Sápmi |

Ohcejoga searvegoddi dine guolástanlobiiguin ruđaid nuoraiddoibmii – ohcet dál lohpevuovdi

Ohcejoga searvegottis leat guolástanrievttit Deanu oalgejogaide.

Päivi Aikasalo
Ohcejoga girkohearrá Päivi Aikasalo muitala, ahte lohpevuovdimiin leat dinen nuoraidbargui ruđa. Govva: Anneli Lappalainen / Yle Sápmi

Ohcejoga searvegoddi ohcá dál olbmo dahje muhtin oassebeali vuovdit guolástanlobiid searvegotti bealis. Ohcejoga searvegottis leat guolástanrievttit Deanu oalgejogaide.

Ohcejoga girkohearrá Päivi Aikasalo muitala, ahte guollelobiiguin lea vejolaš dinet ruđa searvegotti nuoraidbargui.

– Dát lea buktán nuoraidbargui ruđa. Eat leat vel mearridan maid boahtte jagi ruđaide dahkat, muhto jáhkkimis dat mannet nuoraid buorrin, árvala Aikasalo.

Ohcejoga searvegottis leat oktiibuot 16 bivdobadjelobi, muhto searvegodderáđđi lea mearridan vuovdit lobiid jándoriid mielde. Okta lohpejándor máksá 20 euro ja das oažžu lohpevuovdi 35 proseantta iežas bursii, loahppa manná searvegoddái.

Searvegoddi lea vuovdán guolástanlobiid maiddái ovddit jagiid ja guolástanlobiid vuovdimis lea dalle fuolahan searvegotti bargi. Dál searvegoddi ohcá goit dasa olggobeale olbmo, muitala Aikasalo.

– Sávan, ahte buohkat geat leat beroštuvvan vuovdit lobiid nuoraiddoaimma bealis, váldet oktavuođa searvágoddái ovdal juovlamánu 18. beaivvi, ávžžuha Aikasalo.

Varrasamosat: Sápmi

Váldoođđasat

Varrasamosat

Muualla Yle.fi:ssä