Sápmi |

Ohcejoga váldostivra luohttá dálá čoahkkinjođiheaddjiide ja gielddaráđđehussii – sii jotket doaimmaineaset

Ohcejoga gieldda váldostivrra ságadoallin joatká Mika Aikio ja gielddaráđđehusa jođiha ain Ilmari Tapiola.

Mika Aikio lea Ohcejoga gieldda váldostivrra ságadoalli.
Mika Aikio joatká gieldda váldostivrra ságadoallin Ohcejogas. Govva: Kaija Länsman / Yle Sápmi

Válljemat gieldda njunušbáikkiide manne njuovžilit Ohcjeoga gieldda váldostivrra čoahkkimis vuossárgga. Váldostivrra ságadoallin joatká Mika Aikio sosiálademokráhtain. Vuosttas várreságadoallin válljejuvvui ain Veikko Porsanger olgešbellodagas ja nubbin várreságadoallin Uula Tapiola guovddášbellodagas.

Gielddastivrra njeallje jagi áigodat lea dál beallemuttus. Ohcejoga gielddastivra válljii dál hálddahusnjuolggadusa mielde váldostivrra ságadoalliid ja gielddáráđđehusa lahtuid guovtte jahkái, válgaáigodaga lohppii.

Ohcejoga guovddášbellodaga Gáva-Ilmár, Ilmari Tapiola
Ilmari Tapiola doaibmá ain Ohcejoga gielddaráđđehusa ságadoallin. Govva: Maria Saijets/ Yle

Gielddaráđđehusas jotket seamma áirasat go dán válgaáigodaga guovtte vuosttas jagi. Gielddaráđđehusa ságadoallin váldostivra válljii vuossárgga Ilmari Tapiola guovddášbellodagas, várreságadoallin Marjatta Kordelin olgešbellodagas, ja lahttun Eeva Nuorgam guovddášbellodagas, Veikko Porsanger olgešbellodagas, Anni Koivisto sosiálademokráhtain, Anni Ahlakorpi gurutlihtus ja Sammol Lukkari ruoŧŧelaš álbmotbellodagas.

Váldostivrra čoahkkimiidda fásta áirrasin loktana vuosttas várresajis olgešbellodaga Lotta Holma. Sutnje rahpasii sadji, go válggas válljejuvvon olgešbellodaga áirras Jarkko Tenoranta lei ohcan earu gieldda luohttámušdoaimmain.

Gieldda luohttámušdoaimmain earu fidniiga maiddái Maija Länsman ja Harri Krogerus. Maija Länsman sadjái guovddášválgalávdegotti ságadoallin válljejuvvui Ara Aikio ja Harri Krogerus sadjái gielddaráđđehusa várrelahttun Niila Laiti.

Varrasamosat: Sápmi

Váldoođđasat

Varrasamosat

Muualla Yle.fi:ssä