Sápmi |

Ohcejoga gielddahoavda ávžžuha buohkaid boahtit dilálašvuođaide ođđa Deanu soahpamuša birra – Sáhttá čuovvut maid neahtas

Dán vahkus Ohcejoga gielddas ordnejuvvojit guokte dieđihan- ja ságastallan dilálašvuohta ođđa Deanu soahpamušhápmosa sisdoalu birra. Ohcejoga gielddahoavda Vuokko Tieva-Niittyvuopio ávžžuha buohkaid boahtit dilálašvuođaide.

Vuokko Tieva-Niittyvuopio
Vuokko Tieva-Niittyvuopio Govva: Sara Wesslin / Yle

Ohcejoga gielddahoavda Vuokko Tieva-Niittyvuopio ávžžuha buohkaid oassálastit dilálašvuođaide ođđa Deanu soahpamušhápmosa sisdoalu birra.

Ohcejoga gielddas ordnejuvvojit guokte dieđihan- ja ságastallan dilálašvuohta Deanu soahpamušhápmosa birra.

– Lea erenomáš dehálaš, ahte nu máŋggat jo vejolaš bohtet muitalit iežaset oaiviliid ášši birra. Dilálašvuohta sáddejuvvo neahta bokte, nu ahte buohkat, geaid ášši guoská maiddái máddin, besset čuovvut dan, dadjá Tieva-Niittyvuopio.

Dilálašvuođas soahpamušhápmosa birra addá dieđu ráđđádallangotti lahttun doaibman Anne Nuorgam. Báikki ala bohtet luohttámušolbmot Ohcejoga gieldda ovddasteaddjin ságastallat ja guldalit gieldda olbmuid oaiviliid.

Otne Ohcejogas, ihttin Gáregasnjárggas

Ohcejoga Áilegasdálus ordnejuvvo dilálašvuohta otne 7.7.2016 diibmu 16.00 ja Gáregasnjárgga Gilidállu Sáivus bearjadaga 8.7.2016 diibmu 16.00.

– Erenomážit ávžžuhan daid olbmuid boahtit, geat dovdet, ahte sin vuođđolágalaš vuoigatvuođaid leat dál sihkkumin eret, ja turismasuorggi fitnodatdoalliid, Tieva-Niittyvuopio dadjá.

Deanu soahpamušhápmosis árbevirolaš bivdu geahpeduvvo sullii 80 proseantta dálá dásis ja turistabivdu 40 proseantta ja Ohcejogas bajásšaddán gávpotsápmelaččat eai beasa šat ollenge bivdit árbevirolaš bivdosiiguin.

– Mu mielas guolástanvuoigatvuođaid hálddašeaddjit, geat orrot eará sajiin Suomas, nappo sámeguovllus eret fárren sápmelaččat, galggašedje dál garrasit buktit ovdan oaiviliideaset das, ahte mo sin sajádat dán ođđa soahpamušas rievdada, dadjá Tieva-Niittyvuopio.

Dilálašvuođaid sáhttá geahččat neahta bokte, jos beare teknihká doaibmá.

Varrasamosat: Sápmi

Váldoođđasat

Varrasamosat

Muualla Yle.fi:ssä