Sápmi |

Ohcejoga seaŋgaossodagas duođaštuvvon nubbi koronanjoammun

Buot seaŋgaossodaga pasieanttat ja bargoveahka leat testejuvvon.

Utsjoen terveysasema
Ohcejoga vuosttas koronanjoammun gávnnahuvvui seaŋgaossodaga pasienttas vuossárgga. Govva: Anneli Lappalainen / Yle

Ohcejoga seaŋgaossodagas lea duođaštuvvon nubbi koronanjoammun. Njoammun gávdnui seaŋgaossodaga pasieanttas maŋŋebárgga 18.8. Ohcejoga seaŋgaossodagas gávnnahuvvui vuosttas koronavirusdáhpáhus vuossárgga 17.8.

Buot seaŋgaossodaga pasieanttat ja bargoveahka leat testejuvvon. Njoammumiid vuolggasadji lea ain eahpečielggas. Buot vejolaš njoammumat kártejuvvojit systemáhtalaččat ja daid lagaš kontávttat ožžot áššis dieđu persovnnalaččat.

Ohcejoga dearvvasvuođaguovddážis, Seitakartanos, Dorvus ja Aspas lea dán dilis gallestallangielddus. Dearvvasvuođaguovddáža pasieantavuostáiváldimat dikšojuvvojit gáiddus- dahje telefonoktavuođain.

Ohcejoga gielda lasiha almmolaš báikkiid čorgema ja maiddái gieđaid desinfiseren sajiid. Jođiheaddji doavttir Heidi Eriksen muittuha gieldalaččat fuolahit giehtahygienias ja maiddái geavahit máskaid dakkár almmolaš sajiin, gos ii leat vejolaš doallat dorvvolaš gaska eará olbmuide.

"Boktá duođalaš jurdagiid"

Ohcejoga gielddahoavda Vuokko Tieva-Niittyvuopio dadjá, ahte gieldda koronanjoammumat gal bidjet smiehtastit, muhto ii son gal jierásnuva.

– Dieđusge dat boktá duođalaš jurdagiid. Dan dáfus goit ii leat mihkkege rievdan, ahte epidemiijahan lea olles áigge leamašan jođus. Olbmot leat ferten fuolahit giehtahygienias ja doallat gaskkaid, dát rávvagat leamašan olles áigge fámus.

Vuokko Tieva-Niittyvuopio Saamen sillan edustalla.
Ohcejoga gielddahoavda Vuokko Tieva-Niittyvuopio ii leat vuos jierásnuvvan koronanjoammumiin. Govva: Anneli Lappalainen / Yle

Ohcejoga dearvvašvuođaguovddáža bargonávccat leatge dál biddjon čielggadanbargui. Tieva-Niittyvuopios lea garra luohttámuš gieldda dearvvašvuođasuorgái.

– Dearvvašvuođasuorggi bargit barget dál buot rávvagiid mielde ja geahččalit guorrat njoammunbálgáid ja ásahit olbmuid karantenii, jus lea dárbu. Mu mielas dilli lea stáđis, dasgo dearvvašvuođabargit gal máhttet bargguset ja doibmet addojuvvon rávvagiid mielde, dadjá Tieva-Niittyvuopio.

Varrasamosat: Sápmi

Váldoođđasat

Varrasamosat

Muualla Yle.fi:ssä