Sápmi |

Ohcejogas lei eana vielgadin iđđes – meteorologa: čoaska ijat vel dieđus

Sosiála mediain leat otne iđđes oidnostan govat Ohcejoga guovllus, gos eana lei vilggodan ija áigge.

Lunta maassa Utsjoella kesäkuun viimeisenä päivänä
Vuokko Hirvonen fuomášii, ahte su buđetbealdu lei ija áigge vilggodan. Govva: Vuokko Hirvonen

Ohcejogas olbmot lihkke otne iđđes dasa, ahte eana lei vilggodan ija áigge.

Vuokko Hirvonen morihii iđđes čieža áigge ja go vilppastii olggos, de fuomášii ahte dálu robi alde lei muohta.

– Dalle mun bohten vulos doppe lovttas ja šiljus lei duođai muohta ja buđetbealddus. Daid mun árkkášin daid iežan šattuid doppe, muitala Hirvonen.

Son lei eiddo moadde beaivve árat vázzán duoddaris ja oaidnán luomelasttaid lieđđumin. Vuosttas jurdda leige, ahte moson dál geavvá luopmániidda.

– Jus dat ii buollaša beallái mana, sávvamis eai leat mannan. Dat lea nu hearki dat luomi ahte mii dáhpáhuvvá, smiehtada Hirvonen.

Olbmot leatge otne iđihan govaid vilggodan eatnamis sosiála mediaide. Okta guhte lea maid bidjalan govaid geassemuohttagis Facebookii lea Riitta Valle.

Songe iđđes go lihkkai ja rabastii lássaliinniid, fuomášii ahte eana lea vielgadin.

– Smiehtastin, ahte muohtahan dat lea ja luopmu justa álggii, muhto iigoson dat beaivváš vel báitte deikege, jáhkká Valle.

Lunta maassa Utsjoella kesäkuun viimeisenä päivänä
Vaikko biilla alde leige muohta otne iđđes, de jáhkká Riitta Valle, ahte lieggage beaivvit leat vel dieđus dán gease. Govva: Riitta Valle

Meteorologa: Čoaska ijat leat vel dieđus čuovvovaš beivviid áigge

Yle meteorologa Anniina Valtonen muitala, ahte davimus Suomas lea dálki čoskon mealgadit mannan vahku temperatuvrrain. Temperatuvra lea dál beaivit +4 ja +8 gráđá gaskkas davimus Lappi guovlluin. Ihkku temperatuvrrat leat vuollel +5 gráđa.

– Mannan ija Ohcejogas leamaš temperatuvra +2 ja +3 gráđá gaskkas, Gilbbesjávrris Eanodaga guovllus leamaš joba 1 buolašgráđa, muitala Valtonen.

Eaige čoaska ijat dása gal nohkkan.

– Eandalit duottarguovlluin lea nu čoaskkis, ahte doppe sáhttá muohttit ja šlahttit, dadjá Valtonen.

Su mielde dákkár dálkkit eai goittot leat nu hárvenačča davvin. Muohttamearri ii goittot leat nu stuoris, ahte dat dihttošedje virggálaš mihtidanbáikkiin.

– Ovdamearkka dihtii geassi 2017 lei čoaskkis, dalle maid šlahtii. Dákkár dáhpáhusat leat ain duollet dálle, dadjá Valtonen.

Varrasamosat: Sápmi

Váldoođđasat

Varrasamosat

Muualla Yle.fi:ssä