Sápmi

Ohcejoga, Kárášjoga ja Poršáŋggu gielddaid oktasaš girjebusse vuojut nohket ruhtavátnivuođa dihtii

Unna gilážiid olbmot leat báhcimin girjerádjobálvalusa haga, go girjebusse heaitá vuodjimis juovlamánus.

Toivo Rasmus on kuljettanut pitkään Suomen ja Norjan yhteistä kirjastoautoa. Mittariin on kertynyt yli kolme sataa tuhatta kilometriä. Utsjoki 3.9.2019
Elle Ovllá Toivo lea vuojestan girjebussiin badjel 300 000 kilomehtera Govva: Tapani Leisti / Yle

OHCEJOHKA Vilges girjebusse vuodjá Deanuleagis. Nuppe bealde ceaggájit alla várit ja nuppe bealde golgá Deatnu.

Vuoddji Elle Ovllá Toivo, Toivo Rasmus, bisseha girjebusse Fierranjogas, gos Jovnna Jon Ánne Máret, Maarit Paltto lea vuorddašeamen. Palttos šaddá mátki Ohcejoga gieldda áidna girjerádjui 80 kilomehtera. Guhká son ii beasa girjebusse fálaldagas šat illudit. Girjebusse vuojut nohket juovlamánus.

– Gal dat lea buorre bálvalus. Dál go dat nohká, de ferte moraštišgoahtit. Fertetgo mii mannat Ohcejohkii dasto iežaimet billain vai gean nu fáros, smiehtada Paltto.

Maarit Paltto Utsjoen kirjastoautossa.
Girjebusse bisána Jovnna Jon Ánne Máret buohta golmma vahku gaskain Govva: Tapani Leisti / Yle

Ohcejoga, Kárášjoga ja Poršáŋggu gielddaid oktasaš girjebusse lea johtán sullii 30 jagi. Hilduin leat girjjit, aviissat, bláđit, filmmat ja jietnagirjjit njealji gillii: sáme-, suoma-, dáro- ja kveanagillii.

Norgga bealde sámediggi lea geahpedan jahki dassái iežas oasi girjebusse ruhtadeamis. Kárášjoga ja Poršáŋggu gielddat eai bastte ruhtadit dan oasi, mii báhcá váilut.

Maarit Paltto on Girjebussen vakioasiakas. Häntä palvelee Soile Kokkonen.
Girjerádjobargi Soile Kokkonen bálvaleamen Jovnna Jon Ánne Máreha Govva: Jarmo Honkanen / Yle

Girjebusse lea bálvalan unna gilážiid

Girjebusses bálvala Soile Kokkonen. Su mielas girjebusse doaimma galggašii joatkit.

– Girjerádju lea okta demokratiija bargoneavvu, dan jukset buohkat. Mii mannat dohko, gos min dárbbašit, vaikko olbmuid ruovttuide, dadjá girjebussebargi Kokkonen.

Girjebusse lea bálvalan unna gilážiid skuvllaid, mánáidgárddiid ja eará olbmuid. Ohcejohka lea dál čielggadeamen ovttasbarggu Anára gieldda girjebussiin. Maiddái vejolaš ovttasbargu Deanu ja Unjárgga gielddain čielggaduvvo.

– Gal gielda hálida fállat girjerádjobálvalusaid maiddái boaittobealguovlluin ja giliguovddážiidda, gos leat skuvllat ja mánáidgárddit. Mii leat čielggadeamen mo sáhttit dorvvastit bálvalusaid vel dás ovddosge, muitala Ohcejoga girjerádjohoavda Tuija Guttorm.

Varrasamosat: Sápmi

Váldoođđasat

Varrasamosat

Muualla Yle.fi:ssä