Sápmi |

Ohcejoga ja Leammi sávzageahččin fas badjel 2 000 ohcci – beroštupmi lassánan jagis jahkái

Meahciráđđehus vuorbáda sávzagehččiid guovvamánu áigge.

Lampaat niityllä
Leammi álbmotmeahcis Gábe-Jovnna giettis guhtot sávzzat maiddái boahtte gease. Govva: Olli Järvenkylä

Ohcejoga Jeagelveaji ja Leammi Gábe-Jovnna gittiid sávzzaid guođoheaddjin ohce dánge jagi badjel 2 000 olbmo.

Meahciráđđehus ozai guođoheddjiid boahtte geassái 15 sierra báikái miehtá Suoma. Sámeguovllus sávzaguođoheddjiid ohce Leammi álbmotmeahci Gábe-Jovnna gieddái ja Ohcejoga Jeagelveadjái.

Ohcejohkii bohte 1 286 ja Leammái 1 212 ohcamuša.

– Dát guokte báikkihan leat álo bivnnuhat. Daidda báikkiide leat álot olu ohccit, dábálaččat eanemusat. Dán jagi bođii ođđa báiki, Punkaharju, de dat veháš manai ovddabeallai, go ođđa báiki lea álo ođđa báiki, muitala Hannele Kytö Meahciráđđehusa Luonddubálvalusain.

Hannele Kytös lea árvalus, manin Sápmi geasuha sávzagehččiid.

– Sápmi lea fiinnis ja geasuheaddji, ja mis leat hui olu ohccit Mátta-Suomas. Siihan millosit vulget lupmui davás, go dát báikkit leat nu fiidnát.

Guođohanvahkut geasuhit eanet ja eanet

Meahciráđđehusa guođohanvahkuide bohte olles Suomas 15 638 ohcamuša. Guođohanvahkut leat šaddan jagis jahkái bivnnuhabbon. Dán jagi ohccit ledje badjel 4 000 eanet go diibmá, goas guođohanvahkuide bohte 11 609 ohcamuša.

Hannele Kytö árvala, ahte ráffi ja jaskatvuohta dat geasuhit olbmuid.

– Dát leat dakkár báikkit, gos sáhttá návddašit luonddu ráfis ja addit áiggi alcces. Dasto beassá vel njávkkadit sávzzaid das seammás. Dálá olmmoš váillaha ráfi ja jaskatvuođa, gal mun dajašin ahte dat lea dat stuorámus sivva, manin ohcalit guođoheaddjin.

Kytö illudage, ahte nu máŋgasat leat beroštuvvan barggus.

– Siihan oassálastet hirbmat divrras luonddusuodjalanbargui, go bohtet daidda báikkiide. Dát leat mávssolaš kulturárbebáikkit ja lea hui buorre, ahte olbmot háliidit oassálastit daid seailluheapmái.

Sávzageahččit vuorbáduvvojit guovvamánus. Sávzageahččin válljejuvvon olbmot mákset guođohanvahkuin ja boađuid geavahit guođohanbáikkiid bajásdoallamii ja luonddu dikšumii.

Varrasamosat: Sápmi

Váldoođđasat

Varrasamosat

Muualla Yle.fi:ssä