Sápmi |

Ohcejoga skuvlaguovddáža sisáimmu dutket ain, eahpečielggas gos oahppit álggahit skuvlla čakčat

Čakča láhkona muhto Ohcejoga gieldda virgeolbmot eai vel dieđe gos mánát álggahit čakčat skuvlavázzima. Sisáibmováttisvuođat orrot dan mađe stuorrá, ahte eahpevirggálaš ságastallamiin ovdan leamašan ođđa skuvlla huksen.

Ohcejoga skuvlaguovddáš.
Ohcejoga skuvlaguovddáš. Govva: Vesa Toppari / Yle

Ohcejoga skuvlaguovddážis leat giđa áigge leamašan sisáibmováttisvuođat, ja loahppagiđa Ohcejoga gielda mearridii, ahte skuvlaguovddáš gurrejuvvo ja oahppit vázzet skuvlla loahppa giđa eará sajiin.

Skuvlaguovddáža sisáimmus leat giđđat čađahan dutkamušaid. Dutkamušain lea boahtán gaskaraporta geassemánu álggus. Ohcejoga gieldda čuvgehushoavda Laura Arola muitala, ahte raporttas čielggai Ohcejoga skuvlaguovddážis leat stuorra ja viiddis váttisvuođat.

– Váldováttisvuohta lea, ahte lássaullu, dat minerálaullu beassá dohko sisáibmui biggohanbohcciide máŋgga sajis. Dasto dieđusge dat lea boares dállu. Dat lea 40 jagi boares dállu, doppe leat buotlágán boares dálu váttisvuođat.

Ii vel diehtu gos oahppit álggahit skuvlla čakčat

Ohcejogas skuvla álgá fas borgemánus. Dasa Laura Arolas ii goittotge leat vel vástádus, gos oahppit álggahit skuvlla. Ohcejoga gilis leat jo kárten vejolašvuođaid ođđa sajiide. Ohcejogas leat dál dutkamin leago vejolaš eastit lássaullu beassama sisáibmui, vai oassi skuvladoaimmaiguin sáhtášii leat skuvlaguovddážis.

– Dat fitnodat, mii lea bargan doppe dan dárkkistusa skuvlaguovddážii, de daiguin lea leamaš dakkár plána das, mo sáhtášii dan davvebeali skuvllas fidnet atnui. Ahte mo sáhtášii eastit dan lássaullu beassama sisáibmui gaskaboddosaččat. Dakkár vejolašvuohta lea dál, ahte oassi skuvllas lea doppe skuvlaguovddážis lihkká.

– Mis lea nu hirbmat stuorra váttisvuođat gávdnat dan saji skuvlii. Ii nuge daid dábálaš luohkkálanjaid, muhto dat stuorámus váttisvuohta lea dat, go oahppoplána mielde galgá oahpahit maiddái teknihkalaš duoji, valáštallama, ruovttudoalu. Buot dieid doaimmaide lea hui váttis gávdnat saji eará báikkis.

Laura Arola lea čuvgehushoavda ja rektor Ohcejoga gielddas.
Ohcejoga gieldda čuvgehushoavda Laura Arola Govva: Vesa Toppari / Yle

Laura Arola muitala, ahte Ohcejogas leat čielggadeamen maid skuvlaguovddážii gánnáhivččii dahkat.

– Daid ságastallamiid vuođul maid mun lean gullan, de gal dat orui leamen viehka čielggas, ahte dan ii gánnet divvut. Dal mii leat jo čielggadeamen, mo dasto ođđa skuvlla sáhtašii hukset, mo dan sáhtášii ruhtadit, makkár málle dasa doaimmašii. Muhto dat lea dieđusge guhkes proseassa unna gielddas álgit diekkár stuorra prošeavttaide.

– Mii leat kártemin dan, ahte makkár livččii dat remonta man dat gáibidivččii. Muhto gal dat eanet orui leamen dál dat ođđa skuvlla huksen, man gánneha álgit dás smiehttat ja kártet daid vejolašvuođaid, dadjá Arola.

Mihtidemiid gaskan – Huksendárkkisteaddjige ii dieđe gos oahppit álggahit skuvla

Ohcejoga gieldda teknihkalaš doaimma huksendárkkisteaddji Markku Porsanger muitala, ahte Ohcejoga skuvlaguovddážis leat ain mannamin mihtideamit, ja loahpalaš bohtosiid sii ožžot moatte vahku geažes.

– Dan maŋŋá mii diehtit, geargatgo mii čakčii válbmet dan skuvlla nu, ahte dat sáhttá álggahit doppe.

Markku Porsanger
Markku Porsanger. Govva: Laura Pieski / Yle

Porsanger muittuha, ahte vel ii leat sihkkarvuohta mii lea loahpalaš váttisvuohta. Maiddái son lokte ovdan ovtta stuorát váttisvuođa.

– Boađus lea dat, ahte ulluiguin, lássaulluiguin eandalii dat gavja mii vuolgá luovos, dat lea dagahan daid váttisvuođaid.

Markku Porsanger muitala, ahte das lea ságastallon, galggašiigo skuvlaguovddáža ođasmahttit vai cegget ođđa skuvlaguovddáža. Mearrádusat eai goittotge leat vel dahkkon. Dasa ii Porsangerge vástit, sáhttetgo oahppit álggahit skuvlla čakčat Ohcejoga skuvlaguovddážis.

– Mun in sáhte vástidit diesa, go mun in dieđe, loahpaha Porsanger.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä