte sus leat dákkár jurdagat dahje mun jearan njuolga ja son vástida joo, mus leat dakkár jurdagat, muitala Eriksen.

Riikkaviidosaš kriisatelefon 010 195 202 fállá veahki árgan dmu 9.00–07.00, vahkuloahpain ja bassebeivviin dmu 15.00–07.00.

Geahča tv-ášši dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä