Sápmi |

Ohcejoga logahaga studeantavisti lea gárvvis – sávvet dan dievvat boahtte čavčča ođđa oahppiiguin

Dál gielddas vurdet maiddái Ohcejoga ja Gáregasnjárgga ođđa skuvllaid huksenbargguid geargama.

Utsjoen opiskelija-asunnot
Ohcejogas ođđa studeantavisttis leat oktiibuot 12 lanja ohppiide. Govva: Vesa Toppari / Yle

Ođđaáigásaš ja beanta čuovgi ođđa sajiid lea sihkkarit illu čájehallat. Ohcejoga logahaga ohppiid várás huksejuvvon ođđa studeantavisti lea ožžon ássiidis ođđajagimánu álggus.

Sadjásaš rektor-čuvgehushoavda Eila Tapiola muitala, ahte oahppit leat leamašan hui movtta ođđa orrunsajiin. Tapiola lei ieš oaidnimin, go oahppit fárrejedje sisa.

– Mun ledjen čohkkemin viessogálvvuid ovtta vahkkuloahpa, go studeanttat bohte dohko. Gal sii ledje ilus ja geahčadedje hui movttegit ođđa sajiid ja dutke buot. Sii ledje mu mielas duđavaččat dan ođđa ásodaga ivdnái ja hápmái, muitala Tapiola.

Gieldda huksendárkkisteaddji Markku Porsanger lea maid mojunjálmmiid.

– Čakčat álggahedje ásodaga huksema ja oalle jođánit dat ceagganii. Buorre, ahte fidniimet ásodaga jo dán giđđii atnui, muitala Porsanger.

Markku Porsanger
Ohcejoga gieldda huksendárkkisteaddji lohká, ahte ođđa studeantavisti lea maid seastun. Govva: Vesa Toppari / Yle

Studeantavisti lea dego ráidodállu, mas leat guokte vistti.

Nuppi bealde ásset vihtta logahaga studeantta. Nubbi oassi lea skuvlla ánus.

– Nubbi bealli lea skuvlla gaskaboddosaš sadjin. Mis leat skuvlla bealde nu stuorra sisáibmováttisvuođat, ahte suomagielat vuolledássi studere dál dáppe, muitala Tapiola.

Studeantavisttis leat guhtta lanja goappat bealde. Guktuid bealde leat oktasaš gievkkan, basadanlanjat ja hivssegat. Ođđa visti sihkkarit lasiha nuoraid movtta ássat Ohcejogas, jáhkká Porsanger.

– Sii besset leat ovttas ja boahtá dakkár oktasaš dovdu seammás. Sávvamis oahppit liikojit leat dáppe ja buohkain lea buorre dovdu, dathan lea doarvái.

Boares ásodaga boahttevuođas ii leat diehtu

Dán čávčča logahaga studeanttat ásse vel boares ásodagas, mii lea Ohcejoga skuvlaguovddáža máttageažis. Skuvlaguovddáš lea huksejuvvon jagis 1976.

Go logahaga oahppit guđđe boares ásodaga, earát bohte sadjái, muitala Tapiola

– Doppe leat iešalddes dál moadde olggobeale olbmo, sii leat láigohan doppe lanja, muitala Tapiola.

Eila Tapiola
Ohcejoga gieldda sadjásaš rektor-čuvgehushoavda Eila Tapiola lei ieš studeantavisttis čohkkeme viessogálvvuid, go oahppit oidne ođđa sajiid vuosttaš geardde. Govva: Vesa Toppari / Yle

Mii boares ásodahkii dahje skuvlaguovddážii dáhpáhuvvá, das ii leat dahkkojuvvon vel čielga mearrádus.

– Boahtte jagi mii dalle geahččat, mii dan boares skuvlavistái dáhpáhuvvá. Dieđusge dat ii leat čuvgehusdoaimma bargu dan árvvoštallat muhto gielddas eará olbmot dahket dan.

Geassit illu lea golmmageardásaš ja seastu maid boahtá

Ohcejogas leat investeren olu skuvladoaimmaid buorrin ja geassit galget gárvánit ođđa skuvllat nu Ohcejohkii go Gáregasnjárgiige.

Huksemiide lea mannan olu ruhta, muhto ovttaláhkai ođđa skuvllat leat seastun ja ávkin goit čuovvovaš 50 jagi, čilge Porsanger.

– Giddodagain fuolaheapmi báhcá unnibun. Buot golut unnot mealgadit, go ođđa visttit leat mearrádusaid mielde huksejuvvon. Seastu máŋggaláhkai, dadjá Porsanger.

Varrasamosat: Sápmi

Váldoođđasat

Varrasamosat

Muualla Yle.fi:ssä