Sápmi |

Ohcejoga nuorat ožžot frisbeegolfbáikki

Ohcejoga nuoraidstivra lei dahkan evttohusa frisbeegolfbáikki huksemis Ohcejohtnjálbmái ja vejolašvuođaid mielde Gárgegasnjárgii. Gielda lea dorjon evttohusa 20 000 euroin ja huksen álgá geassemánus.

Frisbeegolf.
Frisbeegolf lea šaddán eambbo dovddus maid davvin. Dát govva lea Anára speallanbáikkis. Govva: Yle

Ohcejoga nuoraidstivra lea evttohan hukset Ohcejohnjálbmai frisbeegolf- dahje skearrogolfbáikki. Ohcejoga gielda doarjjui evttohusa ja frisbeegolfbáikki huksen álgá geassit.

Nuorat gáibidedje ođđa vejolašvuođaid

Lei Ohcejoga nuoraidstivra ovttas gieldda lihkadandoaimmain, mii evttohii báikki huksema, muitala nuoraidstivrra, dál juo ságajođiheaddji báikki guođđán, Tuomo Laiti.

– Ohcejoga lihkadandoaimmajođiheaddji Tommi Kanalas lei álgojurdda ja son jearai min nuoraidstivrras fárrui dasa ja mii leimmet ovttamielat, ahte dat lea buorre hommá, dadjá Laiti.

Frisbeegolf ulbmilin lea bálkut frisbeeskearru koriide. Spealu áigge jurddan lea johtit kores nubbái, seamma vugiin go golfas.

Ođđa speallanbáikki mielde ohcejohnuoraid buđaldanvejolašvuođat buorránit ja Laiti jáhkká dan leat buorrin nuoraide.

– Mun gáttán, ahte buriin mielain váldet dán ođđasa. De gal lea mis meastá visot Ohcejogas, gávnnaha Laiti.

Olles ruhtadeapmi ii vel čoahkis

Ohcejoga lihkadandoaimmajođiheaddji Tommi Kanala muitala, ahte olles gáibádusaid mielde huksejuvvon frisbeegolfbáikki huksen mávssášii gaskkal 30 000-40 000 euro ja Ohcejoga gielda leage ohcan fidnui ruhtadeami guovlohálddašandoaimmahat AVI:s.

Vaikke ruhtadeapmi ii juolluduvvošiige, de huksen álggahuvvo unnit viidodagas gieldda juolludan 20 000 euroin, muitala Kanala.

Kanala goittotge sávvá, ahte Ohcejohnjálbmái sáhtášedje hukset speallanbáikki standárddaid mielde 19 koriin. Lassin sis lihkadandoaimmas lea jurddan hukset nuppi speallanbáikki Gáregasnjárgii.

Dál eai vel dieđe gosa Ohcejohkii báiki huksejuvvo. Oktan vejolašvuohtan livččii boares ruskabáiki Máttajávreguolbanis.

Varrasamosat: Sápmi

Váldoođđasat

Varrasamosat

Muualla Yle.fi:ssä