Sápmi |

Ohcejoga searvegoddi áigu buođđut ja hástala olbmuid oassálastit Sámi oahpahusguovddáža buođđogursii – rektor: "SOG ii ordne gurssa"

Ohcejoga searvegotti buođđobáikkis Máttatguoikkas áiggošedje buođđut maŋit geasi.

patokalastukseen liittyviä välineitä rannalla
Luossabuođu ceggema galgá máhttit vai dat lea bivdinláhkái. Govva: Yle / Jouni Aikio

Ohcejoga searvegoddi hástala olbmuid oassálastit buođđungursii, man lágideamis searvegoddi lea ráđđádallan Sámi oahpahusguovddážiin. Sámi oahpahusguovddáš ii goittot áiggo lágidit gurssa.

Sámi oahpahusguovddáža rektor Eeva-Liisa Rasmus Moilanen dadjá, ahte gursa ii leat sin stivrra nannen oanehis skuvlejumiid prográmmas jahkái 2020.

– Plána lea dahkkon mannan gease ja stivra lea nannen dan čakčat. Dan mielde doaibmat olles jagi, muitala Rasmus-Moilanen.

Searvegotti plánan lei, ahte ovdal boahtte mihcamáraid livčče vuos njeaidán muoraid ja ollen daid buođđoreŋkkuid várás. Dasto maŋŋelabbos livččii lean sierra gursa buođđoreŋkkuid ceahkkumis.

Searvegottis lea buođđobáiki Máttatguoikkas Ohcejogas ja ulbmilin sis leage dohko cegget buođu. Geassit 2021 livčče áigon oažžut buođđogurssas dahkkon bivdosiid čáhcái.

Searvegotti buođđobáiki lei dolin oassi báhpa dietnasiin

Searvegottis leamašan don doložis, aŋkke čuohte jagi iežas buođđobáiki.

Go dolin searvegoddi ii suitán báhppii máksit dal nu issoras bálkká, de sutnje dietnasa ja láibbi joatkkan leai čujuhuvvon buođđobáiki, gos beassá bivdit luosa.

Luossabuođu ceggema galgá máhttit vai dat lea bivdinláhkái. Boares luossabivdit dihtet, ahte buođđoreŋkkot galget leat cehkkojuvvon justa dan báikki varas, gosa daid áigot cegget. Maid beare doares muoraid ii heive čáhcái hoigadit, go dalle buođđu ii šatta bivdinláhkái.

Buođđobivdoplánat ságastahttet

Ohcejoga searvegoddi ordnii gaskavahku eahkedis ságastallandilálašvuođa buođđobivddus. Sáhka lei das, mo ávkkástallat searvegotti buođđobáikkiin.

Searvegoddi lea geavahan rievttis láigohit iežas guollebivdolobi, ja diibmá dán doaimmas čoggui ruhta badjelaš 1 700 euro, mii geavahuvvo nuoraidbarggu buorrin.

Dál searvegoddi áiggošii fállat iežas buođđorievtti buohkaid atnui.

Searvegotti doaimmas lea šaddan valjis ságastallan maid sosiálamedias. Muhtimiid mielas searvegotti ii heive seaguhit iežas luossabivdoáššiide.

Searvegottis deattuhit, ahte buođđumiin háliidit ordnet oktasaš doaimmaid, hukset servodatlašvuođa ja doalahit ja ealáskahttit árbevirolaš máhtu.

Divvojuvvon 21.2.2020 dii 12:30: Muitaleimmet vuos, ahte Ohcejoga searvegoddi lea ráđđádallamin Sámi oahpahusguovddážiin gurssa lágideames. Gursa ii goittot leat SOG jagi 2020 oanehis skuvlejumiid prográmmas, man mielde ellet olles jagi, ja danin SOG ii lágit gurssa.

Varrasamosat: Sápmi

Váldoođđasat

Varrasamosat

Muualla Yle.fi:ssä