Sápmi |

Ohcejoga válgalávdegoddi šattai vuorbádit maŋimuš báikkis: Pirjo Konttinen loktanii váldostivrii

Ohcejoga boahttevaš váldostivrra nissonáirrasiid mearri loktanii viđa áirasii, go otne gaskavahku guovddášválgalávdegoddi šattai vuorbádit ovtta váldostivrráirrasbáikkis.

Utsjoen kunnantalo
Vuorbádeamit váldostivrrabáikkis ja ja várreáirasa báikkis ledje otne gaskavahkko guovddášválgalávdegotti čoahkkimis. Govva: Vesa Toppari / Yle

Mannan sotnabeaivvi dollojuvvon gielddaválggain válgaboađus bázii Ohcejogas rabas, go golbma evttohasa ožžo seamma jietnameari, 19 jiena, ja sii gulle seamma válgalihtu evttohaslisttu sisa.

Sii ledje Kristtalaš demokráhtaid evttohas Pirjo Konttinen ja olgešbellodat Kokoomus evttohasat Veikko Porsanger ja Petteri Valle.

Ohcejoga válgalávdegoddi šattai vuorbádit maŋimuš báikkis. Vuorbádeami vuittii Pirjo Konttinen, nuba Ohcejoga boahttevaš váldostivrra nissonáirrasiid mearri loktanii viđa áirasii.

Olgešbellodaga vuosttaš várreáirrasbáikki oaččui Veikko Porsanger. Vuorbádeamit váldostivrrabáikkis ja ja várreáirasa báikkis ledje otne gaskavahku guovddášválgalávdegotti čoahkkimis.

Álggoálggus Yle válgaboađussiiddus váldostivrii livčče lean beassamin Petteri Valle, muhto feaila šattai bohtosiidda danin, go válgoboađussiiddus eai máhttán váldit vuhtii ná dássidis válgabohtosa.

Olgešbellodaga, Kristtalaš demokráhtaid ja Vuođđosuopmelaččaid válgalisttus leat Ohcejogas guhtta váldostivrrabáikki, seamma veardde go Guovddášbellodaga ja Ruoŧŧelaš álbmotbellodaga RÁB válgalihtus. Golbma báikki fas manne Sosialdemokráhtaid ja Gurotbellodaga válgalihttui.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä