Sápmi |

Ohcejogas leat čohkkegoahtán ahkeolbmuid oktii muittašaneahkediidda: Nilla Pieski čájehii boares govaid vuosttas deaivvadeamis

Koronaáigi lea lasihan oktonasvuođa ja sámegielat muittašaneahkediin hálidit čohkket olbmuid fas oktii njuniid. Eahkediid ordnejit Deanuleagis sámástit -prošeakta ja SámiSoster-searvi.

Nilla Pieski, Utsjoki
Nilla Pieski lea beroštuvvan čohkket boares govaid ja muitalusaid, amas dat vajálduvvat ja jávkat. Govva: Anneli Lappalainen / Yle

Ohcejogas leat álgán ordnet sámegielat muittašaneahkediid ahkeolbmuide. Doppe beassá ovdamearkan oaidnit boares govaid ja muittašit dološáiggi.

Biret-Ovllá Nilla, Nilla Pieski lei čohkken dievva boares govaid, maid lei boahtán čájehit vuossárgga Ohcejotnjálmmis. Govain gávdnujedje oahpes olbmot, muhto olu ledje maid govat main orro leamen maid amas olbmot.

Pieski mielas lea dehálaš guldalit boarrasut olbmuid muittašemiid ja sirdit dan dieđu maid nuorabuidda.

– Dán áigge eai šat gula daid, eaige dat šat muitalatte daid. Mun lean álgán daid čohkket, ahte eai jávkka áibba obban, muitala Pieski.

Koronaáigi lea lasihan oktonasvuođa ja dákkár muittašaneahkediin hálidit čohkket olbmuid fas oktii njuniid. Vuorrasut olbmuide lea vuogas beassat gáfestallat ja háleštit earáiguin.

– Eandalit dál go koronaáigi leamaš, boarrásut olbmot gártet okto čohkkát. Besset juohkit daid iežaset muitalusaid ja áššiid, gal dat lea dehálaš, dadjá Pieski.

Biret-Ovllá Nilla lea beroštuvvan čoaggit njálmmálaš muittut ja boares govaid. Su mielas lea dehálaš guldalit ahkeolbmuid muittašemiid ja muitalit daid fas viidásut nuorat sohkabuolvvaide. Jietna: Susanna Guttorm / Yle

Muittašaneahkediid ordnejit vuossárggaid gitta juovlamánu rádjái

Deanuleagis sámástit-prošeakta ja SámiSoster-searvi ordnejit ovttas juohke nuppi vuossárgga Gáregasnjárggas ja juohke nuppi vuossárgga fas Ohcejotnjálmmis muittašaneahkediid gitta juovlamánu beallemuttu rádjái.

Dán háve geahčadedje dárkilit boares govaid, boahtte háve fas soitet dahkat juoidá eará.

Kirsti Paadar Ohcejotnjálmmis lei maid boahtán muittašaneahkedii ja liikui geahččat boares govaid. Govain oidnostii maid su viellja Ánde ja máŋga earáge oahpes olbmo Ohcejot guovllus.

– Dat lei hui somá, boađán nuppe hávege jus lea vejolašvuohta, dadjala Paadar movttegit.

Kirsti Paadar
Ohcejohkalaš Kirsti Paadar oainnestii boares govain maid nuorravuođagova iežas vieljastis. Govva: Susanna Guttorm / Yle

Kirsti Paadar Ohcejogas liikui geahčadit boares govaid ahkeolbmuid muittašaneahkedis vuossárgga. Son lea gearggus oassálastit maid čuovvovaš muittašaneahkedii. Jietna: Susanna Guttorm / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä