Sápmi |

Ohcejoga gielda váldá logi miljon euro loana skuvllaid ja beaiveruovttuid ođadeapmái

Soahpamušat vel báhpára ala ja barggut besset álgit.

Ohcejotnjálmmi skuvlaguovddáš
Maiddái Ohcejotnjálmmi skuvlaguovddážis álget ođadanbarggut, gárvvis galggašii leat jagis 2021. Govva: Vesa Toppari / Yle

Ohcejoga gielddaráđđehus dohkkehii skuvla- ja beaiveruoktofidnuid ruhtadeami oasusbáŋkku fálaldaga vuođul. Loatnamearri lea logi miljon euro, loatnaáigi guoktelot jagi ja reantun logi jagi fásta reantu 0,75 %.

Ohcejoga gieldda váldostivra lea dán jagi bušeahta oktavuođas mearridan álggahit skuvla- beaiveruokto -investerenfidnu. Oaivilin lea ođadit Ohcejotnjálmmi, Gáregasnjárgga ja Njuorggáma skuvla- ja beaiveruoktovisttiid. Huksenfidnu álgá geassit 2019 ja lea ollásit gárvvis jagi 2021 áigge. Skuvllaid ja beaiveruovttuid ođadeami ollislaš golut leat sullii logi miljon euro.

Čoahkkimisttis vuossárgga geassemánu 3. beaivve gielddaráđđehus evttohii váldostivrii dohkkehanláhkai diimmá ruhtadoalloloapaheami. Dat lea lagabui 720 000 euro badjelbázalaš. Gieldda loatnavuođđu jagi 2018 loahpas lei badjelaš 4,4 miljon euro. Diibmá Ohcejoga gielda ii lokten ođđa guhkesáigásaš loanaid.

Varrasamosat: Sápmi

Váldoođđasat

Varrasamosat

Muualla Yle.fi:ssä