Sápmi |

Ohcejogas čájehit miela ođđa guolástanlága vuostá

Anáris ordnejuvvui geassemánu álggus oaivilastin ođđa guolástanlága vuostá. Ohcejoga Máttatguoikkas lea dárkkuhus ordnet seammasullasaš oaivilastima lávvardaga.

Ođđa guolástusláhka
Govva: Yle / Jouni Aikio

Ohcejohkalaš Hans Pieski lea leamašan mielde plánemen oaivilastima Ohcejohkii. Son muitala, ahte dainna háliidit čájehit duhtameahttunvuođa ođđa guolástansoahpamuššii.

– Mii háliidit buktit ovdan min oainnu dás ođđa guolástanlága paragráfas, mii gahčaha min seamma árvosažžan kiinnálaččaiguin dáppe min siidojogain. Ja mii háliidit buktit ovdan, ahte dát lea dakkár ášši man mii eat dohkket dál eatge boahttevuođasge.

Pieski muitala, ahte oaivilastima lei dárkkuhus ordnet jo mannan vahkuloahpa, muhto dulvvi dihte dan mearridedje sirdit vahkuin.

– Dál mii siktet lávvardahkii diibmu 13 dás gili lahka Máttatguoikkas Ohcejogas.

Hans Pieski muitala, ahte olbmuid leat háhkan mielde ovdamearkka dihte Facebook bokte. Pieski ii máhte goittotge árvalit, olugo olbmot leat searvamen.

– In leat mihkkege einnosteddjiid, nu váigat makkárge árvalusa dadjat, muhto sávvat fal ahte olbmot beroštit dás.

"Min oaiviliin ii oro leamen mihkkege váikkuhusaid"

Hans Pieski ii jáhke oaivilastimis leat gáfat stuorra váikkuhus.

– Anáris dahkkui gal dán seamma ášši dihte jo nu fiinna bargu, doppe ožžo riikkabeaiáirasiidge johtui. In njuolga daddjon jáhke, ahte dán min oaivilastimis dal dađi ipmašut váikkuhus lea. Ii oro leamen min earáge oaiviliin mihkkege váikkuhusaid, maid dál leat dáppe iskan huikkašit mannan jagiid Mátta-Suoma guvlui.

– Muhto gal dás dál aŋkke oažžut informašuvnna viiddiduvvot eanet giliolbmuid gaskkas ja kánske dahkat veháš oktasaš vuoiŋŋa. Eai dáppe buohkat leat vel oba morihange dasa, ahte mo jallas dát dilli lea dál daid siidojogaid bivdima dáfus.

Pieski sávvá, ahte buohkat geat sáhttet boađáše almmolaččat guolástit suoli singuin boahttevaš lávvardaga.

– Nisulampi parkerensadjái čáhket biillat ja Ringi geainnu geahčái Ohcejoga gilis. Das vuolgá geaidnu, moadde čuođi mehtera nu leat Máttatguoikka gáttis, gos lea olu stáhta eana gos sáhttit čájehit miela, ahte ii eará go buresboahtin, dadjá Pieski.

Hans Pieski lea mielde Dearvva-sáddagis disdaga 13.6.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä