Sápmi

Ohcejogas fállet skuvlaborramuša buot skuvllalaččaide: vuojihit borramuša tákssiin daidda, geat lávejit muđuige dárbbašit sáhtu

Sami Aikio vastaanotti lastensa kouluruokapaketin
Sami Aikio mánáide buktet skuvlaborramuša ruoktot. Govva: Kirsti Länsman / Yle

Ohcejoga gielda háliidii álkidahttit váhnemiid noađi dán erenoamáš dilis. Viđa máná bearraša áhčči lea duđavaš.

OHCEJOHKA Tákse jorggiha ohcejohkalaš Aikio bearraša šilljui. Dat buktá skuvlamánáide borramuša guovtti skuvlabeaivvi dárbbuide.

– Doppe lei vaikko mii. Lea saláhtta ja ruotnasat ja iešguđetlágan niesttit ja borramušat kássa dievva, muitala bearraša áhčči Sami Aikio.

Son lea giitevaš, go Ohcejoga gielda lea mearridan juohkit skuvlaborramuša buohkaide, geat dan fal háliidit, vaikko stuđerešedjege gáiddusin.

– Galhan dat álkidahttá olu ja borramuš lea eambo go buresboahtin. Min viđa máná bearrašis oahppit leat ovdaskuvllas gitta logahahkii. Go sin dás geahččala veahkehit ja seammás galggašii iežas bargguid bargat, de buot veahkki lea hui dárbbašlaš.

Gielda háliida doarjut gieldalaččaid

Koronavirusa dagahan spiehkastatdilli nuppástuhtii skuvllalaččaid eallima olles riikkas. Eanaš oassi skuvllalaččain bargá dál skuvlabargguid gáiddusin, ja nu dahket maiddái dat váhnemat, geat fal sáhttet.

Ohcejoga gielda háliidii álkidahttit váhnemiid noađi dán erenoamáš dilis.

– Mii háliidit doarjut min gieldalaččaid iešalddes máŋgga dásis. Ruđalaččathan borramuša ordnen sáhttá leat hástaleaddji muhtin váhnemiidda. Váhnemat sáhttet maiddái leat gáiddusbarggus, ja dalle dát álkidahttá sin barggu, čilge Ohcejoga sadjásaš čuvgehushoavda-rektor Eila Tapiola.

Borramuša juhket guktii vahkus moatti beaivái hávil. Dat oahppit, geat ásset skuvlla lahkosis, sáhttet viežžat borramuša skuvlla šiljus. Oahppiide leat addán iežaset áiggi borramuša viežžamii vai buohkat eai leat báikki alde oktanaga.

Stuorámus oassi Ohcejohnjálmmi skuvlla oahppiin ássá nu guhkkin, ahte sidjiide borramuša vuojihit skuvlatákssiin dahje gieldda bargiid fárus. Borramuša dolvot maiddái daidda, geat leat karantenas.

– Go mii fállat skuvlaborramuša buot min skuvllalaččaide, de dat buktá maiddái bargosajiid min gildii dán dilis, ákkastallá Eila Tapiola.

Skuvlaborramuš
Vuosttas beaivve ruoktot doaimmahedje luosa ja buđehiid. Govva: Ohcejoga gielda

Álkidahttá mánáid ja váhnemiid árgga

Aikio bearrašis gárvves skuvlaborramuš seastá áiggi. Stuorra bearraša biebman bargobeaivvi gaskkas livččii áddjás bargu.

– Dathan gal váldá áiggi. Galhan das álo eahkedis bargobeaivi guhkku, jus ii beaivvi áigge astta bargat doarvái. Iežan bargguid barggan gáiddusin, muitala Sami Aikio.

Mánátge orrot leamen duđavaččat, go ožžot borramuša áiggil, muitala Aikio.

– Jos skuvlaborramuša ii oaččoše, de sáhtášii geavvat nuge, ahte ii gearggaše eará go láibevajahasaid coggat njuni vuollái ja de joatkit dassážii go skuvla nohká, ovdal go easkka ráhkadit borramuša, bohkosa Aikio.

Eará sámegielddat eai leat leamaš nu beaktilat

Suoma ráđđehus mearridii giddet skuvllaid njealját luohkás bajásguvlui gaskavahku 18.3. rájes amas koronavirus leavvat. Ohcejoga gielddas juohkigohte skuvlaborramuša vahku maŋŋeleappos.

Buot gielddat eai leat leamaš nu beaktilat reageret skuvllalaččaid borramušdárbbuide gáiddusoahpahusa áigge. Skuvlaborramuša ordnemis leat erohusat gielddaid gaskkas miehtá Sámi.

Soađegili gielda lea vuossárgga 30.3. mearridan, ahte dat juohkigoahtá skuvlaborramuša skuvllalaččaide, jus bearaš atná dan vealtameahttumin spiehkastatdili fanadettiin. Gielddas árvalit, ahte borramuša besset juohkit áramustá 7.4. rájes. Jurdda lea, ahte skuvllalaččat fitnet ieža viežžamin borramuša guokte geardde vahkus.

Anáris skuvlaborramuša fállet dálá dilis dušše daid oahppiide, geat leat lagašoahpahusas. Eará dárbbuin leat dál ollašuhttimin gažadeami.

Maiddái Eanodaga gielda fállá skuvlaborramuša dušše daidda, geat leat lagašoahpahusas, muhto doarju bearrašiid dárbbu mielde. Gielda áigu buhtadit váhnemiidda ovtta oahppi borramuša goluid 18.3. rájes golbma euro beaivvis.

Varrasamosat

Muualla Yle.fi:ssä