Sápmi |

Ohcejoga girkohearrán nammaduvvon Päivi Aikasalo oaidná barggu hástalussan sámegiela máhtu ja searvegotti ekonomiija

Päivi Aikasalo lea čatnasan skáhppot sámegiela máhtu, mii gáibiduvvo Ohcejoga girkohearrá virggis.

Päivi Aikasalo
Govva: Anneli Lappalainen / Yle Sápmi

Mannan vahkus Oulu bismagotti duopmokapihttal nammadii Päivi Aikasalo Ohcejoga girkohearrán čakčamánu álggu rájes. Virgi lei rabas juo diibmá, muhto dalle dasa eai lean ohccit. Dán giđa virggi bidje ođđasit ohcanláhkai ja Aikasalo lei áidna ohcci.

Bargu lea sutnje juo oahpis, leahan son bargan girkohearrá sadjásažžan Ohcejogas jo badjelaš guokte jagi. Aikasalo lea duđavaš fásta virgái.

– Máŋggalágan bargu lea ovddas. Lean dán barggus ilus ja giitevaš.

Hástalusatge leat. Searvegotti velggiid dihtii Ohcejoga searvegoddi galggai vuođđudit Anára searvegottiin oktasaš Davvi-Lappi searvegotteovttastumi. Dat ii goittotge sihkkon eret searvegotti ruhtaváttisvuođaid.

– Mis leat oallelágan ekonomalaš hástalusat. Searvegottis leat olu giddodagat iige searvegotteovttastumi burssasge leat mearehis olu ruhta.

Searvegoddi sávváge girkoráđđehusas ain doarjagiid vai bastet doallat giddodagaid ortnegis.

– Leat ožžon girkoráđđehusas doarjagiid báhppala ja Ohcejoga girku divodeapmái, muhto dárbbašat daid ain lasi. Mii galgat maid ieža smiehttat ovdamearkka dihtii dan, makkár searvegotti mii háliidat vaikkoba 20 jagi geahčen. Galgá máhttit geahččat guhkkelebbui ja dat lea hástalus.

Aikasalo lohká alddes leat maid okta persovnnalaš hástalus: sámegiela máhttu. Muhtin osiid ipmilbálvalusas son jo lohká davvisámegillii, muhto oahpu galgá ain gazzat.

– Dat gullá dán virgái, ahte dan galgá muhtinláhkai hálddašit, dadjá girkohearrá Päivi Aikasalo.

Searvegotteráđđi lei evttohan virggi ođđasit rahpama

Ohcejoga searvegotteráđđi livččii vuordán girkohearrás buori sámegiela máhtu. Dat leige sivvan dasa, manin searvegotteráđđi lei evttohan duopmokapihttalii, ahte virgi biddjojuvvošii ođđasit ohcanláhkai.

– Boarrásut olbmot leat váillahan sámegiela searvegotti doaimmain. Sieludikšumis sámegiella livčče hui dehálaš. Das ii leat persovnnalašvuohta girkohearrá vuostá, dadjá searvegotteráđi lahttu Väinö Guttorm.

Ášši lea dál gieđahallon lohppii, go duopmokapihttal lea bargan virgemearrádusa. Päivi Aikasalo dadjá, ahte dál livččii dárkkuhus gávdnat áiggi oahpahallat sámegiela.

– Maiddái duopmokapihttalis lea višuvdna dán áššis, ahte mo dása álgit ovttas eará searvegotti bargiiguin, muhto dat lea ain gaskan, ahte mo dat dikšojuvvo, muitala Aikasalo.

Varrasamosat: Sápmi

Váldoođđasat

Varrasamosat

Muualla Yle.fi:ssä