Sápmi |

Ohcejoga gielda mearrida vuossárgga golmma skuvlla boahttevuođas – Dál maiddái Gáregasnjárgga skuvllalaččat buohcagoahtán garrasit

Ohcejogas galget ođađit skuvllaid ja beaiveruovttuid earret eará sisáibmováttisvuođaid dihte.

utsjoen kunta
Ohcejoga gielddadállu.

Ohcejoga gielddas galget gávdnot duođaige stuorra seđelat čuovvovaš jagiid áigge, go gielda šaddá ođadit olles skuvlafierpmádaga ja vel ovtta beaiveruovttu.

Vuosttamužžan veahčirat beaškigohtet Ohcejohnjálmmis, gos 5,4 miljovnna geavahuvvo ođđa máŋggadoaimmadálu huksemii.

Gáregasnjárgga ođđa skuvla plánenbargu lea maid álgimin ja buohkanassii ruhta galgá gávdnot 2,2 miljon euro. Gáregasnjárgga beaiveruovttu ossodat lea 600 000 euro.

Maŋimužžan leat Njuorggán skuvla ja máŋggadoaimmadállu ja dasa 1,6 miljovnna. Nuba jearaldagas leat lagabui logi miljon euro investeremat čuovvovaš jagiid.

Gielda šaddá ođađit skuvllaid ja beaiveruovttu earret eará sisáibmováttisvuođaid dihte. Váttisvuodaid leat dagahan sihke áttánáigásaš áibmomolsunrusttegat ja muđui heajos sisáibmu.

Ohcejoga váldostivra gieđahallá dán jagi bušeahta ja investerenplána čoahkkimisttis, mii álgá vuossárgga 14. beaivvi diibmu 12. Dalle de čielgá, maid gielda mearrida boahttevaš investeremiin.

Ohcejoga skuvlaguovddáš
Ohcejoga skuvlaguovddáža oktavuhtii lea plánejuvvon máŋggadoaimmadállu. Govva: Vesa Toppari / Yle

Gáregasnjárgga skuvla lea dán vahkus ohcagoahtán sadjásaš vistti

Ohcejoga Gáregasnjárgga skuvllas leat jo guhkit áigge gillán sisáibmováttisvuođain. Juovlamánus skuvllalaččat čálle gieldda njunnošiidda reivve skuvlla heajos ortnegis. Reivve mielde luohkkálanjain lea dálvit galmmas ja giđđat fas bahkka ja muđuige dat leat boaresáigásaččat. Reivve mielde máŋggas maid gillájit sierralágan sisáibmováivviin, dego oaivebákčasis ja njuni ja čalmmiid golgamis.

Oahppit muitaledje leat fuolas iežasit dearvvasvuođas ja das, mo sii nákcejit vázzit skuvlla dákkár dilis.

Gáregasnjárgga skuvlla veahkkerektor Pirjo Länsman-Kiimalainen muitala, ahte dilli vearránii sakka dán vahkus, go oahppit máhcce juovlaluomus skuvlii.

– Mis leamaš jo guhkit áigge dát váttisvuođat, muhto dál juovlaluomu maŋŋá oahppit buohccagohte eambbo go ovdal ja váttut bohte garrasabbon go ovdal. Liiki goiká ja njunnevardimat ja oaivebákčasat lassánedje jo nuppi skuvlabeaivve maŋŋá.

Gáregasnjárgga skuvla leage dán vahkus ohcagoahtán sadjásaš vistti skuvlavázzimii, 50 oahppái ja 15 oahpaheaddjái.

– Mii leat ohcagoahtán saji vuoi beasašeimmet fárret dáppe eret. Lean jo gulaskuddan ja jearahallan ja orru, ahte sáhtášeimmet oažžut dakkár saji. Doaivvu mielde beassat fárret nu jođánit go vejolaš, jo boahtte dahje maŋit vahkus.

– Dál mii leat vel skuvladálus. Mis leat guokte skuvlaráhkkanusa ja mii leat bahkken dan nuppi ráhkkanussii buohkat, go nuppi viesus olbmot garrasit reagerejit sisáibmui, Länsman-Kiimalainen muitala.

Ohcejohnjálmmis veahčirat beaškigohtet juo dán giđa

Ohcejohnjálmmi skuvllas veahčirat beaškigohtet juo dán giđa. Oktan ulbmilin leamašan, ahte dálá girjerádju, lihkadansále ja vuojadanhálla beasttašuvvet, muhto eará oasit ođaduvvojit. Man láhkái loahpa loahpas šaddá, dat lea váldostivrra gieđain.

Ohcejohkalaš váldostivraáirras Anni Koivisto lea ieš vázzán Ohcejohnjálmmi skuvlla. Nuba son dovdá bures dán ráhkkanusa.

Su mielas divvun- dahje ođđasithuksenjurdagiid livčče galgan juo áiggil ovddidišgoahtit, muhto buorre nuge, ahte juoba dál ášši buorrin dahkkojuvvo juoidá. Su mielas áššis ságastallamii goit livčče galgan leat eambo áigi.

Anni Koivisto goittot lohká leat duođaige duđavaš dáid boahttevaš plánaide. Su mielas skuvlaášši lea dakkár, man lea bággu čoavdit.

– Juos olbmot šaddet ballat iežaset dearvvasvuođa bealis, dat ii sáhte leat mange namas riekta, Anni Koivisto dadjá.

Anni Koivisto
Váldostivraáirras Anni Koivisto mielas lea buorre, ahte skuvlaáššit viimmat čovdojuvvojit. Govva: Juuso Voutilainen

Gildii eallinfápmu investeremiid bokte

Ohcejoga gielddahoavda Vuokko Tieva-Niittyvuopio mielas gielda galgá bastit fállat mánáide ja nuoraide albma beaivedikšo- ja skuvlalanjaid. Dáid investeremiid son gohčoda gieldda eallinfápmoinvesteremin.

Daid bokte ulbmilin lea buoridit bargofámu oažžuma gildii ja nuppe dáfus fas dorvvastit ohcejohkalaš mánáide ja nuoraide ovttaveardásaš skuvlavázzinvejolašvuođaid ruovttubáikegottis.

– Báikegotte nuorat galget beassat vázzit skuvlla Ohcejogas dassážii, go vulget bargoeallimii dahje eará skuvllaide gieldda olggobeallai, dadjá Tieva-Niittyvuopio.

Gielddahoavda Vuokko Tieva-Niittyvuopio
Ohcejoga gielddahoavda Vuokko Tieva-Niittyvuopio doallá investeremiid dehálažžan gieldda eallinfámu dihte. Govva: Yle Sápmi

Mo Ohcejoga skuvlafierpmádaga boahttevuohta čovdojuvvo, vuossárgga beaivit lea gielddaviesus vejolašvuohta čuovvut váldostivrra čoahkkima diibmu 12 rájis.

Varrasamosat: Sápmi

Váldoođđasat

Varrasamosat

Muualla Yle.fi:ssä