Sápmi |

Ohcejoga rihppaskuvla lea nu bivnnut, ahte čohkke nuoraid miehtá Sámi

Ohcejoga rihppaskuvla lea nu bivnnut ja beakkán, ahte dohko háliidit nuorat miehtá Sámi. Sápmelaččaide konfirmašuvdna lea čađat leamašan earenomáš dehálaš, muitala girku sámebarggu čálli.

Ohcejoga rihppaskuvlla álggahanvahkuloahppa 2018.
Ohcejoga rihppaskuvlla álggahanvahkuloahppa 2018. Govva: Vesa Toppari / Yle

Dat vel skájihii go Ohcejogas rihppaskuvlanuorat oahpahalle olggul Áhčči min -rohkosa. Maren-Elle Mäkitalo háliidii namalassii Ohcejoga rihppaskuvlii vaikko mátki Eanodaga Bálojotnjálmmis deike leage máŋga čuohte kilomehtera.

– Mun gullen dán rihppaskuvllas nu olu buori, nu mun háliidin boahtit deike. Dasto dat lea sámegillii go doppe Eanodagas ii leat sámegielat rihppaskuvlla, muitala Maren-Elle.

– Dáppe leamašan hui somá, orru hui somás joavku mis, muitala mojunjálmmiin Mäkitalo.

Maren-Elle Mäkitalo ja Biret-Iŋgá Pieski Ohcejoga rihppaskuvllas.
Biret-Iŋgá Pieski ja Maren-Elle Mäkitalo Ohcejoga rihppaskuvllas. Govva: Vesa Toppari / Yle

Stuorra nuoraid čora viiddida sin sámegiela máhtu

Sierra guovlluid nuorat ledje čoahkkanan rihppaskuvla álgga­­hanvahkulohppii earret eará hárjehallat girkostallama. Dán jagi rihppaskuvlla vázzet olahus olu nuorat, 22 nuora. Sámegielat joavkkus leat 14 nuora. Geassit sii vázzet rihppaskuvla vel badjel vahku.

Go leat nu máŋgga guovllu nuorat ovtta sajis, dat oahpaha olu, muitala Biret-Iŋgá Pieski, guhte lea eret Fierranjogas, Deanuleagis.

– Dáppe lea okta anáraš ja son hállá anárašgiela. Dat viiddida min sámegiela dáiddu ja dan mo mii áddet dan earálágan sámegiela, čilge Pieski.

Rihppaskuvla nuorat hárjehalle girkostallama Ohcejoga girkkus.
Rihppaskuvla nuorat hárjehalle girkostallama Ohcejoga girkkus. Govva: Vesa Toppari / Yle

Buot nuorain lea seamma mihttu, geasi guhkes rihppaleaira ja dan maŋŋá konfirmašuvdna, joatká Pieski.

– Galhan dat lea dan ektui, ahte don beasat dasto náitalit girkus ja dieđusge dat rihppaleaira lea somá go dáppe leat nu olu skihpárat. Go geassit lea guhkes leaira de lea áigi leat singuin.

Girku sámebarggu čálli Erva Niittyvuopio
Girku sámebarggu čálli Erva Niittyvuopio Govva: Vesa Toppari / Yle

Sámiide konfirmašuvdna lea hui dehálaš

Sápmelaččaide konfirmašuvnnas lea stuorra mearkkašupmi, muitala girku sámebarggu čálli Erva Niittyvuopio. Dasa ráhkkanit guhká ja olles sohka searvá konfirmašuvdnadoaluide.

– Mun jáhkán dat dološ vierut dahket beaivvi dehálažžan. Go lean háleštan daid boarrásut olbmuiguin, dieđusge dalle oaččui konfirmašuvdnii dan vuosttas gávtti ja dien láhkai.

Gávtti lassin konfirmašuvnnas lea čiekŋalut mearkkašupmi.

– Dat lei veahá diekkár ollesolmmožin šaddan, dakkár muitobeaivi. Muhto de fas jurddašan, ahte mis lea leamašan álo kristtalaš osku hui nanus ruovttuin ja danin maiddái kristtalaš oahpahus lea dehálaš, loahpaha Niittyvuopio.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä