Sápmi |

Ohcejoga sámelogahat geasuhišgođii fáhkka – "Illudan hui olu dán dilis, go mis leamašan fuolla min logahaga boahttevuođas"

Ohcejoga sámelogahat lea dálá dieđu mielde oažžumin 14 ođđa studeantta, go diibmá álggaheigga guovttis.

Laura Arola lea Ohcejoga gieldda čuvgehusdoaimmajođiheaddji.
Čuvgehushoavda-rektor Laura Arola illuda, go Ohcejoga sámelogahat geasuha. Govva: Vesa Toppari / Yle

Oahpahushálddahusa statistihkaid mielde logahatoahppiid mearri lea sámegielddain váldooasis njiedjan maŋimuš viđa jagi áigge. Dál goittotge Ohcejoga sámelogahagas dilli orru fáhkka rievdamin.

Dálá dieđu mielde Ohcejoga logahagas leat čakčat álgimin 14 ođđa logahatoahppi, muitala čuvgehushoavda-rektor Laura Arola. Dat lea mealgat olu go buohtastahttá dasa, ahte diibmá dušše guokte nuora válddiiga vuostá stuđerenbáikki Ohcejoga sámelogahagas ja dán giđa fas golmmas čálle studeantan.

– Mis lea dál váhá stuorát ahkeluohkká Ohcejogas, muhto eat mii gal áibbas ná stuorra meari lean vuordán. Illudan hui olu dán dilis. Mis leamašan viehka stuorra fuolla min logahaga boahttevuođas jo máŋga jagi, muitala Arola.

Erenoamáš lea maid dat, ahte bealli ohcciin lei Ohcejoga gieldda olggobealde.

– Ohccit ledje Avvilis, Anáris, Roavenjárggas ja maiddái doppe máddin. Geahčaimet, ahte sii leat gávcci iešguđet ruoktobáikkis. Stuorámus oasis lea juogalágan gullevašvuohta Ohcejohkii, muitala Arola.

Iida Kämäräinen
Anárlaš Iida Kämäräinen ii ohcan eará skuvllaide, Ohcejoga sámelogahat lei sutnje áidna molssaeaktu. Govva: Linnea Rasmus / Yle

Okta sis, guhte álggaha čakčat ođđa studeantan Ohcejoga sámelogahagas, lea Iida Kämäräinen Anáris. Sutnje Ohcejohka lei áidna molssaeaktu ja báiki lea muđuige oahpis.

– Mus leat válmmašin jo skihpárat ja fuolkkit Ohcejogas ja Njuorggámis, muitala Kämäräinen.

Son muitala iežas dovdat boahttevaš skuvlaskihpáriin measta buohkaid. Guovttis leaba maid eret Anáris.

Iida Kämäräinen háliidii Ohcejohkii danin go doppe eai leat nu olu olbmot go Avvila logahagas, ja doppe oažžu nuvttá oahppogirjjiid. Maiddái váhnemat orruba duđavaččat su válljejupmái.

– Eadni ainge liiko go doppe hállet sámegiela, ja dat lea buoret sudno mielas go jus manašin Avvilii. Ohcejogas leat guittotge dat fuolkkit, dadjá Iida Kämäräinen.

Čuvgehushoavda-rektor Laura Arola árvala máŋggaid sivaid dasa, ahte sámelogahat lea geasuhišgoahtán dál.

– Min viššalis nuorat leat ieža rekryteren skihpáriid dohko ja miihan oažžut ođđa logahagage jagi geahčen. Kánske ovttasbargu Sámi musihkkaakademiijain váikkuha maid, smiehtada Arola.

Guldal dá Laura Arola jearahallama. Jietna: Linnea Rasmus / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä