Sápmi |

Ohcejoga ođđa skuvlla huksen ovdána – Oahppit sisa juo boahtte čavčča

Jus huksenbarggut ovdánit plánaid mielde, de boahtte giđa Ohcejohnjálmmis besset rohttet giđđasálmma ođđa skuvlaguovddáš-máŋggadoaimmadálus.

Ohcejoga skuvlla huksen ohcejohka utsjoki
Geađgejuolgi lea jo ceagganan Ohcejohnjálmmi skuvlaguovddáža dálá ráhkkanusaid davábeallai. Govva: Kaisa Aikio / Yle

Ohcejohnjálmmi ođđa skuvlamáŋggadoaimmadálu huksenbarggut leat vuolgán johtui geasi áigge. Skuvllalaččat besset šávihit ođđa lanjaide maŋimuštá boahtte čavčča. Ohcejogas goit vurdet gealdagasas huksenbargguid ovdánit nu, ahte juo giđđafestii beasašedje ođđa ráhkkanussii.

Boahtte dálvi de čájeha, man jođánit huksenbarggut ovdánit. Ráhkkanusa hápmi lea juo oaidnimis, go geađgejuolgi lea ceagganan Ohcejohnjálmmi skuvlaguovddáža dálá ráhkkanusaid davábeallai.

Geahčada duhtavažžan ovdáneami

Ohcejoga gieldda huksendárkkisteaddji Markku Porsanger lea duhtavaš bargguid ovdáneapmái.

– Na dat gal lea suohtas juohke beaivvi oaidnit, go vuolgá bajás guvlui dat vistti. Ja dieđusge barguhan gal lea issoras, muhto gal dan go diehtá, dat lea čielga áigetávval ja mállet mo doaibmat, de dat gal manná bures, dadjá Markku Porsanger.

Markku Porsanger lea Ohcejoga gieldda huksendárkkisteaddji.
Ohcejoga gieldda huksendárkkisteaddji Markku Porsanger. Govva: Vesa Toppari / Yle

Ohcejoga gielddas leat sullii 130 skuvlalačča ja beaiveruovttumáná šaddan sadjásaš lanjaide sisáibmováttisvuođaid dihte. Dát dilli guoská nu Ohcejoga girkosiidda go Gáregasnjárgga.

Ohcejoga skuvlalaččat šadde ovddit giđa guođđit dálá skuvlaguovddáža sisáibmováttisvuođaid geažil. Dilli leat goit čoavdašuvvamin juo jagi geažis, nu ahte Ohcejogas leat guovtte jagis bastán čoavdit goit giliguovddáža skuvlla ja beaiveruovttu dili.

– Jus giđđa manná bures, de giđđafeasta sáhttá juo dáppe ođđa skuvllas doallat. Áigi dan čájeha, mo dat manná, dadjá Markku Porsanger.

Oahppit vázzet skuvlla ráidodálloviesuin – oassi johttá Sirpmás

Skuvlla tevnnegiid besset dál duhtavažžan bláđet go 1 800 njealjehasmehtera viidosaš skuvllas šaddá nu vuogas.

Ohcejoga gieldda sadjásaš skuvladoaibmahoavdarektor Salme Tarkiainen illuda go áššit leat ovdánan nu jođánit.

– Lea nu somá go jođánis áigetávvaliin leat bastán áššiid čoavdit ja ovddidit. Lea somá oaidnit geađgejuolggi ceagganeame, dadjá Tarkiainen.

Son maid giitala skuvllaid gaskasaš ovttasbarggu Sirpmá skuvllain Norgga bealde, nuppe bealde rájá. Ohcejohnjálmmi vuolledási sámegielat luohkáid mánát vázze skuvlla mannan dálvve Sirpmás.

Ovttasbargu joatkašuvvá boahtte dálvvi nu, ahte mánát leat guokte beaivvi vahkus skuvllas Sirpmá giliskuvllas, moadde miila Ohcejohnjálmmi gili vuolábealde.

Muđui Ohcejoga skuvlalaččaid sadjásaš luohkálanjat leat ráidodálloviesuin boares skuvlaguovddáža láhkosis. Salme Tarkiainen giitala ordnemiid, go buohkaide lea sadji. Seammás son goit šaddá šállošit Ohcejoga márkana váttis láigoviessodilli, go buot vejolaš viesut leat dál geavahusas.

Salme Tarkiainen
Ohcejoga gieldda sadjásaš skuvladoaibmahoavdarektor Salme Tarkiainen Govva: Vesa Toppari / Yle

Anáris ja Soađegilis vurdet ođđa skuvllaid

Olles Lappi eanangottis leat buohkanassii sullii 2 900 skuvlalačča šaddan sadjásaš doaibmalanjaide sisáibmováttisvuođaid dihte.

Nu Ohcejogas go máŋgga eará sajis váttisvuođaid leat dagahan áibmomolsunrusttegat. Áibmomolsuma dihte sisáibmui besset mineralullogávjjat.

Anára gielddas 400-500 oahppi šaddet birget sadjásaš lanjain velá gitta jahkái 2022 ovdalgo ođđa skuvlaguovddáš gárvvásmuvvá Avvilii.

Maiddái Anára márkana skuvllas leat sisáibmováttisvuođat ja dat lea maiddái gárži oahppiid logu ektui. Sadjásaš lanjaid leat ožžon earret eará Sámi kulturguovddáš Sajosis, gos vázzet dálá dilis skuvlla 40 oahppi.

Soađegilis nu Sompio go Aleksanteri Kena -skuvllain maid leat sisáibmováttisvuođat. Doppege 400-500 oahppi šaddet birget giliguovddážis sierralágan sadjásaš doaibmalanjain. Ođđa máŋggadoaimmatguovddáš galggašii gárvvásmuvvat jagis 2022 dego Avvilisge.

Stuorát gielddaid ektui Ohcejoga dilli orroge leamen govttolaš, go juo jagi geažis girkosiiddas besset ođđa vissui ja Gáregasnjárggas ja Njuorggámis skuvlahuksemat leat álgime jáhkkimis lágaš áiggiin.

Varrasamosat: Sápmi

Váldoođđasat

Varrasamosat

Muualla Yle.fi:ssä