Sápmi |

Ohcejoga skuvlaguovddáš gurrejuvvo, oahppit duđavačča go besset eará sadjái

Ohcejoga gielda lea mearridan, ahte Ohcejoga skuvlaguovddáš gurrejuvvo ja oahppit vázzet skuvlla loahppa giđa eará sajiin. Otne oassi oahppiin válljii studeret olgun.

Otne oahppit háliidedje gazzat oahpu olgun. Vuossargga sis leat jo ođđa sajit.
Otne oahppit háliidedje gazzat oahpu olgun. Vuossárgga sis leat jo ođđa sajit. Govva: Vesa Toppari / Yle

Geasseluomuide lea vel moadde váhku áigi, muhto Ohcejoga skuvlaguovddáža dálus gaskavahku lei maŋimuš dábálaš skuvlabeaivi. Duorastaga lea bassi ja bearjadaga Ohcejoga skuvlaguovddáža oahppiin lea olgobeaivi.

Skuvlaguovddáš gurrejuvvo ja oahppit vázzigohtet vuossárgga rájes eará sajiin skuvla, muitala čuvgehushoavda ja rektor Laura Arola.

– Mii leat dál dahkan dákkár hohpolaš mearrádusa sirdit min ohppiid ja bargiid eret dán dálus, danin go mii eat sáhte leat sihkkarat dán dorvvolašvuođas. Dál lei buoremus dahkat ná, dadjá Arola.

Ohppiid mielas lea buorre go besset eará sadjái loahppa giđđii

Moadde vahku áigi álge Ohcejoga skuvlaguovddáža dili dutkat, láhttis gáhttui, geažis geahččái. Go glássaulluid váldigohte eret, de olbmot buohcagohte. Virggálaš bohtosat skuvlaguovddáža ortnegis bohtet goas nu geassemánus.

Ovccátluohká oahppit muitalit, ahte sii leat dovdan amas váttuid sisáimmu geažil.

Oahppiguoktá leaba duđavačča go beassaba vázzit eará sajis skuvla loahppa lohkanbaji.
Leevi Halonen ja Mihku Laiti leaba guktot gillán heajos sisáimmu geažil. Govva: Vesa Toppari / Yle

– Mannan vahku rájes mus leamašan mu čalmmit nu fuones ortnegis. Dat leat golgan ja hilaštan. Diet leamašan hui fuones ordnegis, muitala Mihku Laiti ja čájeha mo su liiki lea goikan čalmmiid birra.

Leevi Halonen lea ovtta oaivilis Laitiin.

– Mus leat maid čalmmit ja njunni golgan. Leamašan váttis vuoigŋat, muitala Halonen.

Guktuid mielas lea buorre go gielda dagai gurrenmearrádusa.

– Mu mielas dat lea hui buorre. Livčče ožžon jo vehá árabut álgit dan bargat. Buorre, ahte dat goittot barget dan, dadjá Laiti.

Geasi čorgejit ja buhtistit skuvlaguovddáža

Gieskat dahkkojuvvon dutkamušaid virggálaš bohtosat skuvlaguovddáža ortnegis bohtet goas nu geassemánus. Geasi áigge skuvla ja áibmomolsunbohccit galget buhtistuvvot nu, ahte áibmomolsun ii šat boso glássaullogavjja, muitala huksendárkkisteaddji Markku Porsanger.

Ovdal geasi visot ullut galget váldojuvvot eret. Geassemánus čorgejuvvo oba dállu ja dat áibmomolsunkanálat maiddái buhtistuvvojit, muitala Porsanger.

Leago ulbmil, ahte boahtte čavčča dát lea dan ordnegis, ahte mánát sáhttet vázzit dáppe skuvlla?

– Dien in sáhte lohpidit. In dieđe oba iešge, dadjá Porsanger.

Oassi háliidii otne olgun studeret, vuossárgga rájes sii leat ođđa sajiin skuvllas

Otne oassi ohppiin válljii studeret olgun. Eambo guoddiledje suffá olggos ja oahpaheaddji oahpahii sin skuvlla šiljus. Gielddavirgeolbmuide leamašan viehka buncarakkis moatti beaivvis gávdnat ođđa sajiid čuođi oahppái.

Ohcejoga oahppit háliidedje studeret olgun otne.
Sámegielat luohkká studerii olgun iđđes. Govva: Vesa Toppari / Yle

– Dat ii leat Ohcejogas beare gávdnat ođđa sajiid, muhto gal mii leat dál jo sullii hábmen dan čovdosa, gosa mat ge luohkkát mannet. Mii leat láigohan searvegoddedálu, doppe leat stuorra sajit.

Boahtte vuossárgga rájes oahppit leat dego bieđganan eallu.

– Dilli boahtá leat váttis nu oahpaheddjiide go ohppiidege, go dat buohkat leat dasto hiluid háluid birra gili, muhto muhtinlágan čoavddus lea jo.

Laura Arola lea čuvgehushoavda ja rektor Ohcejoga gielddas.
Arola muitala, ahte vánhemiidda ordnejit dieđihandilálašvuođa gaskavahku. Govva: Vesa Toppari / Yle

Skuvladoaibma ordne gaskavahku eahkedis guđa áigge vánhemiidda dieđihandilálašvuođa áššis.

– Dalle mii dieđihat vánhemiidda daid čovdosiin, maid mii leat dál hutkan ja mo dás ovddos guvlui, loahpaha Arola.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä