Sápmi |

Ohcejoga gielda rahčá deavdit oahpaheaddjid virggiid – muhtin virggit ohcan láhkai dál jo goalmmát geardde

Ohcejoga gieldda čuvgehuslávdegoddi bastii deavdit 12 bargosajis dušše guokte, eará virggiid ohcanáiggi fertii joatkit.

Utsjoki
Ohcejoga čuvgehusdoaimma bealde leat olu rabas virggit, muhto unnán ohccit. Govva: Jouni Aikio / Yle

Ohcejoga gielda rahčá deavdit oahpaheaddjiid virggiid ja eará čuvgehusdoaimma bargosajiid. Čuvgehuslávdegotti maŋemuš čoahkkimis maŋŋebárgga 12.3. ledje áššelisttus 12 bargosaji deavdima. Dain virggiin čuvgehuslávdegoddi bastii deavdit dušše guokte; davvisámegielat mánáidgárdeoahpaheaddji virggi Gáregasnjárgga beaivedikšui ja Sámelogahaga ja vuođđooahpahusa gielaid lektora virggi Ohcejohnjálmmi skuvlii.

Eanáš oassi gieldda skuvlla ja árrabajásgeassima virggiin ja bargosajiin leat leamaš juo guktii ohcan láhkai. Čoahkkimisttis Ohcejoga čuvgehuslávdegoddi mearridii joatkit ain logi eará bargosaji ohcanáiggiid, dál jo goalmmát geardde.

Skuvladoaibma ohcá rektora lassin earret eará luohkáoahpaheaddjiid, diibmooahpaheaddjiid ja veaigedoaimma várás láidesteaddjiid. Árrabajásgeassima bealdeges ohcet gelbbolaš sadjásačča. Bargosajit leat sihke Gáregasnjárggas, Njuorggámis ja Ohcejohnjálmmis.

Riŋgemiin rekryteret olbmuid

Gielddas leat oahpahusa ordnemii čovdosat, muhto liikká gávdnojit muhtun virggit maidda gáibiduvvo dál ohcci, muitala Ohcejoga čuvgehusdoaimmajođiheaddji Laura Arola.

– Mii dárbbašit dál eandalii sámegiela lektora, gii sáhttá oahpahit maid logahaga dásis sámegiela eatnigiellan. Sivvan lea dat go min guhkes áigásaš lektor báhcá ealáhahkii, čilge čuvgehusdoaimma hoavda Laura Arola.

Laura Arola
Ohcejoga čuvgehusdoaimmajođiheaddji Laura Arola ferte álgit riŋgedallat olbmuide. Govva: Laura Arola / Priváhta

Ohcejohnjálmmi skuvllas leat guokte sámegielat luohkáoahpaheaddji virggi deavddekeahttá. Goappáge virgái lei okta ohcci, muhto nuppis váilu sámegiela máhttu ja nuppis ii leat gáibiduvvon gelbbolašvuohta. Dál čuvgehusdoaimmas sávašedje gelbbolaš, sámegielat ohcciid goappáge virgái. Arolas leat ain buorit rekryterengoansttat.

– Várra viiddidit ohcama doppe bargofápmodoaimmahaga bokte ja persovnnalaččat vel riŋget. Diehtit geat leat dáppe eret ja geat leat stuđeren sámegiela, de dáidda sáhttit riŋget ja jearrat jos livčče vejolaš boahtit, smiehtada Arola boahtte čavčča oahpaheaddji dili.

Ohcejogas ordnejit oahpahusa guovtti gillii, sihke suoma- ja sámegillii. Gielda šaddáge vihkkehallat bargosaji mielde čovdosiid ja vuoruhemiid.

– Sámegielat mánáidgárddi divššáris dahje luohkáoahpaheaddjis gáibidit sámegielat máhtu. Ii leat vejolaš bidjat suomagielat olbmot bargat. Fertet vuoruhit giellamáhtu vaikko ii livčče gelbbolašvuohta.

– Ohcejohnjálmmi badjeskuvlii ja logahahkii fertet muhtumin válljet gelbbolaš suomagielat oahpaheaddji oahpahit man nu ávdnasa ja dalle dat ii leat sámegillii. Dat lea hui olu virggis gitta. Sámegielat virggiide lea bággu vuoruhit giela, deattuha Arola.

Varrasamosat: Sápmi

Váldoođđasat

Varrasamosat

Muualla Yle.fi:ssä